Covid19 laka kan fimkhur dan a inchen lo. Hlauh dan a inang lo. Daktawr hoin total lockdown an rawt thar leh a, an demawm loh. A natna kai pawi theihzia leh mipui nawlpuia a darh vaiha a pawi dan tur an hria a ni. Total Lockdown duh lo leh a rawttu doctor ngei sawisel pawl pawh an awm. An demawm chuang loh ang. Duh loh chhan an nei a, hlau hleithei lo dinhmunah an ding a ni ang e.

“Hlauh vakin awmzia a nei lo a, covid19 nena len dun mai a tul zawk, living with covid19 kan zir mai a ngai tawh,” ti an awm ta mek.

Covid19 hian eng chen nge min chenchilh dawn a hriat loh reng a. Covid19 nunpui dan, he natna nena len dun dan pawh kan zir a la ngai ngei ang!

Mahse, mahse, tunah zawng la ni lul lo rawh se. Covid19 nena len dun loh dan tur hi la zawng teh ang u. A zuamawm loh em mai! A rapthlak dawn em mai!

A darh zau hle tawh tih chianna fak kan la nei lo. Darh huk thei dinhmunah kan ding deuh tawh erawh a ni mai thei. Ina khunghran zingah a vei an hmu tlat. Hmun hrana dah hran thlap, ina an haw hnu ni 3 vela an vei tih hriatchhuah an awm bawk. Ina awm mek, damlo, damdawi in pakhata dah luh zuai, Covid19 enkawlna hmuna sawn chhuah leh nghal, a vei tih hmuhchhuah leh si an awm e. Hengho hi natna an nei tih hmuhchhuah an nih hma hian khawi khawiah nge an len kual kan hre lo. An chenpuite zingah awfis leh hnaa kal pawh an awm mahna. In bul dawrah thil an lei mai thei asin! Thenawmah an dak lut mai thei a, an ina va leng lut leh thil va khawn pawh an awm mahna.

Kan chiai thar leh ta a nih hi. Chi-ai leh ang u, hei hian min beng harh tak teh se. Mi thenkhatin fimkhur thar mai duhtawk loin dem tur kan zawng a, a hrikai khawngaihthlak takte chu kan haw lo chauh a, an chhungkuain kan ngei deuh roh mai dawn! Ngawi teh u, a demawm zawk kan lo ni ve palh daih lo maw?

Hetiang hi a thleng thei tih hriain alawm doctor hoin, “Inkhung rih ang u, inhnaih lo ang u, hmai tuam ang u, chhuak tlem ang u, chil chhak lo ang u,” an tih lawm lawm reng ni! Thu kan awih em? Kan fimkhur em?

Khua a la tlai lo ang. Covid19 nena len dun hi la sawi lo teh ang u. Len dun loh dan i zawng hram hram rih ang u. Fimkhur lehzual hun chiah a ni. Inkharkhip reng thei kan ni lo ang. Hawn darh hun a la awm lo thei lo. Mahse tunah chuan insang mar ila, khawtuala a darh huk loh theih dan tur la ngaihtuah teh ang u. Covid19 nena len dun loh theih dan tur zawngin i la tang hram ang u. Inkharkhip tlat a tul pawhin lungawi takin aw! Dam phawt hi a tha zawk e kan tih tawh kha!

Mi dem hman a ni lo. Tumah inthinhrik pawh a ngai lo. Fimkhur mai a tawk. Fimkhurah fimkhur luat awm rih lo mai rawh se. Inhaw loin, inten loin, indem loin, Kristian takin le!

Nangmah i inhmangaih angin i vengte hmangaih rawh tih a nih kha. Mahni him nan, vengte him nan aw! Covid19 nena len dun loh dan i la zawng teh ang u. Kei zawng, ka la cho rih lo deuh a ni!