Covid-19 avangin khawvel a buai a. Ram tinah ralkhel dar an khawng ri a. Mizoram pawh kan bâng chuang lo.

He natna hi inkaichhawn awlsam tak, thihpui theih a nih si avangin a manganthlak ru viau a. Mizoramah vei kan la awm loh avangin ram dang atanga a rawn luh loh a ngai a ni. Chutih lai chuan himna atan ram tin an inkharkhip tan a. Zin mi leh ram pawna awmte chu Mizoramah an lo haw ta chur chur mai bawk.

Lo haw lutte chu sawrkarin fimkhur dan tur a hrilh a. Mi hrang hrangin kan ngen bawk a. Mizo tam tak rilru ropuizia kan hmu ta chiah mai.

An fate, an chhungte an ngaih em em, khawsik leh hahchhiau chhete pawh nei miah lo chu chhungten an lo chibai duh lo a. Hmai tuamin an inhmachhawn a. Mahni inchhung lum luh ah chak tawh dawn nen, in chhung luh mai phalsak loin pawn lerah thawmhnaw an phelhtir a. Bual inah an khalh lut a, pindan falah an khung nghal a. Pawn an chhuahtir tawh lo. Sakeibaknei puka chaw pe ang maia fimkhurin ei leh in an inpe asin. Lung an tichhe zawk e! Nu ber mittui phei chu a hnam sawk mahna!

Engvangin nge hetia an tih? An chhungkua ringawtin tuar dawn se heti hian an ti kher lo mai thei. Tu thih ai pawh an inthihsak huam ang chu. A ruala dam loh vek pawh an ngam mahna! Mahse sawrkar thu an awih tlat. Engvang maw? Mizoram an hmangaih a. Mizo kan thih an hlau a. Chumi a thlen loh nan chhungkuain an tuar a nih chu! An va fakawm em! Salute!

A zin haw ve pawh ni lo, an chhungte lehzel pawh leng chhuak tam lo turin kan inngen a. Zuk zawm leh zel theia maw le!! An inkhawm lo a, an komiti lo a, an tawm tlat! Mi dangin an tuar an hlau a ni. An chhungkaw nun chu mi dang him nan an tichep ngam a nih chu! Salute again!

Chutih lai chuan Bible-in ‘mi mawl tlangval zingah chuan hriatna nei lo tlangval ka hmu a” a tih aia mawl an lo awm a nih chu!! Zin haw zingah, mipui leh sawrkar ngenna hre reng, covid 19 inkaichhawnna pawh hre vek, a hlauhawm dan pawh hre si, leng vuk vuk zuk awm a! Mahni zina ram zepte pawh an awm an tih chu maw le!! Intihuaisen tak leh inti ring thuk ang ziazangin an tawng a. An leng a, an vak a, an ri phar phar a nih chu! Thuawih loh ngam hi ropuiin an hria a ni chek ang a!!

Pathianin min veng ang a, an ni pawh veng ngei se, thil tha lo a thleng lo hram ang chu maw! Mahse pawi a thlen vaih chuan, “Pawi zawng zawngah, aw, a pawi ber mai,” kan ti vawng vawng mai dawn asin!

Kan hriat loh vanga tisual thei kan ni. Hre lo na na na chu hauh hrep bak tih theih a vang. Hriat loh hi sual chhuanlam atan erawh a rem chuang lo. Hre reng chunga kan sual leh luhlul mawl luih tlat avanga thil pawi a thlen hi chuan maw, miin min ngaihdam lo a nih pawhin Piangthar loah puh lo teh ang!

He natna hian engtia rei nge min tihbuai dawn a sawilawk theih loh e. Min luhchilh vaih chuan kan chhe hle ang. A natna kai lo tura inven hi kan tihtheih lian lutuk a ni.

Heti hian hian aw: 1. Tul hle lovah pawn chhuak lo ang u. Thih leh dam thil a nih loh chuan thenawmte inah pawh chuangkai lo ila. A tul hunah erawh fimkhur taka intanpui turin inpeih thung ang u.

2. Loh theih loh a nih ngawt loh chuan puipuinnaah tel loh tawp tur a ni.

3. A tul dan azirin kan hmangaih, kan duat em em kan chhungte pawh khung hran ngam tur a ni. ‘A khawngaihthlak’ tih lam aiin, kan zavaia kan khawngaihthlak loh dan tur zawn a pawimawh phawt e.

4. An sawi uar em em chu tumah inhnaih chilh loh a ni. “Social distancing - inhlat de daw” veka inkawm tur a ni. Feet 3 tal kan inkarah awm se an ti a, tunah chuan feet 6 tal an ti leh tawh! Inbengngawng biak vak vak mai tur, thawkchawpna khawl vuah pumpelh nan! Au deuh lung lung rih ang u, a dam hi han hauh phawt mai ila.

5. Kut fai taka sil reng tur a ni. Kut fai loin mit, la leh hnar khawih loh tur a ni.

6. Kan inkhawih tawm thinte hi tihfai fo tur a ni. Kawngkhar pawhna leh kailawn vawnbân chenin hruk fai tur. Hmanraw hman chhawn theih chi reng reng tithianghlim zel ila, khawih pawlh tam loh tur a ni.

7. Kan hnathawhna hmun theuh tifai tha zel ila. Khawlaiah chil chhak lo la, hnap hnit suh.

8. Fimkhur takin khuh la, hahchhiau ang che. Tawng per sur sir bawk suh.

Mi dang tan malsawmna ni turin inkau vek bawk ila. Kan buai zui chin tur a hriat loh e.

Kohhran upaten lungchhe takin inkhawm rih lo mai an rel a. Biak ina inkhawm loh meuh han rel chu a harsa asin!

Mahse ram tan, khawtlang tan, kan him nan heti hian an rel a ngai. Kohhran hi ram tan hian an lo va inhuam thui em! Mahse, an rel chhan, him se an duhho lah chu kan la vak chhuak dul dul mai si a le! Hui ham! Upaten ram an hmangaih tluka i hmngaih ve zo lo a nih pawhin nangmah leh mi dang him nan tal tawm rih teh, ka thian!

Covid19 i hlau ve lo a nih pawhin nangmah vanga miin an tawrh a rem ngang lo a ni.