William Shakespeare-a thawnthu Macbeth hi mi thenkhat chuan kan chhiar tawh mai thei a, mi tam zawk chuan kan la chhiar awm lo ve. He thawnthuah hian hringnun zirlai pawimawh tak a inphum a, duhamna te, itsikna te, mahni hmasialna te hian nun nawmna tak tak min thlen lo a. Chu ahnehin min tilungngaitu, tah leh rumna min thlentu mai a ni zawk tih hi he thawnthu atang hian a lang chiang viau a ni.

Sipai General huaisen pahnih- Macbeth leh Bangquo te chu Scotland ram tana ral dovin an ram mu a. An rammutnaah chuan an hlawhtling hle a, hnehna an chang a, an hmelmate chu an tichimit vek a ni. Hnehna hlado chham chunga an hawn khawngah chuan dawithiam ramhuai pitar pathum, khabe hmul nei, mak taka inchei an tawk a. Pitar te chuan Macbeth chu Glamis khaw lal leh Cawdar khaw lal a la nih tur thu te, chumi hnuah Scotland ram pum puia lal ber a la nih tur thu te an hrilh a, a thianpa Bangquo pawh chu lal ni lo mah se a thlahte atangin Scotland lal tur an la pian tur thu te an hrilh bawk a.

Scotland lal Duncan-a chuan a pasaltha ram mu hlawhtlingte chu ropui takin a lo hmuak a, Macbeth chu Glamis khua leh Cowdar khaw lal nihna pawh a pe ta mai a, dawithiam pitar te hrilhlawkna pahnih chu a thleng dik ta! Macbeth-a duhamna chu a sosang zel a, Scotland ram pumpuia lal nih pawh a beisei ta zel mai.

Scotland lal chuan Macbeth chu chu mi ni la la chuan a chenna inah tlawh a tum a, indonaa hnehna a chan avanga lawmpui nan zanriah kilpui a tum a ni. Macbeth chu rang takin a tlan haw thuai a, a nupui Lady Macbeth hnenah chuan thil awmzia a hrilh ta vek a. Kawng laka dawithiam pitar thusawi te, Scotland lalin Glamis khaw lal leh Cawdar khaw lal nihna a pek thu te, lalin an inah chawhlui kil a tum thu te chu a hrilh ta a.

Lady Macbeth-in chutiang thu a hriat chuan a lawm hle a, a pasal chu ruahmanna verther tak a siampui ta a. Scotland lal chu chumi zan la la chuan a pasal chuan a that ang a, Scotland lal an ni tawh mai dawn a ni. An mi thah tur lah chu zawn buai ngai loin an ina zanriah rawn ei tur a ni bawk si. Chutiang hun remchang chu bawhpelh hauh lo turin a pasal chu a fuih sauh sauh mai a ni. 

A nupui thurawn ang chuan Macbeth chuan lal Duncan-a chu a that ta a, pawi rapthlak tak a khawih ta. Kan ramah pawh hian mipate bawhchhiatna phenah hian hmeichhiate hi an lo awm ru ve reng mai thei a sin. Hmeichhe huamhap, duh ngah, awh ngah em em, khawsak tisang bawk site avanga mipa eiru hi an tam fu mai thei a sin.  

Duncan-a thah hnu chuan Macbeth chu Scotland ram lal a ni ta a, a duhthusam a thleng kim ta. A hlim zui zel em le? A duhthusam a thleng ta cheng a, a hlim zui hauh lo mai. Zanah a mu thei lo a, mumang rapthlak tak tak a nei ta fo mai. A chang chuan mi a ang maiin a awm a, a phun leh bul bul thin. A khawnbawlte hmaah pawh a mualpho ta fo mai. Mi naran a nih lai chuan a hlim a, a chaw ei a tui a, zanah tui takin a mu thin. Lal a nih hnu, thil engkim a neih hnuah erawh a rilru a hahchawl lo a, thlamuannain an tinsan a, a chaw ei a tui lo a, zanah thlanfimin a bual a, khuan hmasa khuan thlengin a meng kar tawh mai a ni. Dik lo taka thil ti a, dik lo taka mi chan ai chhuhsaktute hian an hlimpui dawn emaw an ti a, a teuh loh mai. Dik lo taka an khawlkhawm chu a tam zawh poh leh a delh a rit ting mai a ni.

Macbeth chuan tumah a ring zo tawh lo a, amah a dik loh miau avangin mi zawng zawng chu rinhlehna mitin a en tawh a, mite chuan a chanchin chu an sawi ru sep sep niin a hria a, a khawnbawl upa te chuan amah chu an phiar ru tlatin a hre bawk a, nun ralmuang a nei thei tawh lo a ni. A tawpah a hlauh ang ngeiin a khawnbawl upate chuan an phatsan a, an nupain mualpho takin an thi dun ta a ni.

Kan nawmsakna tur nia kan ngaihte hi a tawpa min tilungngaitu a ni fo thin. Sum leh pai hian hlimna min pek theih kan ring a, sum hmuhna tur a nih phawt chuan tih hreh kan nei lo a, pawisak lah kan nei hek lo. Vantlang ngaiha eizawnna thianghlim lo leh dan kalha eizawnna pawh nise kan thlah phal lo a, kan fak mawi lui ngar ngar a, insawithiam lamah kan ram tang thin. 

Dik taka ti thinte chu an mut a tui a, an chaw ei a tui a, an hrisel nge nge thin. Dik lo taka titute chu awh awmin lang thin mah se an tlu sawp leh mai thin.