Zawhna: Tun hma deuh khan lik-awr chat tih vel kha sawi a awm thin a, khang kha engvanga awm nge? Effect lutuk a nei lo nge engtin nge in lo enkawl thin?

Chhanna: Lik-awr chat tih hi thil awm thei a ni meuh mai a, mahse a awm khat khawp thung. Mipa sazu hmawr tuamtu (foreskin) hi sazu hmawr lam, lik hnuai lamah a inthlung bet a, chumi chu lik-awr kan tih mai chu a ni a, a medical/english term chuan Frenulum an ti a. Foreskin zuk inthlunna lai a ni a, thisen zam pawh a awm a, chumi chu a lo chat palh anih chuan a thi ve duh viau thin. A thenah chuan a thi nasa deuh thei a, thui ngai te pawh an awm ve zauh zauh.

Lik-awr chat hi sex hman avanga awm thei angin kan ngai thin a, kan tawngkam hman ah pawh hian chutiang chuan kan sawi fo thin (fiamthu zahmawh lam hawiin an sawi mah). Amaherawhchu chutia chat awlsam ani hran lo. Mipa inhrawt (masturbate) nasat vang te in a awm thei a, tin, hmeichhe duh lo chung sex hman pui luih vang te in a awm thei bawk. Sazu lip tha thei lo (phimosis) emaw lip hnua foreskin let leh thei lo (paraphimosis) hi mipa naupang ah a common phian a. Nu emaw pa ten an fate sazu lip tha thei lo lip sak an tum luih vang te pawhin lik-awr chat hi a thleng ve thei bawk.

Zawhna piah lam deuh han sawi belh ta ila. Phimosis (mipa sazu inlip thei lo) hi naupangin an nei ve fo mai a, inlip thei lo tak tak a awm laiin a then chu inlip thei tho, mahse tih ngai loh vanga lip thei lo anga lang a awm bawk. Foreskin chhah lutuk vang te, an naupan lai atanga lip sak ngai loh vang te in a awm thei a. Chuvangin an naupang bual pah te hian nu emaw pa ten an ngam chin tawk anga an sazu lip sak zeuh zeuh hi a tha hle. Lip thei lo tak tak anih thung chuan zai a ngai ve thei a, circumcision (serh hmawr vun tan then) hmangin an zai dam ve thin bawk.

Tin, mipa lik lai (Glans penis) hi foreskin hian a khuh deuh ber a, an baw lo chhuak te, an serh tuihnang smegma inkhawl khawm hi a khang thei a, lik lai kha a khuh thin a, chumi chu lapaw huh a dim taka hruk fai a ngai thin a ni. Hei hi personal hygiene, mipa tam takin an hriat loh ani a, nu leh pa ten kan fate, an tleirawl chhoh atanga zirtir thin a tha hle.