March thla tir kan lo thleng leh ta. Thal lai a ni a, thlasik khaw vawt a liam tan a, nipui a thaw tan mek bawk a. Chutianga, hunbi inthen lai leh sik leh sa inthlak chhoh lai a nih avang chuan tun ang hun hi kum khat chhunga hun pawimawh tak a ni ve hrim hrim. Kan pi pute hun laia lo neih bak eizawnna dang an neih loh lai phei kha chuan chap pho char hun lai hi a pawimawh hle a, kumthar a an lo neih tur an thlir lawk a, beiseina sang tak nena hmalam an thlir lai a ni a. Chutiang karah chuan hlim takin Luseiho phei chuan kut ropui ber Chapchar kut an hmang thin.
Tunlaia Chapchar kut kan hman dan hi mi tam tak chuan an duhkhawp lo a, hei aia hlimawm zawk leh huam zau zawka hman duh an awm a. Khualzinte hipna hmanrua atana hman duh an awm a, hlimhlawp lam hi uar zawk duh pawh an awm. Tuna kan hman danah hi chuan thusawi, zai leh lam, tlai lama concert a ni deuh mai a. Chapchar Kut awmzia leh a tobul lam ngaihtuah chang loin kan pungkhawm a, naupang atanga nutling patling thlengin Zo hnahthlak puan ze hrang hrang hmanga design thawmhnaw kan inbel a. Hnam dang rawn chhim ve thin te hian kan hnam thawmhnaw chi hrang hrang nalh zia hi ha hipin an sawi fo chuan a rinawm. Chutihlaiin, Chapchar Kut kan hman uar thar leh tak hnu hian kan Mizona thinlung kan chawktho thar zel niin a lang. Kan hnam zia chi hrang hrang - thawmhnaw, zai leh lam, etc., te kan uar thar zel hi a lawmawm khawp mai. Uar zel chi pawh a ni.
Mahse, Chapchar Kut chang ni lo, puipunna thil dang hrim hrim (concert, conference, inkhel en thlengin) ah hian zu in miten zu nam phelh phawlh a kal tur emaw an ti ziah mai hi an sim a hun tawh. Puipunna leh huau huau thil te hi zu rui leh zu in tel miah lo a buatsaih thin a hun tawh, a changkang vak tawh lo. Thalai zu in thinte hian hetiang huna zu in emaw zu ruih kher tur emaw a an ngai tlat hi ngaihdan thing tak a ni tih an hriat a hun tawh. Harh fim takin a hlim theih. Zu rui leh zu in pawr tak tak, buaina siam chak thin te hian puipunna leh huau huau thil buatsaih tlak lo hnamah min siam titih der tih hi kan ngaihtuah ngai. Hetiang kut ni vangthla leh puipun khawmna huna zu ruih hi a thing hle a ni tih hi kan inzirtir tak tak a ngai ta hle mai.
Zofate hi mahni a ro inrelin, zalen takin he ramah hian kan awm thin a. Chumi hnuah British sorkarin sipai chakna hmangin kan ram an run a, min hneh a, min awp zui ta a ni. Kum 1890 tun ang kum tir lamah hian Aizawl an luah tan a, chuta tang chuan Zoram pum mai hi an awp zui ta a. India ram an chhuah san rualin kan ram chu India ramah rin luh an ni a, kan zalenna kan hloh zui zel a, India in min awp zui ta a ni. Hnam lian zawk (sorkar chak zawk) awp beh zingah hian mahni hnam nihna hloh thak khawpin a bo pil theih. Chutiang chu hmarchhak hnam thenkhat pawh hi an ni. Vai hming an pu a, vai sakhua an zui a, vai hnam zia an la na nasa em em a, vai tawng thlengin tawng tuallengah an hmang. Awp beh nih inhre miah loin an awm a, mahni a ro inrel chakna an nei tawh lo a, an rilru thlenga chim ral an nih tawh avangin an vai em em mai a ni.
Hmarchhak hnam zingah hian vaihoin an chiahpiah loh ber kan ni a, kan hnam kan la hmangaih em em a, kan hnam himna a derthawnga kan hriat chuan party kan sawi lo a, kohhran kan thliar lo a, a hnam pumin kan so bulh bulh thin a ni. Chutiang taka thangthar zelte pawhin hnam rilru kan put ngheh bur theihna chhan chu kan hnam hruaitu hmasa te - kohhran hruaitute, politician-te leh lehkhathiam/kamding hmasa te khan kan hnam himna tur hi an lo vei em vang a ni. Kan chhehvela mite ang lo taka chimral hlauhna an lo nei tlat te kha tun thlenga hnam dangten min la chimpil loh chhan hi a ni. Hmasang atanga kan pi puten an hlauh ngai loh, an duh hun huna an run a, sala an man thin Chakma te, Tuikukte pawh hi kan mi hmasate khan min la chim buai thei tih an hria a, mipui pawhin kan tan hling an ni thei tih hriain ram dang mi enin kan en zui ta zel a nih hi. Hetianga hnam bil rilru (duh leh thliarkar rilru ti rawh se) kan pu tlat hi kan la himna a ni.
