Chutia min liamsan vawn vawn hnu chuan Biak in síra lungpui tohlâwt hmun chu ka pan a. Ka hnuai chu North Sea a ni—ka mit tlin tâwk ka thlír a—tuipui chu!

25 Minutes!

Minute 25! Ni e, minute 25 lek! Chu chu ka hmangaih, Copenhagen-a sikul ka kalpui thin leh sikul bàna ka hàwpui thin, ka kianga thu reng thin, ka thian leh ka bialnu, khawvêla ka hmangaih ber ni fan thin Ava chang loa amah chán hlen tùra ka hun bawhpelh rei záwng a ni—minute 25 chu! 

A va rei lo lulai ve!’ min tihsak a ni maithei. Ka tán chuan, dam chhúnga ‘tãwi lulai’ ka tih tawh tùr a nih reng tawh avàngin a tãwi tak tak thei lo a nih hi … hei!

After 25 minutes
Chutia min liamsan hnu chuan ka bíng mup a, ka nghilh dup a, ka khawvêl hi a chawhnu ruih a, feet ruka thûk lei hnuai lam a hnaih hle ni hian ka hria! Dam hian sâwtna a neih ka hre lo a; khawvêl hian min hnuchhawn vek niin ka inhria.

Ka mi hmuh theih awm chhun, Biak in cheina seng hawitute leh sakhaw puipa thenkhatte chuan min rawn ‘mark khelh nuih’ ve vêl a—lem hi ka va’n ti tak! A khâk hial pawh ka ring—an mi nuih teh tuh dàn kha!

Mi dang ka la hmuh chhun leh ka lama la tang tàng tâng awm chhun chu, ka taxi hman khalhtupa chauh chu a ni—ani lo chu min hruaitu tùr mi dang an awm tawh si lo a … Ka dinna hmun atang hian ka ke hmawr hian pên khat pên leh ta se, North Sea-a pil hlen chu ka hmabâk a ni mai si! 

Ka chhíng diar diar a. Tuipui thlí, min chhêm vâwt sung sungtu chuan ka tiril a ti khùr a—a ni lo, ka awm zêl dàn tùr ka ngaihtuahna zâwk chuan a ni min ti hit a, min ti hlau a, ka thauah min man zâwk ni! Pên khat han pên leha Ava-i leh he khawvêl anchhedawng hi chatuan atána mang tha ka duh tak zet zet a ni. Mahse …

Chatuan chu?
Ava nèna kan inkawm tanna, Copenhagen-a naupang tê kan nih laia sikul kan kal dun thinna, Institut Sankt Joseph (Institute of St. Joseph)-a “Chatuan” chanchin kan zir thin kha ka hre chhuak zawk—zirtirtuten chutuan rei tùrzia an sawi thin te pawh kha! ‘Chatuanah chuan thil pahnih chen tùr a awm dáwn,’ tia Bible class-a kan zir thin te pawh kha ka bengah hian a tharin a rawn ri nawn leh. 

Chûng ka rilrua rawn lang uai uaite chuan he lungpui tohlâwt hmáwr, a piah leh awm tawh loah chuan min chelh mék a ni. Hma lama ka chêt vaih chuan, Ava leh ka hringnun hi tuipui zauah khuan ka ti tàwp ang. Kei hi, mahni inthata tuipuia zuang thla tiin ka chanchin an hril zui ang. He lei ninawm hi ka chhuahsan ang; mahse, a lehpekah … ninawm aia hneawm … aia râpthlâk—hremna pawh chatuanin ka tuar ang!

Ka lehpek nun chu duhthlanna a ni: lehpek nuam chatuan nge lehpek hremna chu!

Chutia ka inngaihtuah buai lai chuan he thu hian min rawn déng dawt: ‘Chatuan chu tu siam nge?’

25 Minutes … before
Ava nèn chuan sikul naupang kan nih lai, St. Joseph sikul naupang kan nih lai atang tawhin thian inngaina êm êm niin bul kan tan. High sikul kan kal laiin; a ni, páwl 10 kan zir kumin a nih kha, kan class-a mi, Finn-a’n hàwpui a chuh ziah thin ka thîk thu ka hrilh tawp kha. Ava chuan, ‘Jascha, nangmah hi alãwm hàw rualpui atána ka duh ber chu … En teh, Finn ka ninzia chu maw!’ min tih hnua hnuai lam bih chunga zawi sapa, ‘Ih maw … Jascha … ka hmangaih chein ka inhria!’ zak tak chunga min tih kha. Kan sikul thlanga Maple thing hnuaiah a nih kha, kha thu kha a sawi ni.

Eng nge ka tih kha? Ka kuah a—ka kuah mai mai lo a, nghet takin a ni ka kuah ni. Ka pawm a—pawm mai mai ka ni lo, thlah phal tawh lo pawm takin a nih kha ka pawm. Zah sawi lo leh ka rilru pawh hrilh ve loin ka fâwp ta tawp mai a nih kha—fawh satliah ni loin, hmangaihna leh duatna zawng zawng infin khâwm fawhin—ka zavaia inpumpêk duhna fawhin! Khata chin kha ka tã a ni a; tin, a tã pawh ka ni ve bawk a.

