Tleirawl harsatna nei thenkhat ka hnenah an rawn hruai ve thin a. An harsatnate hriat tumin a falin ka titipui a, ruihtheih thil an tih chhan te, an luhlul chhan te, an thinchhiat chhante, an hlim loh chhante hriatchhuah tumin ka kawm ka kawm a. Chuta an thil sawi zin ve tak chu, “Chhungten min sawisel reng,” tih hi zuk nia! An hotupa chawlh laia hotu lailawk atan Roger-a chu ruat a ni a. Phur hle mahse thawh chak lohna tak a nei. A rilruah Tony-a a lo lang a. Hlim ngai lo, nur reng mai, tumah ngaina lo, tuman an ngainat loh pa chu! He mi ngainatawm loh zet mai hi thawhpui a chak hlawl lo a ni. A pu kalchhuak tur hnenah chuan, “I awm loh hlanin ka thu awih lo tu emaw awm se engtin nge ka tih ang?” tiin a zawt a. “Ban nghal ang che,” tih pahin a rilru hria niawm takin, “Remchang i hmuh velehah Tony-a chu i ban ang tiraw? Pawi ka ti khawp ang. Kum 40 zet helaiah hian hotuah ka tang tawh a. Tony-a aia hnathawktu rintlak hi tumah ka la hmu lo. A phunchiar tih ka hria a, tumah a ngaina lo tih ka hre bawk. Mahse hnathawhnnaah a lo thleng hmasa ber a, a haw tlai ber thin. A thawhna hmunah hian kum 8 chhungin chhiatna engmah a thleng ve lo,” tiin a sawi zawm duah a. A tukah chuan Roger-a chuan Tony a chu a hmu ta ngei a. “Tony, tunah hian ka thu ber tawh tih i hria em? Ka thu i hnial vaih chuan ban nghal che inpeih at ka ni a, mahse ka ban dawn lo che,” tiin nimina an pu kalchhuak turin Tony-a chanchin a sawi dan chu hrilh pahin Tony-a chu hnathawktu tha tak a nih thu a hrilh ta a. A sawi zawh chuan Tony-a chuan a suahdur kenlai chu a thlauh tawp a. A mittui chu a biangah a rawn luang ta ngiai ngiai a, ”Kum 8 chhung khan engatinge chu chu min lo hrilh loh le?” a ti ta roh a. Chumi ni chuan Tony-a chu ni dang ai zawngin a taima leh zual a. A hnuah Roger-a hnenah chuan, “Ka nupui Maria hnenah, ‘I thawk tha e, Tony’ tia min faktu awmchhun i nih thu ka hrilh a. Maria chu Krismas tuk ang maiin a hlim asin,” tiin a hrilh a. Roger-a chu zirna sang zawk chhunzawm turin a hna atang chuan a bang a. Kum 12 hnuah Tony-a nen chuan an inhmu leh ta chauh a. Tony-a chu rel kawng phahtu pawl lian tak pakhatah chuan an hotupa a lo ni tawh a. Engtiangin nge chutiang hlawhtlinna chu a lo neih theih tia Rogera’n a zawh chuan, “Hmana Idaho-a minute khat chhung leka i thil sawi khan ka nun a thlak danglam vek. Kha mi ni khan min fak lo la chu tu emaw chu ka that tawh ngei ang. Mahse kha minute khat lek titi khan ka nun a tidanglam ta vek alawm,” a ti ta a. Minute khat lek. Mi chunga lawmthu han sawi turin minute khat lek hun i nei em? Tu emaw han fak la, i ngaihsan thu te, nalh i tih thu te, a thawmhnaw inhmeh i tih thu te, a thusawi tha i tihzia te, a thil tih i ngaihsan takzetziate han hrilh teh. Chutiang atan chuan minute khat lek chu hun i nei lo maw? Minute khat lek maw le.. Tu emaw nun kawng chu a siam danglam thei ngei ang le. Mi sawisel hi kan thiam. Mi that lohna kan hre hnem. Sawi pawh kan sawi peih khawp. Mahse infakna hian mi nun a siam tha thei zawk asin. Fakna tur nei miah lo mihring hi tumah an awm lo. Fak lawk teh, minute khat chauh a tawk asin!