Zir chianna atanga a lan danin kum 1984 atanga tun thlenga Mizorama ruih hlo hman sual avanga thi hi mi 1736 an awm tawh a, mipa 1531 leh hmeichhia 205 an ni. Ruih hlo avangin nunna kan chan nasa hle a, chhinchhiah loh hi eng emaw zat an awm ngei ang. Ruih hlo avangin kohhran leh khawtlang kan rûm a, a tih rem dan tur zawngin kawng hrang hrang kan dap a, Sawrkar pawhin theih tawp chhuah tumin kohhran hrang hrang thalai hruaitute nen ruih hlo do dan tur ngaihtuahin ruih hlo do beih pui thlak a tum mêk a, tlawmngai pawl YMA leh zirlai pawl te pawh thawhpuiah sawmin kan zavaia kan do tlân a tul zia a lang. 

Mizorama tlawmngai pawl lian ber YMA hian kumpuanah 'Ruihhlo Do', a lo hmang tawh thin a, tun thleng hian kumpuanah hmang tawh kher lo mahse Ram leh hnam humhalh hmangin ruih hlo do beih pui a la thlak char char a, ni tin chanchin tharah ruih hlo man a nih thu hriat tur a awm reng mai a nih hi maw. Kan ram hruaitu, tlawmngai pawl hruaitu ten ruih hlo an vei hi thil lawmawm tak a ni a, mipuiten sawrkar leh tlawmngai pawlte hma lakna thlawp hi kan tih tur a ni tih kan hriat a tha hle.

Thalai tam tak ruih hlo bawia an tan chhan hi eng vang nge ni ang le? A bul ber chu chhungkaw keh chhiat vang te, tih chhin chak ve hrim hrim avanga a bawia tang zui ta te leh hun awl ngah luat avanga ruih hlo ti zui ta hi awm theih a ni. Ruih hlo avangin chhungkua leh khawtlang kan buai a, kan ram a dam lo mêk a ni. Kan ram min rûn mêk tu ruih hlo avang hian thalai kan kiam hnem hle a, kum 15 atanga 50 inkar kan liam zawih zawih a, heti taka min rûn tu hi en liam mai lova kohhran leh khawtlang kan tanrual a, kan beih a ngai tak zet a ni.         

Puipunna hmunah kal ila, mipa aiin hmeichhia an tam zawk zel a, bazarah kal ila, mipa aiin hmeichhia hmuh tur an tam zawk a, Mizo tlangval/ mipate hi khawiah nge kan awm zawh tâk? E le! Jail/Home/Addiction Centre-ah kan awm thup mai maw le! Tun ang reng a kan kal chuan zuih lam kan pan zel mai dâwn si a, chhungkua, ram leh hnam khai ding tur mipa te min rûn mêk tu ruih hlo lak ata khai chhuah hi kan tih tur pawimawh hmasa a ni. Min rûn mêktu lak ata tal chhuak turin thangthar te hian tih tur kan neih chu tih chhin loh a ni a, a laimu pawimawh ber chu Chhungkua a ni. 

Chhungkua hi khawvel sikul hmasa ber an lo ti thin, chhungkaw inzirtirna dik chuan ram leh khawtlang a siam tha ngei ang. Heti taka mihring la tlem si hi india rama state zingah nupa inthen kan tam ber leh thung bawk si a. Kan ram din hmun atang hian thu thluang mai mai lo va, kan ram leh hnam hma sawnna tur leh damna tur hi tih tak zeta kan vei a hun ta hle mai. Bial hrang hrang KTP leh PYD Inkhawmpui kan hmang zo chiah a, Agenda hrang hrang thlir kualin bial pakhat chuan 'Mipa pawimawh zia inzirtirna short film siam ni rawh se' tih an rawt hial mai. Heta tanga thil lang chiang chu kan ramin kan tawn mêk leh thil thleng mêk a nih thu hi hai rual a ni lo.

Kohhran thalaiten Agenda atana an chhawp chhuah hi en liam mai mai chi a ni lo, Bial thenkhatah chuan ' mahni anpui kawp chungchang' leh 'LGBT chungchang inzirtirna neih ni se' tia rawt an awm nual bawk. Khawthlang ramin an tui pui leh thil an uar thin hi keini ram pawhin kan tawngin kan hmu ve zel a, thalai tam takin kan tui pui ve zel tawh a, hemi laka invenna hi kan ngaih pawimawh tur a ni. A zawng a zaa khawthlang miten an thil uar leh an nun pui hi kan hnam pum pui hian kan tuipui pha chiam lo a ni tih erawh kan hriat a tha. Kan hnam, kan ram, kan sakhua tan thil him a ni em? tih hi ngun thluk taka kan zir chian zel hi kan tih makmawh a ni. Nu leh Pa ten kan fate thil tui pui hi kan chik a pawimawh a, an nun dan leh an rilru hawiher mil ang zel a insiam rem hi kan tih tur a ni. 

LGBT chungchang te hi Agenda changkang tak leh ram leh hnam hnuk khawih thil, a nih mai bakah sakhuana thlenga nghawng thei thil rawttu an awm hi a lawmawm tak zet a, khawtlang leh kohhran nghawng a nih zel avangin thalaite'n hetiang thil kan vei hi kan tih tur a ni. Kan ram min rûn mêktu ruih hlo leh a kaihhnawih thil hi engtianga dâwn sawn tur nge ni ang? Kohhran thalai Agenda atang hian kan ram thlir ila, kan ram leh hnam damna tur atan hian eng tin nge hma kan lâk ang le? Kil tin atangin min beitu leh do tu an pung zel dâwn. Min rûntu lak ata inthiar fihlim turin kohhran leh khawtlang kan tanrual a ngai a, Sawrkar pawhin theih tawp chhuah se, keinin thlawp zel ila, kan zavaia kan do tlân a ngai a ni.