Chuta chin chu mi dang thîk phâk khawpin kan awm ta lo!

Mang tha Ava … Hello Aase

Kum thum liamta khân kan hna thawhnaah senior kan ni ve ve tawh. Ava chu Danske Bank-ah a thawk a; kei chu Aasted ApS Food hmunpui, Copenhagen-ah manager ni mai thei dinhmunah ka ding ve mék. Ava chu an sawn thut—khútah, Denmark khawtlang tàwp, North Sea bula thingtlang khua Ringkøbing-ah!
Kan inthen a ngai dáwn tih ka hria a … neih luih ka tum ta a … ani chuan min hnial tlat.

‘Jascha, thla ruk chhúng … kum chanve a nih chu, chumi chhúng chauh chu ka zuk awm zuai ang a, min lo nghâk lawk la … Nakin lawkah ka rawn hãw leh ang a, kan sawi fel ang a … Nang pawh, i hnaah manager i nih thuai dawn hi,’ min ti. Chu chuan ka thin a ti rim tlat a nih chu—‘Nakin lawk,’ a tih chuan.

A aia a thlaa naupang zâwk ka nihna a lang leh nge pawh ka hre lo, a lakah ka ti tau a, ka hmu duh lo a, ka tlawh ngai hek lo. Ava erawh chuan min rawn tlawh luih tak tàng tâng thin. Mahse, ka be duh ngai lo. Mipa ti tau ka ni miau a!

Zan khat pawh ka nu a lo chah a—kan ina zanriah min rawn kîlpui tùrin. Ka sual a chhuak laklawh a, ka bialnu niàwm takin kan khaw bul lawk DR Koncerthuset atanga ka thiannu rawn zin, Aase chu zanriah ka lo kîl luihpui a. Hlim taka zanriah kîl tuma kan rún rawn rap Ana chu a túm hàw chiang a nia!

Khawlaiah lah Aase chu ka ngaihzáwng chei bàwla cheiin ka chhuahpui fo a. Ka thiante zawng zawng pawh chuan min chhaih a—chutia min chhaih aia nasa, a leh lí-a nasain min chhaih se pawh ka ti—Ana hriat nawn awn awn tùr khawpa nasain!

Chu ka duhthusàm ang chiah chuan Ana chuan Aase nèna min demna chu a lo hre hle a; rilru ná-in a hna zawm tùrin  Ringkøbing chu min pansan ta a nih kha! Kum chanvea rei a thang ang em tih erawh ka hre lo!
‘
I've finally made up my mind…’
A kal hnuin Ana lehkhathawn chuan min rawn thleng chàmchí a. Ka hawng ngai lo. A chhan chu, min la hmangaih a, a rilru ngai reng a la pu tih ka hriat avàngin.

A lehkhathawn hnuhnung ber chu kár hmasa hmasa leh a mi kha a ni daih tawh! ‘Daih tawh’ kha a ni tlat a—ni tin deuh thaw a lehkhathawn ka dawn thin hnua a kára kár a tlâk tâk avàngin.

Chu lehkhathawn kher chu ka hawng ve a. Chutah chuan a lehkhathawn chhànna a dawn ngai loh avàng leh ka rilru dik tak a hriat ngai loh avànga a rilru hah thu te, Copenhagen-ah pawh lêt leh mah se, ka rilru a hriat miau loh avànga lêt leh ngawt a hreh thu te leh thil dang dang bâkah mahni intih hlum mai duhna rilru a put hial thute a rawn sawi a nih chu!

Khaw hla tak Ringkøbing chu pan vang vang tùrin thlawhna ticket ka la vat vat a. Ka thlawh tûk, zíng ni chhuah hmain chu khua chu ka thleng a … a bâk chu hlaah a awm vek kha … 

Chatuan mawlh chu!
Chatuan chu tu siam nge?’ tih ri mawlh chuan chu lungpui tohlâwt hmáwr, a piah leha kalna awm tawh lo, thihna kotlanga ka din lai chuan min ko a. A chhànna chu ka hria. ‘A chháng theitu mihring hi tu siam nge?’ tih chhànna thleng thlengin ka hria. Mahse, ka chháng ngam si lo!

Ka duh bera chu pên khat pên luiha tuipuia pil hlen a ni. Mahse, mak deuh maiin ka pil hlen dawn lo tih ka inhria. Ka pil hlen dawn lo ka tih awmzia chu, tuipuiah chuan ka thi hlen dawn lo ka tihna a nih chu. Chatuana hrem tùrin ka in-baptist dáwn a ni zâwk tih ka inhria.

Ka hawi kìr a. Taxi driver, a car kianga rinawm taka min lo la nghâktu chu ka va hmu a. Chatuana hremna tuar ai chuan, tiin ka pan ta zâwk a…