Zawhna: Ka pu, ka lei hmawrah hian var pep (durh) hi a awm a, a na thip hlar zel mai a. Lei han chhawn deuh phei chuan thak na/nuam hian a awm a, hei hi engvang nge ni ang? Enkawl dan emaw damdawi min chawh theih chuan ka lawm ngawt ang.

Chhanna: Kan lei (tongue) hi tihrawl hlawm, vun pan chi (mucous  membrane) a intuam chhuak a ni a. Thil tui leh tui lo hriatna (taste sense) atana organ pawimawh tak a ni a, chutihrualin ei tur thial nan te, ei tur lem nan te, kan tawng theih nan te leh ka chhung hawl fai nana organ tangkai leh pawimawh tak a ni. Chutiang avang chuan kan taksa peng hrang hrang zinga a che nasa ber a ni awm e.Chuvangin, ka chhung fel lo/thianghlim lo te (oral hygiene tha lo), ha rualrem lo te, pum lam fel lo vang te leh, eng emaw tlakchham, a bikin vitamin lam tlakchham avangtein durh leh/emaw pan a awm fo thin a ni.

 I lei hmawr adurh i rawn sawi hi taste buds vung (transient lingual papillitis an ti) vanga awm a nih duh hmel viau mai a, chutiang chu a na ve duh phian a; mahse, amahin hun eng emaw hnuah a reh veleh mai bawk thin. Zuk leh hmuam lam ti mi i ni em i sawi lo va. Kuhva ei nasat vang te, hato dan fel lo vang tea a awm fo avangin ha doctor hnenah in-check-tir a tha hle mai. Ka chhung fungal infection chi khat, oral thrush an tih mai vangin hetiang durh hi a awm thei bawk a, immunity hniam (immune compromised)-ah te a awm duh a, HIV+ te hian chutiang oral thrush chu an nei duh hle bawk.

Pum lam fel lo vangin a awm duh viau mai bawk a. A bik takin gastro-esophageal reflux disease (GERD) an tihmai, pum lama acid insiam rawn fawk let lehah hian lei durh a awm fo bawk. Digestion fel lo emaw chak tawk loah te a awm duh phian bawk. Vitamin B tlakchham vangte pawhin a awm thei. Engpawh nise, a durh laia hnawih atan chuan Orasore, Mucopain Hexigel etc eng emaw ber hian a na a tiziaawm a, thil han ei hmaa hnawih khan a tiziaawm. Dental Surgeon hnenah i ha leh ka chhung lo inentir thei la chu a tha ber.