Hmàn ní chu, awm àwl pahin Facebook lamah ka tei lût ve a. Thu sei tak tak an chhawp chhuahho hi ka chhìar khàt tehrêng nèn, ATC atanga Pathian thu zir chhuaka kawrfual zahawm ha pha zân tawh, Terema Chuahang thu rawn chhawp chhuah chuan ka rilru a dek zar mai. Chu chu Arsenal Football club player pawimawh, an team captain hlui Granit Xhaka chanchin tãwi a ni.

Terema chuan Arsenal midfielder Granit Xhaka-a’n a pú, Mikel Arteta hnuaia hringnun zir lai a zir chhuah chanchin a rawn thài a. Comment báwma han thài chiam ka tum a, a thui dáwn si a, he lamah ka rawn luangliam ta zâwk a ni e.

October ni 27, 2019 a ni a. An khèlmual Emirates Stadium-ah Arsenal chuan Crystal Palace an mikhual a. Minute 61-naah Xhaka chu, khatih laia an coach Emery chuan a la chhuak. Hetah hian a ni, Xhaka chu a chêt màwi loh tâk êm êm ni.

Chutia khèl tha viaua a inngaih laia Laurent Koscielny-a thlâk (substitue) a ngai ta mai chu team captain Xhaka chuan a hre thiam tlat lo—a ti tau chhuak nghawng nghawng mai. Thlâk tùra a hming an puan rualin fans lam chuan kutbéngin an thlah zet a; mahse, amah Xhaka erawh a lungawi lo zual sauh emaw tih mai tùrin a thinrimna chu a ti lang nasa sauh a. A khawsak vêl dàn chu Emirates stadium-a Arsenal tantu mipui sîng chuang thu thlim hmurte ngaih dàn a ni ta lo. An captain chu au elin an “boo” khum a, an diriam zui a ni.

“Boo” khum Xhaka lah a zãm duh aih lo—fans lam hawiin a beng a dawh zui! |awngkam chhe tak, ‘F&*k you’ tiin vawi hnih lai a au chhuak bawk. Chu pawh a chu a la duh tâwk chuang lo: chhuang tak leh zah taka player leh fan-ten an hâk thin, no. 34 inchhutna a jersey chu a phelh tau sawk sawk mai. Khèlmual síra amah lo chhawntu an coach, Emery chibai pawh chháng duh loin tunnel lam a pan tau sak sak a, Arsenal kawr a hâk leh tawh ngai loh tùr thu a sawi zui bawk a nih kha.

A chêt dàn chu fans leh football pundit mai ni lo, football hmangaihtute chuan an dem rawn a, a hnu thlengin ànchhia an lawh zui a ni. An coach Emery ngei paw’n, ‘A ti dik lo a ni, a dik hlawl lo!’ a ti thlâwt a; a captain chu ngaihdam díl tùra a phût thu leh a fála amah leh club thuneituten an kawm tùr thu a sawi bawk.

Khami tuma Xhaka chêt dàn kha thu ngaihnawm a ni hlawl lo! A ngaihnawm zâwka chu a hnu lama amah leh club chunga thil thleng hi a ni zâwk. Chu chu ka sawi tum ber pawh a ni.

He thil thlen hnu hian Xhaka chungah thil duhawm a thleng zui mai lo. Thla khat hnu, November ni 5-ah captain nihna hlihsak a ni zui a. First 11-ah khelhna hmun a chang pha lo fo bawk. A kum leh January transfer bazar-a club a chhuahsan chu mipui tam zâwk rin dàn a ni.

Mahse, kum 2019 Krismas tûk, December ni 26-ah coach Unai Emery chu Mikel Arteta chuan a rawn thlâk a. Arteta chuan Xhaka theihna leh chakna chu a hmu “lui” tlat a; an team player pawimawhah a rawn hláng kai thuai mai. Zawi zawiin fans lam pawhin Xhaka chungah rinna an nghat chho ve zêl a. Hmàn ni lawk, kumin May ni 28-a club tána a khelh hnuhnun ber tum phei kha chuan, Bayern Luverkusen lam pan tawh mai tùra ngaih Granit Xhaka chu fan-ten ding chunga zahna chibai bûkin an thlah liam ta a nih kha.

Keini ve hi le! Kan nunah hian mite hmuhsit leh ensan emaw, deusawh leh auh el tâwkin, kan indawm kun ve ngawih ngawih tawh em? Kan nihna, kan nun hluia kan chan chhiat lai ber chanchin hi—thu dik mah ni se, nuam ti taka miten an sawi ngaihthlâk hi chu, a nuam lo ngawt thìn mai ti rawh u? Thawh chhuah leh pawh huphurhawm khawpa dinhmun chhiaa han din meuh hi chuan, hmathlìr hi a tawi tuk mai a. Mahse, mi fel famkim lo kan nih avàng hian, dinhmun chhe bera din mamawh thìn kan ni miau si a; hmuhsitna leh endawngnate hi, kan hringnun zir laia kan syllabus pawimawh tak an ni thìn a lo ni zâwk.

Xhaka pawh kha, a boss Emery leh a khelhpui a thiante mai bâkah fans lam paw’n ring zo tawh lo mah se, amah ring ngam tlattu a nei a; ani zárah a mualpho tawhna khèlmualah ngei chawimawiin a awm leh thei a ni. Keini pawh, thiante leh thenawmte chu sawi loh, chhúngte ngei ngei paw’n min ring ngam tawh loin, min “boo” khum mah se, min ring ngama min la kai tho duhtu, min kaih thawh mai bâkah tùn hmaa kan nun aia nun duhawm zâwk leh hmuhnawm zâwk min neihtír duhtu Pathian kan la nei a ni tih kan hriat hi a va tûl tehlul êm!

Hringnunah hian nun tluang purh mai, dài sùal leh tawh sùal pawh nei ngai miah lote chanchin hi a ngaihnawm ngai loh a. (Chu vànga dài sùal kher tùr tihna a ni lo!) Hum sual dài avànga tlu pilh pheng phung; mahse, sil thêm thûm chung pawha beidawng duh miah lo, harsatna namén lo paltlanga rawn tho chhuaka rawn insiam tha lehte chanchin hi a ni ngaihnawm zâwk thìn chu ni. 

Xhaka pawh kha Emirates stadium-ah khán a beidawng hman ti tih a nih kha. Mahse, a hunah tak amah tanpuitu a chhar a. Rilru thar pu-in a intuai thar a, a hma rimin a thawk a. A hun hnuhnungah phei chuan a tih sualna hmun, auh ela “boo” a tawhna hmunah vêk siam tharin a awm a; amah au nawmnahtute ngeiin zahna chibai an bûk ta zâwk a nih kha. 

“Boo” khum a tawhna hmun atã kai tho lehtu, a pú Arteta chungcháng Xhaka chuan heti hian a sawi: ‘Mi pakhat a awm: a hming chu Mikel Arteta a ni. Eng thil pawh thleng se, a lamah ka tang reng tawh ang. Ani hi awm lo ta se, he club-ah hian ka awm tawh lo ang tih hi, za-ah za-in ka chiang … ka tán, amah hian zah a phú a, ka chhúngkua paw’n amah zah hi kan phú a ni,’ tiin.

Amah Terema tawngkam hian a hmáwr ka’n báwk ang e: ‘Chan chhe tak niin, beidawnna ruam kan zawh a, min tanpui tùra kan beisei roh rohte thleng pawha kan dinhmun min nuihsawh tâk tlat dinhmun hi kan tawng ve a nih pawhin, en tawn tùr Granit Xhaka hian a lo hnutchhiah diam tawh e.’