SUICIDE – A VEN THEIH ASIN “Ka thianpa hi intihhlum a tum a, engtin nge ka lo puih dawn?” tiin mi changkang thenkhatin min rawn zawt thin. Rilru hah, thinlung na, dam thlahlel lo, thih daih chak kan hriat hian Psychiatrist hnena kaltir thuai a chakawm thin. Psychiatrist an pan vek duh si lo a, pan duh paw’n an pan vek thei hek lo a, Psychiatrist tlemte kan neihte tan buaipui vek sen pawh an ni hek lo ang. I lo pui ve thei reng alawm! La thutak hle rawh: Mi thenkhat chuan, ‘Mahni inthah tumna sawi chhuak pung pungin an ti tak tak ngam ngai lo,’ an ti thin. Mahni inthat zaa 75 te hian an thih hma engemaw hun lai khan an lo sawi chhuakin a hriat theihna tur thil eng emaw an lo lantir daih tawh. Miin inthah mai a duh thu a sawi chuan ngaih thutak hle tur a ni. Ngaihsak hle ang che. An at vang leh an nep bik vang a ni lo. An phur hi a rit em a, an zo lo a ni zawk. Harsatna an tawk a, hmachhawn ngaihna dang an hre lo a ni e. Nangma buk lung lo khaisak suh. A harsatna chu i tan a nep a ni mai thei a, a ho i ti a ni mai thei. I ngaihdan ai chuan a tuartu a tihnat leh tihhrehawm dan kha a pawimawh zawk tih hria ang che. Tanpuitu tur an au e: Enganga thih châk leh thih duh pawh hian nun chakna chhe te tal chu an la nei vek. Chu vanga tun thlenga la dam an ni zawk. An tawrhna tihtawp nana thih daih an duh rualin hlim taka dam theih ni se an la duh zawk. Thih chak thu an sawi te, intihhlum an tumte hi tanpuitu tur an auhna a ni e. Tanpuitu I ni ve dawn lawm ni? Chet thuai a ngai: Mahni inthah tumte venna hi muangchan chi a ni lo. Hriat veleha chet chi a ni. Inngaihthah rei hian inchhirna a thlen thei. Emergency a ni e! Lo ngaithla ringawt rawh: An mamawh ber fo chu ngaithlatu a ni. An harsatna te, an rit phurh te, an tawrhna te han bun chhuah hawk hawk an mamawh a. ‘Sawi tur dik’ i lo hriat ve a ngai lova, kawm thiam a pawimawh hek lo. A duh duh sawi se, lo ngaithla ringawt rawh. Zilh tum kher suh: “I va han nep em em ve, chutiang mai maite chu theihnghih daih rawh..ngaihzawng dang neihsan daih la a ni mai lawm..i va han sual zawk ve le..I piangthar na nge..hremhmunah i kal dawn asin” ti tein lo zilh duh suh. Nep an intih sa avanga thih duh an ni a, an theihnghilh theih loh avanga theihnghilh dan kawng an zawnna a ni a, sual an intih avanga dam tlak lova inngaia Pathian pawh zah zo lo leh hremhmun pawh hlau thei tawh lo an ni sa fo asin! Zilhtu a mamawh lo.Dawhthei tak, lainat tak leh a nihna anga pawmtu a mamawh ber fo. Zawt hreh suh: Rilru hah, lungngaia kun mekte hi, “Inthah hial i duh mai elo?” tih hi kan inzawt ngam lo fo. Zawt hreh suh.I zawh rawih hian i ngaihsak a, i ngai thutak a, a harsatna tak tak leh a rilru puthmang dik tak i hriatpui duh tih a tilang zawk a, a tan a hahdamthlak zawk. Mahse pui duh tak tak chuang si lova ‘in-kal-pelh-pah zawhna’ chi a ni lo thung. A chhan dan che azirin zawh belh zel ang che. A tum ruh viaua I hria a nih chuan police leh mi dang pawh rawih hreh loh tur. A thinrim mai thei. Thinrim pawh nise a nunna i chhan miau chuan i la lawm zawk ang a, amah pawh a lawm zawk ang. Malin awmtir suh: A bulah awm tlat ang che. A hmanraw neih tawh lak bo sak la, mahni intihnat theihna hmanraw dang pawh dah bo ang che. Thlahthlam suh aw. Khawvelah hian mal a inti sa em em a, a bulah tumah an awm peih lo tein a ring a. I awm peih a, i pui duh a, dam se i duh tih a hriat hi a tan a tha.Ngaihsak reng ang che. Thuruk a awm thei lo: Tawrhna leh zahna nasa lehzual a pumpelh duhna chuan, ‘Tumah hrilh suh’ a ti mai thei che a, mahse nun a la thlakhlelhna chuan a thil tum chu nang ngei pawh a hrilh ve thung zawk che a ni tih hrethiam la. Nangmah maia i hmachhawn zo dawn lo a nih chuan ama hrilh chungin puitu tur mi dang pun ve rawh. Mi thiam an awm e: I theih bak piah lamah a aia thui leh awmze nei zawka pui theitu an la awm ngei ang. Zawng ngei ang che u. An hreh a, an zak a, an duh lo fo thin. Zaidam tak, dawhthei taka nawr an tul fo. Engpawh nise heng zawng zawngah hian amah i duhsak a ni tih hre zel rawh se. Damna kawng – mi tin mawhphurhna: Kan bul vela mite rilru damna hi kan mawhphurhna a ni ve vek asin! Kan thian te, kan chhung te, kan thawhpui te, kan ngaihzawngte leh kan bula mi tupawh mai hi i inngaihsak thar teh ang u. Inchik ila, inngaihven ila, inkawmngeih ila, i in-care thar teh ang u. Hlim taka rei zawk kan nunho theih nan i inhmangaih thar teh ang u hmiang maw le!