Thuhma: He lehkhabu—‘Dr. C. Silvera Chanchin’ (Mizo Zinga Union Minister Ni Hmasa Ber leh Awm Chhun) tih, K Lungruala buatsaih hi kan nei tih rêng rêng ka lo hre pek lo a! April 9, 2016-a nat lâwkna pawh awm loa boral ta, Dr C. Silvera chanchin kimchang ziahna hi Mizo lehkhabu zínga rohlu tling niin ka hria. Dr. C. Silvera’n a dam laia ama chanchin a lo ziah lâwk te, a thian hnai zual leh amah hre chiangtu mi thenkhat, mi 28 thu ziakte leh a buatsaihtu, K Lungruala’n chipchiar taka Dr. C. Silvera chanchin a ziah bilh khâwmna lehkhabu hi ka hmuh rualin ka chhiar nghâl a. Ka khup thei ta rêng rêng lo mai a—zan khatah ka lehthal thak mai.

Lehkhabu Thlìrna Tawi: He lehkhabu hi kum 2018-a Dr. C. Silvera nupui Lallawmzuali tih chhuah (published) niin Gilzom Offset kut chhuak a ni. Phêk 242-a chhah, `250 man niin thu ziak mai bâkah thlalâk pawimawh leh hlu tak tak, phêk 20 lai (a phêk nambar pêk tel loh) bel tel a ni hian he lehkhabu hlutna hi a ti zual hle. Lehkhabu chhuahtu, Dr. C. Silvera nupui, Pi Lallawmzuali leh Pu K Lungruala ten thuhmahruai an ziak a; a bu tâwpah Lalrammawi Ngente lehkhabu a thlìrna a awm bawk. C. Chhuanvawra en dik (proof read) a ni.

Dr. C. Silvera’n ama chanchin: A pian leh mûrna atanga doctor a zir chhuah thleng (Australia-a a zir belh lehna chanchin tel loin) a lo ziah, phêk 30 awhin hmun hmasa a chang a; lehkhabu buatsaihtu K Lungruala’n a chanchin a ziahna/a chhuina, phêk 72 lai awh a chuang bawk a; a bengvàrthlâkin a hlu hle. A bâk hi chu mi 28-ten kil hrang hrang atanga Dr. C. Silvera an hriat dàn leh an hmuh dàn, thu ziak tawi tê tê-in a khat.

Thuhmahruai atanga a bung tàwp ber, lehkhabu thlìrna thleng hian a ngaihnawm tluan parh a; khup mai theih chî a ni lo. Dr. C. Silvera’n a zirna zin kawng bumboh dàn a ziah hi a ngaihnawm a; lung no deuh tána mit tui far fap fap theihna tùr a tam mai. (A inziak khawngaih thlâk a ni miah si lo a!) A tumruhna mawlh mai hi a ngaihsànawm tak zet a; ‘Ka va tluk lo êm!’ ti vawng vawng chunga chhiar zêl ngai chî a ni.

Mi hrang hrang, mi inang lo tak tak mi 28-te thu ziak tin mai hi a ngaihnawm tluan parh bawk. ‘Duh aiin a ziak tawi mah mah,’ tih tùr vek a ni. Dr. C. Silvera an hriat dàn ziaktute hming hi han tár lang ila: Lianzami, Darchhawna, Dr. H.L. Malsawma, R.K. Lalhluna, Upa T. Thangkima, Lalchuangliana, Lalrengpuia, Vanlalngaia, Dr. N. Pallai, Dr. Sangzuala Pachuau, Chalrosanga, Mahmuni, L.T. Muana, C. Lalsangliana, Vanlalhuma, |anpuii, Lalhmingthanga Colney, Wg. Cdr. J. Lalhmingliana, Lalbiakthanga Pachuau,Upa P.C. Ramêngzauva, Lalhmingliana (Hmingtea), Rev Lalrinmawia, K. Bawlliana, Upa C. Chawngdinga, C. Chhuanvawra, Rev. Dr. C.L. Hminga, Biaktluanga, Denghnuna te an ni.
Ngaihnawm Chu: Lunglei District-a Muallianpuia piang, a hnua Rotlang leh Thingfala pém, Pu Hlunthuama leh Pi Thangvungite fa 10 zínga a pasarihna, Silvera’n a hming a put chhan te; a zirna kawng chhukchho lutuk maite hi a va han ngaihnawmin mit tui a va ko tla nasa êm!

Rickshaw pawh la hmu loin, Thingfal atanga Serkawn Middle Vernacular (MV) a zawh hnu, Lunglei HS atanga Matric a zawh leh hnua Lunglei atanga ni li lai thanga Aizawl–Silchar–Bombay-a College kal tùra a zin kawng hautakzia leh khawhar thlâkzia te; Bombay-a college a kal laia a retheihzia te; a hnua Christian Medical College (CMC) Vellore-a doctor a zir laia a khawsak dàn retheih thlâkzia te; a naupan lai atanga a lo tum tawh, mi dang tanpui theihna nia a hriat, doctor zir chhuah ngei tuma a suala a sual dàn leh a tumruhziate hian Mizo, a bîkin thalaite hi min cho thar se a va duhawm êm!

