Mi pakhat “Ka nep em mai..keimah ringawt chuan engmah ka su kaw lo ang ” i ti thin maw? Mi pakhat chauh hian engmah tak tak a thlen thei loin i hre ve thin em? Mi dang an tel ve loh avangin i huphurh thin a, i hnual ve thin tiraw? Mi pakhat chauhin a tih theih hi a tlem hmel bawk a ni. Kum 1846 khan pitar kum 62 mi, Tabitha Brown-i chuan America khawthlang ram lama nun thar tan tuma pemho zawmin sakawrtawlailir inzui duah duah zingah a pem tel ve a. Feet 5 leka sang, a inei puar nalha Kg 52 tling awrh, kebai, tiang hawla bai seih seih mai pitar te chu tupawh mai chuan ‘Grandma Brown’ tiin ngaina takin an ko vek mai a. An khualzin kawngah chuan a tangkai viau reuh mai a. Phaizawl zau ‘The Great Plains’ an tih mai leh leh Rocky Mountain tlangsang an kal pelh laite chuan tawlailir hrang hranga damlote enkawlin a buai thei hle mai a. Red Indian-hoin an bawng an ruksak tum phei chuan riltamin a thi tep nghe nghe a ni awm e! Oregon an thlen chuan chulai bawra sikul hmasa ber ni tur chu a din ve ta rawih a. Chu sikul chu mi tin tan a ni. Rethei deuh chu a thlawnin a kaltir a, a hausa deuhin tuition fee atan dollar khat an pe bawk a. Sikul tan chuan a theihtawp a chhuah a. Naupang a zirtir a, chokaah chhang a hmet a, a ur a, naupang a hrai a. Amah chauh chuan sikul enkawlin a bai kual nileng mai thin a ni. Zirtirtu turte a zawng zui zel bawk a. A theih chhung chu a skul chu a enkawl tawp mai a ni. Grandma Brown-i’n amah chauha a a din leh a enkawl skul chu tunah chuan Pacific University tia hriat a lo ni ta der mai! Mi pakhat inpe, mi pakhat thahnemngai, mi pakhat taima, mi pakhat theihtawp chhuah hian kawngro a lo su thei khawp mai. Thil tih tur tha deuh i hria em? Ti nghal tawp rawh. Miin an zui che nge zui lo che, an ti ve em ti ve lo em tih ngaihtuah buai a ngai lem lo. Thil tha nia i hriat kha ti ve tawp phawt mai teh. “Kei zawng ka mawl si, ka nep si, ka thiam a tlem si,” tia mahni insit buai buai lo khan i tangkai thei a ni tih inhria la. Mi pakhat thahnemngaihna hian nghawng tha a nei vek. Kan zavai hian eng emaw ti zawng talin kan tangkai thei vek. Kan inchhung tan, kan khawtlang tan, kan kohhran tan, kan veng tan, kan ram tan hian mi pakhat hian thil tam tak a tithei alawm maw le! Mi dang phut hauh lo, miin an pui nge pui lo tihvela buai hauh loa mahni chhungkaw tan leh ram tana an theihtawp chhuaha thil tha ti maiho avang hian kan inchhungin hma a sawn thei a, kan khawtlang a nuam a, kan ramin hma a lo sawn thin alawm. Mahni insit mai loin, ‘keimah chauh chuan awmzia ka nei lo ang’ ti mai loin Grandma Brown-i kha i hre reng teh ang u!