Dr Hrekima Titi

Mahni tan Pawh Le!

Dr. C. Lalhrekima - Aug 09, 2014

Mahni tan Pawh Le!

Ka mi ngaihsan tak mai, Pachhunga College Principal Dr. Tawnenga fapate nen hian badminton kan khel thin a. Pu Tawnenga nupui, lecturer ropui tak Pi Rinpuii chuan inkhelh kan ngaihpawimawhzia chu nui chungin min fiam nan a hmang a. Inkhelh a hun tawh chuan an fapa chuan engmah dang a ngaihsak theih tawh loh thu min hrilh a. Chu thu tho chu ka nupui an hla bawk a ni! Fiamthu titak deuhin ka’n hrilhfiah ta a. Heti hian: Hun dang zawng zawngah hian mi dang tan kan thawk a, chhungkaw tan kan bei a, sawrkar hna kan thawk a, khawtlang leh kohhran tan kan che ve bawk a, he ‘darkar khat leh a chanve’ hi chu kan tan kan hmang ve alawm! Buai reng rengin hun hi kan hmang hlawm a nih hi. Mahse, kan buaina hi mi tan a ni nasa khawp. Chhungkaw tan kan theihtawp kan chhuah a, sawrkar tan thahnem kan ngai a, nupui fanau tan kan thlantui a far a, khawtlang tan kan tlaivar a, kohhran tan kan inpe nasa hlawm si! Mi inneih kan lawmpui a, mi khawhar kan hnem a, mi damlo kan kan a. Nupui/pasalte lungawi lo kan thlem a, fate tap kan chhaih hlim a, an damlo kan menpui a, pizawn/puzawnte kan tlawh a. Moin a pi lawm zawnga awm loh hlauin a tlawn thul! Hnatlanga chhuah a ngai a, mahni ina kan thawh that peih loh pawh mi tan chuan kan thawk leh turh turh a. Mi tan hian kan va buai hlawm tak em! Mi dang tana nun hi a tha khawp mai. Kan Lalpa min zirtirna pawh a ni e. Theihtawpin mi tana tangkai zel kan tum tur a ni. Mahse, mi dang hlim loh hlau reng renga mahni hlimna pawh ngaihsak hleithei loa nun chau ta site ka hmu thin! Mahni indah hniam, mahni induat thiam lo, mahni aia mi dang dah lal thin, mahni hlutna ngaihtuah thiam lo, mahni nawmna ngaihthah thaka mi dang ngaichang reng ringawtte nun hi a hlimawm famkim lo fo. Mahni intheihnghilh te, mahni indahhniamte hi a Pathian thu riauin kan hria a, a dik pawh a dik a ni thei e. Mahni aia mi dang tha zawka ruat tura zirtirte pawh kan ni reng a. Mahni inhmuhsit ngawt erawh hi chu a Pathian thu chuang lo. Mahni inkhawngaihna leh nep bik nia inhriatna a hring a, nun a tichau a, nun a hlim thei lo. Nun chau leh hlim lo chu mi tan a tangkai thei chuang si lo. Hahdam zawka mi tana tangkai rei dan zawk a awm. Mi dang tana hun kan hman karah hian mahni tan hun inpek ve zeuh tur. Mi dang kan duat lai hian mahni pawh induat ve hret tur. Mi dang tihchak kan tum lai hian mahni pawh intihchak ve tum tur. Mi nawmna kan buaipui lai hian mahni nawmna pawh zawn ve thin tur. Mi dang kan ngaihsak lutukna avanga mahni nawmna kan ngaihtuah loh fo avang hian kan kulcho fo thin asin! Mahni nuam tihzawng han tih ve nana hun inpek ve te, chak zawng leh duh zawng tak atana sum han hman ve zauhte hian nun a tihlim ve thin. Chu chuan chakna min pe a, rilru hah rimtawng tur lakah te, taksa chau tur lakahte min veng thei. Mi dang tan kan thawk nasa leh zual thei dawn zawk alawm. Hahdam zawk leh tlo zawka mi dang tana kan tangkai theih nan mahni tan pawh hun inpe ve ang u. Mi dang tana nung ngawt bik loin mahni tan pawh le!
Share now