Hrisel hlutzia hrethiam tur chuan damloh ve a ngai an lo ti thin a, a dik hle mai. Chhungkua hrisel tak, damloh pawh tawk ngai meuh lo, damdawiin la lut ngai lo tan chuan damloh hrehawm leh hautak zia te hi hriatthiam a har viau mai thei. Doctor te hming hre thei phian, damdawiin inentir dan sawi zuah zuah thei chin hi chu a tlangpuiin damloh harsatna lo tawk ve fo tawh an ni duh hle. Chutih rualin inentir dan kalphung lo hre bel tawh te hi damlo dang tan an tangkaiin an thlamuan thlak duh em em thung. 

Natna leh damlohna te hian hman remchan hun leh hun lo te a thliar lem silova, a damlo zawka te ai mah hian a enkawltu chhungte tan hian hun insiamrem te hi a hautak duh hle awm e. Chutiang avang tak chuan damlote leh an chhungte tan, a bik takin natna benvawn, khumbet meuha damlohna vei te tan midang kantu, chhawktu hi an hlu takzet a ni. Heti zawnga ngaihtuah phei chuan chhungkaw hung deuh te, unau ngah deuh te, a bik takin damlo enkawl kawngah phei chuan mipa aiin hmeichhia hi an lo tangkai nasa mah zawk fo mai a, fa neih tam promote te pawh hi kan population tihpun lam ai mahin harsat huna an tangkai theih dan zawng hian ka lo thlir fo thin.

Natna benvawn te, zaipui tuar, khumbet meuh damlohna te hi hun leh tha mai bakah sum leh pai a heh hle mai a. Khawpui lama awm te hi chu engtin tin emaw kan la inpaizawn dan kawng te a la awm thei a. Thingtlang lam mi, khawsak harsa zual deuh tan te phei hi chuan natna khirh vei te hi a rapthlak (ka tawngkam hman hi a hriam mah mah em ka hre law) ngawtin ka ring. Doctor rual thingtlang khaw hla zawka free/special clinic a kan fehchhuah hian natna khirh nei, khawpui lama check chian a enkawl ngai te kan hmu fo thin a. Khawpui pan kan han sawipui hian a hautak tur zia an hriatthiam vang te pawh a ni anga, “khawpui pan lovin damdawi min chawh mai ta che” ti tawk hi an awm fo reng a ni.

Natna benvawn chi hrang hrang zingah cancer natna te leh, kal tha tawh lo vanga Dialysis ngai te hi inenkawl a hautak zual khawpin a rinawm. Cancer damlo te tan Zemabawk Cancer Hospital bulah chawlhbuk siam a ni a, a bik takin thingtlang lam atanga rawn pan ten an chhawr hle awm e. Dialysis khawl hi Sorkar damdawiin bakah private hospital hrang hrangah a awm ve ta hlawm a, chuti chung chuan kan la indaih lo hle. A tih man ringawt pawh hi vawikhat ah 2500-4000 inkar vel anih hmel a, hman mamawh zinga a tam zawk hi chu kartin vawi 2/3 tih ngai a lo ni a, sum a hek duh khawpin a rinawm. Private Hospital pan te hi sorkar damdawiin an chan loh vanga pan te an awm nawk bawk. Chhawk dan kawng awm thei se ka ti hle thin.

Kan khawpui damdawiin ah te hian damlo natna khirh tuar tam tak an awm reng a, an inenkawlna senso hautak chu thuhran, a awmpuitu te pawh hah tak tak, thlaktu nei mumal lo an awm fo mai. Han hahchawlh lailawkna tur nei mumal lo, chhungte pan tur nei mumal lo te pawh an awm fo. Damdawiin lama thawkten theihtawp chhuahin an senso tur te pawh Sick Fund an dawn khawm atangin an pe fo; mahse a daih tak tak thei lo. Heng damlo leh a enkawltute tih zangkhai dan/ chhawk dan hi kan ngaihtuah a tul hle mai. Tun hnaiah mi awm thei leh khawsak awlsam zawk kan lo thahnem ve tial tial a, thilpek kan intihhmuh a, a lawmawm hle mai. Kohhran leh khawtlang lam pawh hetiang zawng hian kan thangharh zel a, intihhmuh kawngah chuan thil lawmawm tak a ni.

Vengtin ah biakin hmunhma tha tak tak kan nei a. Heng kan biakin te hi damlo awmpuitu hahchawlhna hmun atan room hnih khat te hi reserve thei ta ila. Kohhran emaw khawtlang (YMA) lamah pawh an damlo enkawlte chhawk turin in Volunteer thei hi kan awm teuhin ka ring bawk a. Kan room reserve ah damlo chhungte an rawn hahchawlh chang pawha ei tur lo buatsaih sak ngai pawh nise kan tih theih lohna chhan tur hi ka hre hauh lo; rawngbawlna pawimawh tak a va ni dawn em. Mi thilphal leh inpe tak tak te hian damlo enkawltute hahchawlhna tur te hi siam sak ta se, an duhsakna dawngtute tan a va hlu dawn em!

Midang tana ke kan pen theih dan kawngah hian Mizote hi kan score sang khawpin ka hria a, phai lama damlo leh mitthi buaipui kawngah te, thisen pek kawngah te, mi harsa zawk tanpui kawngah te, kan ram ngeia Rehab Home leh Damdawiin tanpui kawnga sum leh pai leh tha thawh kawngah te hian kan inpekna hi a sang hle niin ka hria. Kan thil leh hmunhma neih te hi damlo harsa zawk te tan tangkai zawka an hman theih tura buatsaih dan hi a awm ka beisei tlat a, kan Pathian rawng kan bawl theih dan kawng pawimawh leh hlu tak ani in ka ring bawk a ni. Chhiartute’n in ngaihtuahna han seng chhunzawm teh u!  (He article hi kum 2020 a ka ziah ania, tun hnaiah damlo ka en te zingah ka rilru khawih deuh deuh an awm a, ti danglam hretin ka han ziak nawn leh a ni)