Thingtlang a piang leh seilian kan nih vang ni maw, kan naupan lai leh tleirawl chhoh thleng khan kan phak ang tawkin lehkhabu chhiar kan uar ve viau thin. Thawnthu bu hrang hrang leh cowbow bu kan hmuh phak apiang kan chhiar a, tunlai angin T.V. leh mobile phone te awm ve hek lo, fel vang pawh ni loin lehkhabu chhiar kha kan inawmtleina hmanraw pawimawh tak a ni a, kan chhiar ve nual mai. Cowboy bu hrang hrang- Will Bill Hickok te, Billy The Kid te, Bill Jack te, Sudden-a bu hrang hrang leh Wayne Cole-a thawnthu te kha ngaihnawm ti takin kan chhiar thin. Count of Monte Cristo mawlh mai kha ngaihnawm kan va ti thin tak em!

Han peng lawk ila, kan tleirawl thleng khan kan khuaah T.V nei an awm miah lo. Chuvangin lehkhabu chhiar bak inawmtleina hmanrawn dang a vang khawp mai. Kum 1987 kum tirah T.V ka hmu ve mial a, ka vawikhat hmuhna a ni. Hemi kum hi MLA inthlanpui kum a ni a, State kan nih hnua general election hmasa ber a nih vang te pawh a ni mahna, party tin an tang a, nasa takin an campaign a ni. Hemi tum hian kan bial (Khawbung bial) ah chuan PC Party in C Lalsawivela an candidate a, “Tlawmngai huaisen, nungchang mawi ber, Lalsawivela i vote ang u” an ti a, an zai a, campaign office-ah an lam luih luih a, chu chu ka naupang thu hriat ruai ruai a ni. Campaign a lo kal PC Party te hian T.V leh Generator an rawn keng a, zanah YMA Hall-ah an chhuah a, a khaw nawtin kan en a ni. Tum khat pawh Congress party candidate Pu F Lalthlamuana kha helicopter-in a lo kal a, kan khaw field-ah a rawn tum khu luih mai a, ropui kan va ti teh reng em! Motor pawh hmu zen zen loin hmun leh hmunah helicopter kan han hmu chu a ropui em a ni.

Khatih lai khan tun ang hian chhung tinin T.V leh mobile phone nei ta fir fer ila, keini rual khan chuti takin lehkha chhiar kan peih bik kher lo mai thei. Tunlai khawvelah chuan lehkhabu aia min awmtlei theitu hmanrawn hrang hrang a tam tawh em a, lehkhabu kan chhiar tlem tial tial ta bawk. Social media-in min luh chhuah mek lai hian lehkhabu chhiar aia tha leh hlawk erawh a awm thei tak tak chuang lo. Social media-ah thu chi hrang hrang chhiar thin mah ila, lehkhabu chu lehkhabu nge nge a ni.

Mi fing apiangin lehkha chhiar an uar a, lehkhabu an ngaihlu bawk. Lehkha chhiar nasa chu an thu leh hla pawh a fing nge nge. Zonet RK Lianzuala (L) khan a dam lai khan tuk tin facebook ah thu tha tak tak a ziak thin a, khatianga a thu ziah zozai kha a tawnhriat atanga a ziah chu awm bawk mahse, a tam zawk chu a lehkhabu chhiar atanga a ngaihtuahnaa lut a nih a rinawm. Amah hrechingtu pakhat chuan lehkhabu chhiar lai a nei reng thin a ti.  Keini, kum khata Matthaia ziak pawh chhiar chhuak peih mang lo te nen chuan kan hriatna chu inthlau fe tur a ni.

Tleirawl lai atanga lehkha chhiar ngaina ni mah ila, ka upa tawlh tawlh a, ka inthlahdah tawlh tawlh mai. Lehkha chhiar taima tura mite fuih tur hian eng ka ni bik lo. Heti chung hian zirlai te hi lehkhabu chhiar uar tur leh lehkha chhiar ngaina turin ka fuih ve fo thin. Mi ropui te’n harsatna tam tak paltlanga hlawhtlinna an chan dan leh an tawn hriat ngaihnawm tak tak, an mahni ngeiin an chanchin an ziah (autobiography) hi ngaihnawm ka ti thin a, chhiar manhla ka ti thin. Zirlai te pawh chhiar turin ka fuih fo thin. Zofate zingah hian mi tum ruh tak, harsatna thilpuiin a nuai hrep pawha a nuai thluk zawh loh hi an lo tam khawp a, heng mite chanchin hi a ngaihnawm a, a ngaihnawm mai piah lamah hringnun chona hmachhawn tura min nawrkaltu tawlailir tha tak a ni bawk. 

Tin, lehkha chhiar tam hian hriatna a ti zau a, tu tan pawh a tha a ni. Mipui hmaa ding thin leh thusawi thang, Pastor leh Kohhran Upa te hlei hlei hian inchhiar zau an mamawh. Thusawi ngaihnawm loh tak, thlarau lama hnunhnang si lo, tisa thila hriatna ti zau chuang bawk si lo ngaihthlak fo mai hi ninawm ve thin tak a ni. Pa pakhat Pathian thu sawiin a thianpa hnenah, ‘Zanin ka thusawi kha a eng lai nge tha i tih ber?’ tiin a zawt a, a thianpa chuan, ‘Lalpa’n malsawm rawh se’ i tih lai kha’ tiin a chhang e, an ti. Hetiang thuhriltu hi kan tam ve fu mai thei. 

Mi inchhiar zau te thusawi chu a ngaihnawm a, a bengvar thlak a, thlarau lam inbuatsaihna tha tak nen a kal kawp phei chuan thlarau nun a chawm bik hliah hliah thin. Fake account mah nise David Sailo a’n, “Kei chuan Pathian thu ka sawi dawnin a man ka pe thin” a tih te hi ril deuh asin.