Zonu chhul chhuak zinga fa hrin manhla, thu leh hla lama sulhnu ngah tak L Keivom chuan kar kalta Pathianni khan a khualzin kawng a lo zawh tawp ta a, a lei taksa chu pialleiah zal tawh mah se a sakhming erawh Zofate thinlungah a dai tawh ngai lo ang. Minute tin, darkar tin hmang tangkai a, ho lam taka hun khawhral ve ngai lo, chawl loa Zofate thatna tur ngaihtuah thintu chuan chatuan chawlhna ram min pansan ta vuah vuah mai. Zoram Khawvel thu leh hla buzawlah erawh varparh arsi angin a eng reng tawh ang.

L Keivom khan a lei khualzin chhung khan Zofate tan thil tha tam tak min hnutchhiah a. A taimakna te, thu leh hla lama a thawhhlawk zia te, a thahnemngaihna te, zo hnahthlak chi peng hrang hrang inunauna leh inpumkhatna duhtu a nihzia te, helam kawnga a thawhhlawk dan te kha a chhuanawm tak zet a, fak leh chawimawi a phu hliah hliah a ni. Thu leh hla lamah pawh L Keivom hi zofate zingah a thawh hlawk ber pawl a ni hial awm e. Thupui thur bing bik nei chuang loin ‘Zoram Khawvel’ bu 8 zet a tichhuak a, Zoram Khawvel Bu hmasa ber phei chu MAL Book of the Year-ah than a ni. Hengte bakah hian lehkhabu pathum, Bawktlang Thawnthu, Thuthlung Ram tih leh Pherzawl Titi tih te chu Lusei tawngin a chhuah bawk a. Tin, Hmar tawngin lehkhabu dang pasarih zet a tichhuak bawk. IFS atanga a pension hnuin Bible bu pumpui chu Hmar tawngin a let chhuak vek bawk a ni. 

In ropui chuan kil hrang hrang atang pawh belhchian a dawl angin L Keivom pawh kha a nun peng hrang hrang khan belhchian a dawl a, a nunah khan a tha lama entawn tur tam tak a awm a ni. L Keivom nuna entawn tlak tak pakhat chauh han tarlang ila, chu chu beidawng loa bei hram hram thin mi a nihna kha a ni. Keini anga mi beidawng hma chu nise Zoram khawvel hian L Keivom hi a hmelhriat hauh lo ang. Vawi tam matric a exam-a, subject dangah chuan mark hmu sang thin viau mah se Mathematics ber mai chu a su tlang thei tlat lo a, a fail leh nge nge thin. Matric fail chu hrehawm tiin zak viau thin mahse Mathematics ber mai chu a tan phurrit a ni a, a bulfumah a man lo laklawh a, Mathematics kulh bang chu a zu chim zo ngang lo a ni. Matric result a chhuah a piangin ama tawngkam takin a Mongolian hnar bil tak chu a hmu leh lurh lurh thin. 

Chhiarkawp (Mathematics) kulh bang a sut chim theih loh avanga hringnun khelmual atanga nek chhuah a ni leh mai thin chu tuar har a ti em em a, chengkawl tui tla ang maia pil hlen vang vang tur erawh chuan a indah phal chiah si lo. Chu ai pawha tuar har chu insiktute hmuhsitna leh diriamna chu a ni. Nula inah biak that a hlawh lo a, zawnglai fanu nei nu leh pate chuan college rap pha chinte chu an be tha zawk a, ani matric inbangliam hlei thei lo chu an hmu tuitang lo a ni. Chu a chhapah amah lo er ru em emtu tlangval pakhat chuan, “Dam chhunga matric tling zo lo tur chuan hla leh thawnthu te a phuah kur nguai mai lohin engnge a tih tak ang?” a han ti zauh mai a. Chu tawngkam mei nei tak chuan L Keivom thinlung chu tek angin a deng na a, a pa thi tawh hming chhalin chhia a chham a, a puan ven a sawi chhing a, Chhiarkawp kulh bang chu su chim a, pawng lak ngei tumin a rilru a siam thar leh ta a ni. 

Tichuan, thi leh thau pawlha tangin Chhiarkawp chu a hel nuai ta a, mi chawhchhuah sa chu a by-heart ta tlauh tlauh mai a ni. A lungthu kim nan Matric chu a exam leh ta a, Chhiarkawp chu ni hnuhnung berah an exam a. Chu ni a lo inher chhuah chuan a tiril a khur a, a lungphu a lo rang thar leh a, a zam a, a helhhawlh a, phurna leh huphurhnain a khat a ni ber e.

Zing dar 9 a ri a, exam hall-ah chuan a thu ta ran mai a, a lungphu chu a inthum rawn tlut tlut bawk a. Zawhna (Question paper) an han sem a, hlau leh khur chungin a han en dek dek a, a va mak em! A han en nawn leh thin a, a mumang lah si lo. A hmai a hup a, van Pathian hmaah a rukin a tawngtai a ni. Arithmetic leh Geometry atanga zawhna lo chhuakte chu a chhanna a by-heart sa vek a ni tlat mai. Chuta tang ringawt pawh chuan pass mark a hmu dawn tih chu ‘Ka vaibel’ tih tlukin a chiang a, Mathematics kulh bang sang tak chu a su chim thei dawn ta! Pass-na khawp a chhan hnu chuan zawhna dang, a chhanna a by-heart chian em em te pawh chu a chhang duh ta lo. Tichuan, a ruka hnehna hlado chham chungin Exam hall chu a chhuahsan ta a ni. 

L Keivom khan Chhiarkawp kulhpui su chim tur khan khati taka nasa khan bei ta lo se, anih loh vek pawhin vawi hnih khat a hlawhchham hnuah khan beidawngin bansan ta mai se IFS a ni hauh lo ang. Zoram khawvel pawhin kan hmelhriat hauh lo bawk ang. Beidawng loa bei hram hram thinte hian a tawpah hnehna an chang nge nge thin a ni tih hi L Keivom nun atang hian a chiang viau a ni.