Midangte nena kan khawsak hona kawngah hian mahni chauh inngaihtuah, kei ka fihlim chuan a tawk mai tih rilru pu leh mahni indah pawimawh a, midangte zai ngai lo va, mahni tawka lungawi hi awm theih a ni a. Khawvel kan chen chhung hian mahni chauhin kan khawsa thei lo va, midangte nena nung ho tura khuanu duan kan ni a, in mamawh tawn vek kan ni. 

Mi thenkhat erawh chuan mahni hma khua kan ngaih luat­ah midang dip rân chungin midang ngaihtuah lovin mahni hma kan sial êm êm thung a, thenkhat erawh midangte ngaihtuah rân chunga nung, mahni pawh inngaih­tuah lek lova midangin nuam an ti lo vang, engtin nge an awm ang tih rilru pu a, midang zai ngai taka nung an awm leh thung.

Midangte tana hnawksak nih hlau leh nuam an tih loh na tura awm hlau ngawih ngawih an awm laiin midangte ngaihtuah lova mahni indah pawimawh, midang sawi leh sel engahmah ngailo, mahni inhmangaih leh mahni hmasial rân a khawsa an awm leh thung a, anmahni chauh inngaihtuah te hi midangte tel lova khawsa thei an ni bîk chuang hauh lo thung. Mahni tana chakai khawrh hun a awm ang hian midangte tana inpek hun, midangte kep hun a awm thin. Khawvelah hian mahni hma khua ngaih chang a awm ve bawk ang a, midangte hma khua ngaih sak hun a awm ve bawk tur a ni. Keimahni chauh a nung thei kan ni lo va, in mamawh tawn vek kan nih avang hian midangte tana nun hun a awm ang a, mahni tana nun hun a awm tur a ni.

Midang engtin nge an awm ang? Engtin nge kan tih ang tih rilru pu miah lo khawpa huamhap an awm laiin, chan tawka lungawi leh midangte tana zau taka inhuam êm êm a nung an awm leh thung a, engtin nge midangte an awm ve dâwn, engtin nge kan in chan kim theih ang tih aia keiin ka chan chuan a tawk, midang chu lo buai se, kei ka fihlim chuan a tawk tih rilru pu kan tam ta lutuk hi a veiawm ta khawp mai. 

Mahni chauh in ngaihtuahna rilru hi kan kal san a tul, midangte tana ngaihthlak hrehawm a ni em, midangte tana hnawksak kan ni em, midangten engtin nge an ngaih ang? tih rilru put hi a zo zia êm êm a, midangte hma ngaitu, midangte tana inpek, midangte tana inhuam, midang kep leh adt. hian nun a ti nuam a, midang mamawh kan nih avang hian midangte tan kan nung thiam tur a ni a, mahni tang hma chauh hai lovin midangte ngaihtuah rân chunga nun hman hi a zahawmin a mawi hle a ni.

Mahni ringawt inngaihtuah a, midangte tel ve rem ti lo, mahni nun ngai pawimawh, midang inrawlh rem ti lo, ka nun a ni a, ka thu ber titute nun hi a awhawm loh a, entawn tur a awm lo. Midang­te tana nung, mahni inhlan ral a, midangte zai ngai nun hi a zahawm a, nun awhawm tak nei an ni. Kan mamawh leh duhte hi midangte pawhin an mamawhin an duh ve tho a, mahni chauh in ngaihtuah thei bîk kan ni lo va, ei dial dial, chanho dial dial nunmawi tak hi kan nunah kan seng luh a ngai. Midangte ngaihtuah rân chunga khawsak kan zir a ngai a, engtik lai mai pawha midangte rin bur erawh thil dik a ni chuang lo thung. 

Midangte nek rân a khawsak thiam kan pung emaw tih mai turin kan in sak a inhnaih tial tial a, kan thinlung a inhlat tial tial thung mai te hi in en let kan ngai ta viau mai. Kan nunah hian midangte an leng tur a ni a, mahni chauh inngaihtuah mai lovin eng kawngah pawh midang­te ngaihtuah ila, mahni in dah thain midangte nena nunho thiam hi i zir ang u. Kei ka fihlim chuan a tawk mai tih rilru hi a zo zia lo va, a Kristian lo hle bawk. Midang tana harsatna thlentu nih aia hlimna thlentu nih hi thil awhawm leh mawi tak a ni. Tun atangin mahni chauh inngaihtuah lovin midangte tan kan nun hlan i tum ang u.