India ramah hian Medical Doctor leh damdawi lama thawktute chunga hleilenna, kutthlak leh bungrua tih chhiat te a lo thleng fo tawh a, doctor te thihna hial tawk pawh an awm ta fo mai. Indian Medical Association (IMA), India ram puma medical doctor te inzawmkhawmna pawl lian tak mai chuan zirchianna a neih ah medical doctor zinga 75% te hian an hnathawhna kaihhnawih ah midang atanga hleilenna (violence) engemaw tak an tawk tih an sawi a, chung zingah chuan tawngkama rikrâpna (verbal abuse) hi a common ber an ti bawk.

Hospital setting ah chuan Emergency leh ICU te hi hetiang hleilenna thlenna hmun tam ber an ti bawk a, tin, damlo intlawh hun (visiting hours) hi chutiang a thlen hun common ber an ti bawk. He zirchianna atanga a lan danah chuan medical doctor zinga 80% te hi an hna ah an hah rimtawng (stressed out in their profession) a, 56% te chuan kar tluanin zan mut hahdam hun an nei mumal meuh lo an ti. 62.8% te chuan rilru ngaihngam takin damlo an en thei lo (kutthlak tawrh hlauh vangin) an ti leh bawk. He zirchianna hi medical doctor te bik chauh a la ni a, hospital leh medical lama thawktu dang te tiamin han zirchiang ta se, a figure hi a sang viau in a rinawm.

Ram changkang zawkah chuan kut inthlak ang chi hi a thleng meuh lova, amaherawhchu inkhinna a tam thung hle. India ramah erawh chuan doctor mi kut tuar an thahnem ta hle a, thihna hial thleng pawh a awm ta fo mai. Chutiang avang chuan IMA hian medical lama thawkte hetiang hleilenna laka venhimna dan siam tur hian sorkar laipui pawh a lo nawr fo tawh thin a. Covid-19 hrileng laia kut inthlakna a thlen belh avang te pawh ani pakhat anga, Govt of India chuan Epidemic Diseases (Amendment) Act, 2000 chu 28 September 2020 khan a notify ta reng a ni. He dan hnuaiah hian medical lama thawkte chunga hleilenna, a bikin kut thlakna reng reng chu warrant tel lova man theih (cognizable offence) ah a puang ta hial ani.

Medical doctor te leh damlo enkawlna lama thawktu dang te, a bikin damlo enkawl lama thawk te hi an hnathawhna hmun theuh ah theihtawp chhuahin damlote enkawl hna an thawk a, tih dik tawk loh erawh a awm fo ang. Mihring ve tho an nih avang te leh, a bikin hospital lama rim taka thawk te phei chu stress a san vangin an tawngkam te pawh ngaihthlak nuam lo a awm fo thin ngei ang. Mahse an thiamna te anih dan ang taka an hman theih nan hnathawhna boruak him (safe environment) an mamawh hle. 

India rama doctor te kutthlak an tawrhin rampumah IMA chuan protest a lo buatsaih tawh thin a. IMA Mizoram State Branch pawhin hetiang protest hun hi kan lo hman pui ve tawh thin a. Vanduaithlak takin kan ramah hetiang hi a thleng ve ta a, pawi kan ti hle mai. Hetiang hi a thlen tawh loh hi kan duh em em a, chutiang avang chuan ni 20 Aug 2022 hian Black Badge Protest kan hman a tul phah ta a ni. Medical lama thawkte rikrapna hian a nghawng pawi thei chu damlo enkawl kawngah min ti tim ang tih hi a hlauhawm hle a ni. Damlote lungawi lohna a awm anih pawhin hmaichhana sawiho zel ni thei se a duhawm hle a ni.

Medical lama thawkte venhimna dan hi state tin in an pawm ve phawt zel a ngai a. Chutiang atan chuan IMA Mizoram State Branch pawhin Mizoram sorkar ah “The Mizoram Protection of Medical Service Personnel and Medical Service Institution (Prevention of Violence and Damage or Loss of Property) Act” chu pass anih ve theih nan a lo thehlut tawh a. Kan sorkar hian he dan hi siam puitling thuai thei se a duhawm ngawt ang.