Ka in bulah nuho an lo chho a, titi bawrh bawrh pah chuan kuihva ei tur an siam mawlh mawlh a. Pakhat chuan a pan hnaha chinai chuangbang chu a kutzungchal chuan a’n pir tawk a, ka bangah chuan a tat var ta tun mai a. “Ka pi, kha, chinai i tah ngawt..uluk taka rawng ka hnawih ve asin” ka’n ti ta hram pek a. Ngaihdam dil leh inthiam loh thu sawi ta lo chuan, “A lo intat tawh sa tho sia, ..” zuk ti tlat a! ---------------- Ka bangah chuan chinai tah tawhna hnuhma a lo awm reng bawk a ni. Kal paha nu pakhatin a rawn tat belh leh ngawt pawh chu ka dem zui duh ta vak lo. Ka bang chu mi pawhin chinai tah nan an lo hmang tawh tlat! Chinai a tah dawn khan a hawi kual ruai lem lo a, miin an en nge en lo tih pawh a ngaihtuah lo a, a chinai tahna tur kha eng thil nge tih pawh a ngaihtuah hmel loh. Chinai lo intah tawhna sa a hmu a, inthiam lohna nei hauh loin a tat ve ta mai ni tur a ni. Tisualah pawh a inngai lo. Ngaihdam min dil pawh tul a ti lo. A thiam thu a sawi mai. Inthiam lohna pawh a nei lo. A thiam lo ta ber leh a demawm ta ber zawk chu a tat hmasatute an nih chu! Tihhmuh loh tur tur an tihhmuh vang vek a ni! Kan pianpui zia ai hian kan zirchawp zia hi a tam zawk ang. Mi nungchang atang hian kan inzir nasa a. Mi thil loh tih tawh dan entawn hian kan nung ve mai mai fo reng a ni. Tihdan than nei tlat kan ni awm e. Pawl leh kohhran kalphungte hi thlak a har khawp. “Kan tihdan thin a ni lo, kan kalphung a ni lo, kan ti ngai lo,” tihte hi rawtna tha tak hnial khan rintlakah kan ngai tlat! Bangkok khawpuiah chuan khawlaia bawlhhlawh paih chu sual a ni a, an paih ngai lo a ni awm e. Mizo han kalte pawh hian bawlhhlawhbawm an hmuh mai loh chuan an ak tha ve mai a ni awm e. Aizawlah chuan thung chuan kan duh hawi zawng zawngin bawlhhlawh kan vawm darh leh lawi si. Mizo pa kuhva heh tak pawhin Kolkatta Airport chhungah khuan kuhva eina chil a pik sen puat lem lo ang. Lengpui Airport ah erawh chuan khawimaw lai kilah te khuan kuhva pikna hmuh tur a awm nia! Kan duh chuan khawlaia bawlhhlawh paih lohte hi chu kan lo thiam em! A lo awm hmasate tihdan kha kan entawn a, kan ti lo ve mai. ‘Tunlai mite hi in chuti khati’ min ti fo a. Mi hmasate khan lo zir se kan ‘chuti khati’ lo mai dawn a ni mai lo maw? Entawn tur min hnutchhiah ang khan kan nung zui a, kan nawi ta viau a ni mai ang em? Bangkok khawlai kan duat zawk chhan leh Kolkatta Airport kan dimdawih zawk chhan chu ‘miin an lo ti thianghlim laklawh tawh si a’, kan ti ve zui zel mai. Kan tualzawl zawk thianghlimna kan ngaihthah chhan chu miin an lo ngaihthah vek tawh si alawm! Kan mawl vang a ni lo, a lo tihmasatu an mawl a, an lo tih tawh sa ang khan kan che ve mai! Zir tur kan nei dawn ta e. Chinai tahna sa a lo awm avanga tat ve mai nu khan a lo intahnasa loah chuan a tat lo ve mai dawn niin a lang (A chhuanlam siam dan atang kha chuan)! Bawlhhlawhte hi paih mai mai lo ila, miin an paih mai mai lo mai dawn a nih chu. Chinaite hi tat mai mai lo ila, mi pawhin an tat mai mai lo ve mai dawn a ni. Tun chhuan hi kan tawp a nih chuan chuan hmasate thiam loh a ni ang. Chhuan lo la awm turte dinhmun tur chu kan kutah a innghat ve thung a nih dawn tak chu! “Mizoram hi fai se kan duh chuan kan tual theuh phiat fai ila, bawlhhlawh a hmunah chauh paih ila, kan tu leh fate chuan min entawn mai ang a, ram fai, khaw fai leh veng fai tak kan nei mai dawn a ni,” tihte chu ‘chu chinai tattu nu’ avang chuan ka ngaihtuah zui ta vak vak anih hi. Miin an lo tih tawh hi kan tizui mai thin si a!