Dr Ka Zawhna

MIpatna lama harsatna

Dr. Chawnglungmuana - Dec 05, 2021

Zawhna pahnih chhanna in ang lo....

Zawhna: Ka pu, thil ka lo zawt ve teh ang che. Mipa kum 70 aia upa ka ni a, mipatna thu hla hi ka zawt duh che a. Kum 8 vel liam taah khan ka thusawi tur ding chhuak chiah hi ka thal a rawn na zawk a, ka khua a sik bawk a, a hnuah phei chuan ka serh hi a rawn lian ta vak mai a. Teh kuala pawh tlawnin inch 6 zetin a lian a, a sei zawng inch 7 aiin a sei hret bawk. Chuta tang chuan tisa châkna sosang tak nei chungin a khawng tha thei tawh lo va, ka buai phah thin khawp mai. Mi thu min rawn angin ring ka vuah a, a ziaawm viau a, tunah erawh a tangkai vak tawh lo. Châkna hi a la sosang viau bawk si. Min puih theih chuan ka lawm ngawt ang. I chhanna ka lo nghak e.

Chhanna: I case chu a dangdai hle mai. Mipa sazu hi pipe ang hi a ni a, tisa châkna a lo awm khan a chhungah thisen a inkhawh lut chiam a; tichuan, a lo fuk/khawng ta thin a. A reh hunah chuan thisen kha a inpaih chhuak leh a; tichuan, a lo zawi leh mai thin bawk a ni. I sazu rawn lian ta vak mai chu a chhan hriat a tha hle mai. I thal na nen eng emaw ti takin a inkaihhnawih a rinawm a. Mak zawk chu tisa châkna sosang tak i nei chung sia a khawng tha thei ta lo zawk chu a ni. I kum ngaihtuah chuan natna dang i neih leh neih loh hriat a tha hle mai. Zunthlum emaw, thisen sang emaw i nei tel em? Lung lam tha lo i nei em? Damdawi ei lai te i nei em? Heng zawhnate hi han chhang leh thei ta la. Engpawhnise, doctor hnenah i la inentir lo a nih a rinawm a, lo inentir ngei thei la a tha ber ang. Ring i hman chungchangah hian mi thurawn anga hmang niin i insawi a, a him lo ka ti hle thung. Damdawi leh sex lam hmanrua hriat chian lohte hi hman mai mai loh tur a ni a, duhthusamah chuan doctor han zawh tur kan hre lo a nih pawhin google atangin an product chu a him nge him lo, a thawk tha tak tak em tihte bihchian hmasak zel hi a him ber a ni.

Zawhna: Ka pu, ka zawhna hi min chhansak hram teh. Tisa châkna vanga mahni inhrawt hi a pawina a awm em? Sual a ni em?

Chhanna: I zawhna hi chi hnih a chhan ngaiin i zawt a, a pawina a awm em? tih lai hi ka chhang anga, sual a ni em? tih zawhna erawh ka chhan phak bak niin ka hre thung. Kan sakhaw puithiam leh theologian-te chhan atan dah zawk ta mai ila. Chutih rual erawh chuan sual han tih hian mahnia pawi thleng thei hre reng chunga tihluih hi sual kan ti ve thei tho bawk awm e. Engpawhnise i zawhna hi mi nawlpui chhiar tura han chhawp chhuah chi a ni dawn em ni ti palh kan lo awm thei a, hriselna lam kaihhnawih a nih vangin ka han chhang a ni tih min lo hriatsak dawn nia.

 Inhrawt kan tih, saptawnga masturbation an tih hi sawifiah a ngai hranpain a rinawm loh. Tisa châkna phuhruk tura mahni a inkhawih ti ta mai ila. Mi thiamte sawi danah chuan mihring piang tawh zinga a tam ber hi chuan an lo tawng tawh a, naupan lai atanga thil thleng fo a ni tihte pawh an sawi. Tleirawl chhoh hun lai te, taksa fit lai te hi chuan suangtuahna lamah mai bakah mumang lam thlengin tisa châkna lam hawi hmuh/ngaihtuah a awl duh viau awm e. Tisa châkna nei lo emaw, nei nep lutuk emaw nih kha fel lohna lam hawi mah a ni thung a. 

I zawhna chhanna atan chuan inhrawt hi a pawina a awm lo va; mahse, nasa leh lutuk a tih erawh thil tha ber chu a ni lo. Tisa châkna control theih hi a pawimawh khawp mai a, kan tunlai khawvelah phei chuan hri hlauhawm pui pui a tam tawh a; chuvangin, rilru tizauthau thei lam chi, entirnan sex film te en tam loh a tha ang. Hriselna zawnga thlir chuan tisa châkna phuhruk nana sex hmang lova mahni inhrawt kha a him hle a, safe sex dik tak a ni zawk e. Mahni inthiam lohna nei chunga ti fo thin i nih erawh chuan chu rilru chu a tha lo zawk mah ang.

Share now