Ramtuk thla a lo de a, thingtlang pain rampui a han tu darh a, thal nisain vahchap a em ro ut a, vau thla chawhnu lamah lo an hal a, an lo hal khuk chuan par a chhuak nguk nguk a, mei alh chu in dung chen chenin boruakah a in hlap chhoh zuai zuai a, boruak sang takah muchhiain meivap a chhaih zoh zoh a, pa lung a awi veng veng.

Kangvarah nu berin thlai chi a thlak a, chung te chu kar loah a lo chawr a. Tomir thla ruah thimpuiin lei a nan zawp a, an thlai tiak te chu a chawr no help help a, an lungawi veng veng mai thin.

Hnuhpui kawih a lo hun a, buh te chu nguntang chen vel a lo ni a. Huihchhuk thli a lo thaw hiau hiau a, buh to tir chu a chhem leng siau siau a, kel chal an tlan del del a. Sawntlung pawnga dingin thlifim an han dawng a, chumi pah chuan tuithawla tui chu an han khiat khalh khalh a, an lungawi hliah hliah mai.

Chhun chaw fak a lo hun a, nuin a maian sih thar chu a han bai a. Samtawk, bawkbawn, hmarchapui leh bawrhsaiabe a han thlak a, changel hnahah an han buh hnuk mai a, a khu vang vang a, puar el euhin chaw an fak thin. An chaw fak zo chu tlam tlaitlanah ke hlang thain an han thu a, thilfim an dawng heuh heuh a, mei an tan a, an mei zuk khuk chu an tukhumah thlifimin a beng liam vat vat a, an lungawi veng veng mai.

Favang ni a lo her chhuak a, buh te chu an vui eng tek tuk hlawm a. Buh seng ni chuan lawm an ruai a, arpui tui lai leh vawksa rep an chhum pawlh a, puar el euhin chaw an fak thin. Chhun chawfak chawlh lai chuan pa ber chuan hruiha buh vum hnur mai chu sisepin a zap fai hauh hauh a, engmah a sawi lo na a, a lungawi tih a hmelah a lang reng mai.

Lal pian ni champha a lo hnai a, ruam tinah Tlaizawng a lo par vul chuk a, a partlanin khawivah leh chunglum sirva an ri mam mam a. Chung khawvel mawina te chu thir hman lo lekin buh sengin an hman hlel a. Lal pian hun thlen hmain an buh thar te chu zemah an khung kim hman lo ang tih mawlh an hlau a.

Mas hmaa an buh thar te an seng fel hman chuan an hlim em em a, engthawlin mas an hmang thin. Mas an hmang zo va, kum a lo thar a. Kum thar tir thlasik ni dul hnek hnuaiah chuan van chu a lang thiang kuk mai a. Bengah mas lawman hla leh khuang ri la thangkhawk reih reih karah thingtlang pa chuan lungawi takin ram pui tudai turin ring thar mual a pan leh thin.

Mihring hian kan duh leh zawn ber chu lungawina a ni. Chu lungawina chu hna sang leh ropui chelh vanga neih ngawt theih a ni lo va, RCC building ropui tak neih vanga chan ngawt theih lah a ni hek lo. Sawrkar hnathawk, tih tur leh tih loh tur chin bithiah fel tak hnuaia hnathawk tan hlei hlei hian mahni hnaa lungawina, sapin job satisfaction an tih ang hi neih a har phian mai thei. Mahni kutkawiha eizawng thingtlang pa chuan chu lungawi veng veng na chu kumtluanin a chang mawlh mawlh thin.