Kan fate hi mi fate nen kan buk a, an kang zawk fo maw?

Zephyr Mapuia hian fiamthu hlimawm ngaihnawm deuh deuh a sawi a, a chang a, video te an siam a. Depression hnehna tha tak turte an ni hlawm. Tun hnaia James Nono-a an kawmnaah khan sawizui chak ka nei pek a nih hi. FTH most wanted – James Nono-a kawmna 11-a mi kha.

“Zirna chungchanga hlawhtling turin eng nge ngai?” tih zawhna chu, “Hlawhtling tur chuan mi fate nih a ngai, matric rizal te en ila, a hlawhtling leh tithate chu mi fate an ni zel..chuvang chuan hlawhtling tur chuan mi fate nih a ngai..ka hlawhtlin dawn chuan mi fate ka nih ve a ngai, hna zawnnaah pawh mi fate ka ni ti zel ila…mi fate nih hian hlawhtlin a awl bik,” a ti leh zuah zuah pek a nih chu! Ka ngaihthlak pahin ka nui kur kur mai.

Fiamthu thiamin, “Hlawhtling tur chuan mi fate nih a ngai,” a tih fiamthu phenah hian nu leh pa tam tak tan inzirna tur a awm. Kan tih dik loh fo, min zirtir duh a nei a ni. Nu leh pa tam tak, an fate tana thanemngaite hian an fate zilh nan mi fate hlawhtlin bik thin thu leh mi fate ropui bikzia an sawi fo thin reng a. Naupang leh tleirawl tam tak rilru a na thin tih an ngaihtuah tel lo. Anmahni thlirna atang chuan an faten thahnem an lo ngaih zual a, theihtawp an chhuah theih nan, “Mi pawhin an thei, saw mite pawh saw en rawh u..i thei ve,” an tih tumna a ni ngei ang. Infuihna dik lo lutuk pawh a ni hauh lo.

An faten an lo dawnsawn dan erawh chu a dang daih thei fo. “Mi fate chu an ropui bik, an hlawhtling bik. Nangni ve hi in nawi lutuk, in rualpuite pawh in tluk ve lo, in thatchhe si, in chhaw bik si, in nawi bik si.. saw mite fa ang saw a nia ka duh ve,” an tihna niin an hria a. A fuihtu fuih tum dan lo zawnga dawngsawngin, mahni inhmuh hniamna leh tling lo intihna leh thinrimna rilru a intuh daih thei. An rilru a na fo.

Nu leh pate hi chhang ngam ve se chuan an zilh let na ve ngawt mai thei asin aw! “Mi pa ang nei ve ila, mi nu ang nei ve ila, min hrethiam ve se, min ngaihsak ve se, min lensan reng lo se, min ruihsan lo se, inthen ve lo se, inlerh san lo se, chhungkaw hlim tak ni ve ila, hetiang hi kan ni bik lo ang,” tiin mi nu leh pa ten an fate hlawhtlinna atana an an hun leh tha, an ngaihtuahna leh sum leh pai, ngaihsakna leh hmangaihna an pek zozaite an mitthla ve vut vut hial mai ang a!

An sawi chhuah ngam ve loh, an rilrua awm ve pui hi a dikna chen a awm palh phei chuan aw! Kan phu tawk, kan thiam leh finna kan thlahchhawn theih tawk, kan tha leh zunga kan enkawl dan mil tawk vel fate hi kan nei ve a lo ni lek mai ang a!! Mi fate an tluk loh thu kan aupui dum dum hian mahni mawng kan hlim a lo ni lek palh ang e!!

Naupang chu fuih tur, zilh tur, enkawl tur an ni ngei a. Tawngkam leh chezia erawh fimkhur ve a ngai fo. Mi dang nena inkhaikhin hi tuman kan duh lo tlat nia! A nawi zawk kan nih phei chuan! Nupa thu-ah pawh a ni tho. “Mi pasalte chuan, mi nupuite chuan,” kan intih khum vaih zawngin nupa thu hi a buai nak duh fo. “Chu chu va nei la a ni mai alawm,” kan ti hmak hmak tawh mai a ni.

Kan fate hi an nihna ang ang hian hmangaih ila, an tlin tawk ang ang hi hrethiam ila, an phak tawk chin hi pawmsak ila. An theihtawp an chhuahnaa an thlen chin chinah hian fak ila, lawmpui ila, hmasawn belh turin fuih mai a tawk. Chu chu naupangin an ngeih ber mai. Kan fate leh mi fate kan buk a, kan fate an kang zawk fo mai. “Mi fate nih a ngai lo e, I love you as you are,” tih a tawk e.