Hnam intodelh nih te, ram hausa nih te, ram hmasawn nih te hi tu nge châk lo ang? Keini Mizote pawh hian hmasawn kan châk a, changkan kan duh a, chumi duh leh thlahlel chuan vote kan thlak a, ram hruaitu turte kan thlang bawk thin. Mahse, vawiin thleng hi chuan hmasawnna tluantling erawh kan la nei hlei thei lo. Raltiang ram ngaiin kan la kur reng mai a nih hi. 

Hmasawnna kawng dik zawh tur leh ei leh bara intodelh tur hian kan sawrkar hrawn mek leh sawrkarna chelh tawh zawng zawng te khan hma an la tawk lo ti dawn ila, an phak ang tawk chuan hma chu an la theuh mai. PC sawrkarin Garden Colony an kalpui a, Congress sawrkarin NLUP an kalpui a, an sawrkar hnuhnun zawkah khan NLUP tha mi an duang chhuak leh a, chumi hnuah NEDP-ah min pakaipui leh a, NLUP phei chu ‘Pathian lamtang program’ ti hialin an sawi a nih kha. MNF-in an sawrkar hmasakin MIP (Mizoram Intodelh Project) an duang chhuak a, kum thum chhunga ei leh bara intodelhtir min tum a, chu erawh a hlawhtling ta chiah lo. Tunah SEDP hmanga intodelhna kawng min zawhpui an tum leh mek a. Eng tak ang maw? Tun thleng hi chuan heng intodelhna project ropui tak takte hian ram ropui min la thlen lo chu a nih hi. Engnge a chhan ni ang le?

India ramah Kristian hlang deuhthaw awmna state awmchhun kan ni a, ramthim kan vei em em a, missionary sang tel kan tir chhuak mek bawk a, inkhawm kan ngai pawimawh a, kar khatah zan awl awm mang loin kan inkhawm a, Pathianniah ngat phei chuan tum thum ngawt kan inkhawm a, keini tluka inkhawm ngai pawimawh leh Pathian hnena thil pek uar hi khawvel ram dangah awm ve tak maw? Heti khawpa amah ngai pawimawh ta chu Pathian pawh hian mal mi han sawm ve deuh se, India ram state-a hausa ber leh intodelh berah te mi han siam ve se, ringlote pawhin, ‘Mizote Pathian hi Pathian dik a ni, Kristian sakhua hi sakhaw dik a ni’ an tih tur khawpin malsawmnain min han vur ruih ruih se, India ramah kristiannain ram a la duai duai mai tur. 

Heti chung hian Kristian pawh ni hlei lo Punjab te, Haryana te, Gujarat te, Maharashtra etc. te chu an thang uak uak a, ei leh barah an intodelh a, an buh thar chhuahte chu keini Mizo kristiante inhnangfakna ber a ni a, Pathian rorel danah hian fair lo a awm em ni ang? Pathian hi kan ring tawk lo ti dawn ila, a hming kan lam zingin a hnena thil pek erawh kan uar viau tho si a, Pathian kan ring lo tih tur chu kan ni chiah lo. Sudden Muanga tih dan takin Pathian kan rinna hi a chak leh lutuk ang a, Pathian thiltihtheihna hi a thlawhkhum zawk em ni dawn le?
    A hming kan lam zin tehlul nen, a hnena thil pek kan uar tehlul nen, inkhawm kan uar tehlul nen, work camp kan uar tehlul nen, missionary kan tirh chhuak hnem tehlul nen, heti chung pawha Pathianin mal min sawm tha duh der lo mai leh, India rama state pachhe ber kan ni kumkhua ringawt mai hi chhan a awm tur a ni. Kan inkhawm nasat ang hu te, kan pianthar nasat ang hu te hian Pathian hi kan chungah a lawm tak tak lo a ni ang a? A thu awihte tan chuan malsawmna hi a ui teh tung lo tawp ang. Amah Pathian ngeiin, “Ka thu in awih chuan mi rethei reng reng in awm hauh lo ang,” (Deut.15:5) a ti miau a lawm. Hetih lai hian Mizoramah mi rethei kan tam hle mai si a, mi rethei aia hnuaihnung zawk, BPL (Below Poverty Line) chhungkua pawh a sing tel kan awm mek bawk. Kan intodelhna tur project ropui tak tak te, kan hydel project ropui tak tak te pawh tun thlengin hlawhtling a rawm a la awm mang lo. Pathian thu kan awih tak tak loh vang a ni mai lo’ng law? A chhan pawh Pathian chuan a thu kan awih loh chuan, “In lam leh ram lamah chhiatna in tawk ang. Lalpa chuan in em leh in chawthleng a leih buaksak ang che u. …Buhbal thuah te, ran vulh thuah te in hmuingil lo vang. In thil tih apiangah in hlawhchham ang,” (Deut. 28:16-19) a ti tlat alawm.

Ran vulh lamah pawh kan tluang hlei thei lo. NLUP hnuaia bawng chi tha mi kan chawk luhte kha kan thatpui chuang lo. MIP hnuaia vawk note supply zozaite kha a thi zo deuh vek a nih kha. Hman ni lawkah ASF natna vangin Mizoram hmun hrang hrangah vawk sing tel a thi bawk. ‘In ranvulhte a tih hmuingilsak ang che u’ tih Pathian thu nen chuan a kar a hla khawp mai.

Lei bat thu-ah pawh Pathian chuan a thu kan awih phawt chuan, “Hnam tam tak in puktir ang a, nangni chuan inpuk ve lo ang,” a ti a. Tunah hian eng hnam mahin pawisa min puksak lo. Puktir tur pawh kan nei bawk lo. Puktir chu sawi loh, keini zawk hian central atang te, world bank atang te, NABARD etc. atang te in sum kan puk awlh awlh a, kan leiba tlingkhawm ringawt pawh cheng vaibelchhe sing a chuang ta! Heng kan leiba zozai hi Pathian thu kan awih loh vang a ni mai lo’ng maw? A thu kan awih loh chuan, “Tangka an puktir ang che u a, nangni chuan puktir tur tangka in nei ve lo ang,” (Deut. 28:44) a ti tlat alawm.

Pathian thikthu tichhe tawk vel, a malsawmna dawng lo tawk vel, a anchhia tawng baw tawk vel hian kan lo kristian deuh mai mai te hi a ni ang a?