Chutianga hnam hmangaihna thinlung chawkthotu langsar ber mai chu 1960 chho a hnam movement lo chhuak kha a ni. India hnuaia kan awm hnu hian kan hnam hi kan him lo zel a, India leh Assam sorkar hian min en hrang a, falak enin min en a. Mautam tampui a lo thleng a, Assam sorkarin Mizo mipui tam tuar a enkawl danah mipui an lawm lo hle a. Chutianga lungawi lohna inmun chho zel chuan lehkhathiam leh thalai zingah hnam hmangaihna thinlung a chawktho ta a. Kan hnam chanvo dik tak chu tuma awp beh loh a zalen taka mahni a ro inrel kha a ni tih te kha thalaiten an han tuipui chho a.
Vai tlimpui kara awm reng hi kan chanvo leh kan nihna tur dik tak a ni dawn lo, tih thinlung an pu na tial tial a. Tichuan, March 1, 1966 khan khawvel hriatah Zoramin zalenna a puang ta thut mai a. India atanga inlak hran a, tu thuhnuaiah mah awm lo turin, mahnia ro inrel sorkar din tumin hnam pasalthaten zalenna an puang a, silai nen zalenna an sual ta chiam mai a nih kha. Khatih laia zalenna sual kha Mizo mipui tam berin an thlawp awm e. Hun a kal deuh hnuah kha chuan thlawptu pawh an tlem tial tial tih a lang. Engpawhnise, a tirah kha chuan lehkhathiam chin te, pa rawnkai chin te, thalai rualten an thlawp mai a ni lo a, an tel ve a ni. Chuvangin, zalenna sual tirh kha chuan hnam pum huapa beihpui a tling a tih theih.
Mahni (hnam) nihna chanvo dik tak zalenna sual ngam te hian ngaihsan an hlawh thin. An hlawhchham a nih pawhin zalenna sualtute hian an hnampui te chawimawh leh zah an hlawh thin. Zalenna sual avanga nunna chan te phei chu eng hnam mah hian an theihnghilh ngai lo, keini pawh hian politics khelh nan hmang loin Martar-te chawimawi hi kan tih tur a ni. Chutiang rilru chu kan put thar a tha khawp mai. American-hoten British lak atangin zalenna an sual a, William Walace-a hoin Scottish-hoin zalenna an sual a, Mahatma Gandhi hoin vaiho pawhin an sual a, Naga-ho pawhin an sual a, Dalai Lama pawh Tibetan ho tan a sual mek a - hnam tana zalenna sual hi thil namen a ni lo. Hengho hi kan ngaihsan chuan Zofate zalenna sualtu kan hnam pasalthate kha kan ngaihsan ngei ngei a ngai.
Chutiang chu a nih avangin March 1 a lo thlen hian rilru a thar fo thin. Kumin hian March 1 tak hi Chapchar Kut a lo ni hlauh mai a, zalenna sual ni leh Kut ni a inang chiah mai hi thil thleng zen zen lo a ni. Kut lawmna pui ber Lammual a neihah chief minister-in thu a sawi a. Tuna a rilru put hmang chu kan hre lo a, tunhmaa zalenna sualtu a lo nih tawh avang tal pawhin a sawi tel ngei ngei tura ngaih he Ni bik (zalenna sual tan ni) chungchang tawngkam khat mah a sawi lo kha a mak khawp mai. MZP in 1966 a independence puanna a hming ziaktu la dam chhun te chawimawina hun an hmang thung, a nachang an hre hle a ni.
Naktip mai hi Zofate chanchin a hun thim ber intanna cham, Zoram Ni a lo ni leh dawn ta bawk. Indira Gandhi prime minister a nih hlim chhawn a harsatna leh buaina lian tham a hmachhawn hmasak ber chu Mizoram buai kha a ni. Chu buaina hmet mit tur chuan mawi leh mawi lo pawh an thlu lo a, khawvel ram dang mit mei an veng lo a, kan awmna a la thlaler bawk a khawvel hriata puangzar tur media an awm dawn lo tih an hre chiang a. Democracy ram liana inchhal India khan Mizoram a rawn bei a, a dopui volunteer-ho (hnam sipaiho) chauh bei loin Mizo mipui a rawn bei a, nunau pawisawi lo nen lam an rawn vaihma a. Indopui pahnihna hnu lamah chuan indona a lo chhuaha thlawhna hmanga an inbeih pawhin civil mite chenna beih loh hram an tum ngai a nia.
Indira sorkar kha chuan sipai a rawn tir a, Mizo mipui a rawn bei a, March 5, 1966-ah indo thlawhnain Aizawl khawpui a rawn suasam a, civil mite awm tamna hmun an bei nasa mai a nih kha. Mizoram chhung khaw hrang hrang an bei zui bawk. March 5,1966 atang khan Zofate hun tawnga hun thim ber chu a intan ta a, mipui an rum a, nunau an tap a, sipai rawva tak tak te mihring dikna chanvo zahpahna nei lek loin an rawn che a ni. Tun thlengin he hnam hian khatih hunlaia hliam kha sernung angin a la pai reng a. Khati taka human rights bawhchhe nasa India sorkar hi tun thleng hian a la mualpho lo bawk. Kan hliam hlui te dam se, India hian hetianga rapthlak hian eng hnam mah hi bei tawh lo bawk se.