Dr Hrekima Titi

MIPUI LAM INSUM DEUH ANG U

Dr. C. Lalhrekima - May 01, 2021

LTF Chairman chuan pass dil leh thil danga betu hi ni tin phone call 40 vel a neih deuh ziah thu min hrilh a. Zing kar hma lutuk leh zan rei lutuk, hun bi ngaihtuah mang loa betu an awm thu min hrilh tel

Hri leng thawh hnihna a zual zel a. Inkhuahkhirhna kalpui mek a ni. Loh theih loha chhuah ngai kan awm lo thei lo a, chungho thenkhat tan chuan LTF-ah pass dil chawp a ngai. 

Veng pakhata LTF Chairman chuan pass dil leh thil danga betu hi ni tin phone call 40 vel a neih deuh ziah thu min hrilh a. Zing kar hma lutuk leh zan rei lutuk, hun bi ngaihtuah mang loa betu an awm thu min hrilh tel. Mipui tana rawngbawl tura inpe an nih avanga a nin loh thu min hrilh bakah, hun bi ngaihtuah chungin mipuiin dawr hram thin se a duh thu min hrilh. A va zahawm tak!

Covid19 hripuiin min luhchilh tirh atangin Mizoram khawthlang leh khawchhak tawp thleng fangin, khaw tam tak ka tlawh ve a. VLTF te thawhrimna ka hmu a. Aizawl khawpui chhunga veng hrang hrang LTF chanchin ka hria a, ka hmu a, ka tel ve bawk a. An hahzia ka hria a. Nupui fanau tlansanin, hunawl pawh nei hman mang loin khua leh veng him nan an thawk char char ringawt mai a nia. An kulcho mawlh ka hlau! 

Tihbuai chintawk nei teh ang u. Chaua an tluk ngut mai zawngin a pawi dawn tlat, kan tan! An hahzia leh thawhrimzia hriatpuiin engmah hi va ‘ba thin’ ngawt tur a ni lo.

Veng tin, khaw tinah mipui awlsam nan LTF ofis an hawng thin. Ofis hawn lai hian, ofis ah ngei, mamawhtuten LTF dawr thin ngei ni se a tha hle. Khawtlang hruaitute ina inkalchilh phei chu tih hauh loh tur a ni. 

Kan him nan sawrkarin chhuah loh tur a ti, tul hle loah chuan! Chhuahna tur hi chhuanlam siam duh tan chuan a tam duh khawp. Loh theih lohah lo chuan mipui hi chhuak lo ila, a nazawngin pass pawh hi dil lo teh ang u. Kan hri buaipui hi boruak atanga hip luh theih a ni tih mi thiam ten an sawi uar thar leh tawh kha. Chhuahvah hi insum deuh teh ang u!

Chutih laiin mamawh tak tak tan pass dil te, LTF dawrte leh an tanpuina dil hi inthlahrun hauh loh tur a ni ang. Veng tina LTF (LLTF leh VLTF) te hi mipui tan an inpe zo em em a nia. An fakawm takzet. Hah pawh an hah a nia, kan him nan hian! 

Veng tin khaw tin LTF te zahna chibai ka buk e, Salute! In kulcho ve thei tih hriain mipuiin chin tawk nei chungin dawr zel che u kan tum ang e.

E!!! Hmai tuam mawlh hi ngai pawimawh zel ang u aw, khawiah pawh! In chhungah a pawimawh zual tawh hle an tih kha! Phui tha se, dul hnuk lo se, hnar khuh ngeiin aw!! 

Min tanpuitu tur LTF te hi an kulcho mai loh nan mipui hi insum deuh ang u aw!