A hnua Kristian Hospital, Serkawna doctor awm chhun nia buai êm êm chunga lãwm taka mi dang a tanpui thin thu, amah hre chiangtute sawite hian rilru a khawih tak zet a. Australia-a doctor a zir leh hnua Aizawl Dawrpuia CS Clinic a hawn laia a tlàwmngaihzia leh a hlâwk thin àwm lohzia te hi aw… A nupui Pi Lawmzuali rilru zauzia leh a pasal leh a fate enkawl mai bâka mikhual leh in léng chiau-au kawnga nu fakawm a nihzia te hi, he lehkhabu chhiartute tán chuan hmuh hmaih theih rual a ni lo.

Congress party zawmin politics khawvêlah a zuang lût a. India ram rorèlna in sánga roréltu (Member of Parliament) nia a thut theih dàn … mai ni lo, Mizo zínga Union Minister hmasa ber a nih theih dàn ropuizia te … MP za tam tak zínga ei ru lo mi pathum thlan chhuah zínga Mizo pa a’n tel thei ropuiziate hi, Mizo zawng zawng chhiar ve ngei atán ka va’n awt tak êm! Sawi vek ai chuan he lehkhabu hi chhiara hriata zir chî a ni.

MP ni ngawt loa Union Minister nia bangalow a’n luah tâk hnu thleng pawha Delhi-a Mizo awmte tán mai ni lo, zirlai leh khualzinte tána a tangkaizia leh an bangalow chu ‘Mizo Inpui’ tih mai theih tùr a nihziate hi aw… Ama’n a thiltih that zawng zawng hi a sawi lo a; a taka hmu a, hria a, tawngtuten an sawi a ni. Ani chu Mizo pa dik tak, mahni chanchin chu sawi loh, mi chanchin pawh sawi mai mai ngai lo a nihzia an sawite hian ani anga Zo pa dik tak kan tlèm tawhzia a tár lang chiang hle-in ka hria.

Politics khawvêla a chàm chhúng, MP leh Union Minister a nih laia Mizoram tána a thawh hlâwkzia te; vawiin thlenga kan la tangkaipui reng thil a rawn tih zawng zawng te; chéng vaibélchhe chuang fé sènga Mizoram tána hnà a rawn thawh zawng zawngte leh politics a chawlhsan hnua a khawsakna véng Tuikhuahtláng kohhran leh khawtláng tána a tangkai dàn te chu … he lehkhabuah hian a chuang vek a ni.

Ka rilrua chám tàwp thei lo leh min hneh êm êmtu chu: ‘Muallianpui naupang, rethei taka lehkha zir chho kha, doctor hna a thawh lai leh Delhi tlánga India ram rorèna sáng ber dawhkàn a kîl lai paw’n, a rilru a ngai reng a, Muallianpui, Rotlang, Thingfal, Lungleia a awm laia a tlàwm ang khán a tláwm reng tho a, Mizo pa dik tak a nihna a bo ngai chuang lo a, a rilru a danglam aih lo,’ tih hi a ni.

Tlipna: Lok Sabha leh Rajya Sabha-a MP a nihna leh Mizo zínga Union Minister hmasa ber leh la awm chhun, Dr. C. Silvera hi  mi tak tak, mi rinawm leh mi rin tlâk, mi belh tlâk, ram hmangaihtu dik tak a nihzia te; mi chapo ve ngai lo, ‘mi tanpuitu nih hi a nuam tih ber a ni ang a…’ tih hial theih tùr khawpa mi tlàwmngai a nihzia te; Union Health Minister ni chunga khawhar in lèn nikhuaa khuangpu thiam bîk a la nih rengna leh Union Industry Minister ni si, Delhi-a kal tùr leh Zorama hãw tùrte buaipuitu nih a hreh ngai lohzia te; a fate mai ni lo, Mizote tána ‘Pa dik tak’ a nihzia chanchin inziahna lehkhabu hi, a ngaihnawm a ni satliah lo a, a nun atanga zir tùr kuh tulna lehkhabu a ni. A bîk takin Mizo thalaite leh zirlaite tán, chhiar liam mai loa a zira zir tlâk lehkhabu a ni a; Mizo zawng zawngte tána zirlai bu a tling a, Mizo kan awm chhúnga lehkhabu ro tling a tling reng tawh ang. Chutiang lehkhabu chu a ni e.

    “Politics hi eizawnna tùr a ni lo a,mahni leh chhúngkua inhai vûrna tùr a ni hek lo, ram leh hnam siamna tùr a ni a. Thinlung leh tih tak zeta thawh a ngai a ni.” –Dr. C. Silvera