Mipui zalenna ramah hian ram hmasawnna kawngah te, sorkar hmalakna hrang hrangah te hian mipui inrawlh tam se, neitu chan chang se la hmalakna a hlawhtling duh thin. Sorkar leh mipui inkar hi zau lo se, thuneituten mipui zai ngai thiam se, chutiang bawkin mipui pawhin sorkar khalh ngil tur zawngin ngaihtuahna seng thin se la, ram leh hnam tana tha turah chuan sorkar pawh nawr thin se la. Chutianga khua leh tuite an phur a, sorkar pawh a inhawn phawt chuan (Mipui leh sorkar tangrualna avangin) sorkar inrelbawlna tha (Good governance) a awm ang a, thil ropui tak a thleng ngei ang. 

Kan hriat angin kum sawm dawn lai kal taah khan thalai rualten khelmual tha an duh thu an au chhuahpui thin a. Chu chu politics inbeihna a chang zui titih ta a, kum 2008 MLA inthlan dawnah phei kha chuan a lar viau a nih kha. Thalaite tuihalna a ni tih hriain sorkarin thil dang pawimawh tam tak aiin a vei zui ta a, kar loah khelmual tha kan nei chho ta a, khaw hrang hrangah infiamna hmun chei that a ni a, infiamna hmunhma (sports infrastructure) siam chu sorkar hmalakna langsar taka ngaih a ni ta hial a nih hi. 

Mipui hian khelmual ang bawk hian ‘Kawngpui tha’ tih te, ‘Eizawnna kawng thar’ te, ‘Corruption tihbo’ te, ‘Buhbala intodelh’ te, leh a dangte hi thuneitute ngeng chhun khawpin auchhuahpui leh chuah chuah ta ila a hlawhtling leh mai awm asin. Kum 2011 chho a Arab spring an tih mai, Arab ram hrang hranga thalai rual inhawrkhawmin sorkar kalphung an thlak danglam danglam dan te kha kan la hre theuh ang. 

Hetih hun lai vela social activist Anna Hazare-a’n eiruk dona tur dan tha tak siam tura India sorkar laipui chaw ngheia a nawr pawh kha rei lo teah mipui hmalakna a chang nghal a, sorkar a nghing a, mipui au thawm avangin parliament-in Lok Pal bill a pass ta hial a nih kha. Inthlang ramah hi chuan mipui au thawm a rin poh leh sorkarin a ngaihven mai a ni. Mipui hi bengchheng khawpa an au chuan thuneituten an hlau thin.

Mizoram political history-ah pawh hian thil thleng langsar ber berte hi mipui thawmin a hrin chhuah a ni hlawm. Lal ban kha mipui nawrna vang a ni a, India/Assam sorkar laka lungawi lohna mi thenkhat thinlunga riak reng chu mautam tam avangin a lo a lo nasa zual a, chu chuan hnam rilru a chawk tho a, thalai rualte zalenna sualin an pen chhuak a ram a buai a. India sorkar leh sipai laka mipui tawrhna nasa lutuk tireh turin Brig Thenphunga Sailo a rawn pen chhuak a, mipui thlavang a hauh a, nasa taka a beih avangin mipuiin an bawh a, PC party a lo ding ta a. 

Chumi hnuah mipuiin remna leh muanna an duh ngawih ngawih a, kum 1984 MLA inthlanah politics au hlaa remna leh muanna hmangtu Congress (I) an tling leh a nih kha. Ram hmasawnna tluang taka a kal theihna atana pawimawh tak an sawi thin chu neitu chan chang taka mipui teltir ve hi a ni. Chu chu ‘Participatory Development’ te, ‘Beneficiary participation’ te an ti a, a awmzia chu hmasawnna hnathawh hrang hrangah tualchhung mite leh a nghawng tur mipuite teltir ve hi a ni. 

Kan veng chhunga sorkar hmalakna te, kan khaw kawng laihna te, kan khaw bul hnaia tuikhuahte hi mipuiin an hnathawh dan zawng zawng a tir atanga an lo hriat ve chuan neitu chan an chang anga, a tul chuan puih pawh an inhuam thin. FAO-in a sawi danin khawvel huap leh sorkar leh kar lo pawl hrang hrangten an zir chiannaah chuan sum tam tak senga hmasawnna atana hmalakna hrang hrang (Development projects) a hlawhchham thin chhan langsar tak pakhat chu a neitu tur mipuite (beneficiaries) an inrawlhtir that loh vang a ni. 

Kan sorkar hmalakna lian tham thenkhatah pawh hian mipui hi hnuk hnai thin se, compensation vanga buaina te, khawtlang atanga harsatna thleng thin te hi a nep deuhin a rinawm. NLUP chungchangah pawh hian a tir te atangin, a dawngtu tur thlannaah te, ruahmanna siamnaah te, hmalakna hrang hrangah te hian mipui nena inrawnkhawm ni ta se a hlawhtling zawk a rinawm. 

Ram thenkhatah chuan sorkar hmalaknaa mipui tel ve (Public participation) hi mipui chanvo (right)-ah an ngai a, an ram danah ziah lan a ni. Scandinavian ram Netherlands, Denmark, Sweden leh Germany ah te chuan hun laihawl (Middle ages) atang tawh khan public participation hi an ram danah an telh tawh. New Zealand-ah pawh sorkarin hmalakna a neih dawnin a, a nghawng tur mipuite ngaihdan lak phawt tur tih danah an nei bawk. Mipui leh sorkar tanrualna tha tak nei zel ila, phun nawi pawh an tlem anga, eirukna leh thil dik lo inphum ru pawh a tlem sawt dawn a lo ni. 

BJP kaihhruai sorkar hian kalphung thar an ti nual tawh a, chung zingah chuan mipui hnim hnai zawnga an hmalakna tha deuh pakhat a awm a. July 26, 2014 khan internet hmanga a duh apiangin sorkar hmalakna tura rawtna an neih theihna tur leh sorkar hmalakna hrang hranga ngaihdan an sawi theihna tur MyGov.in an hawng a. Chawlhkar hnih chhung lekin mi nuai hnih chuang inziak lut (Registered users) an awm hman a, an sawihona leh rawtna te hi sorkar pawhin a ngaipawimawh thin nghe nghe. Hmanni lawk pawh khan prime minister independence day speech a telh tura rawtna thawh duh tan hun an hawng a nih kha. 

Mizoram sorkar pawhin chief minister hnena rawtna leh thil dang thlen duhte tan website cmonline.mizoram.gov.in tih a siam ve a, mahse, kum khat vel chu he website leh chief minister facebook page leh twitter hi an khawih tawh loin a lang. CMO website www.cmmizoram.nic.in phei chu kum thum kal ta hmalama mi bak chhiar tur leh hmuh tur a awm lo. 

2016 khan Delhi a inbun tlawmngai pawl pakhat Centre for Science and Environment (CSE) chuan Aizawl leh Gangtok te hmarchhak biala khawpui fai berah a thlang a, India ram pum huap pawhin khawpui fai zual zingah Aizawl hi a lang nghe nghe. A thlangtute hian khawpui hrang hranga bawlhhlawh (Solid waste) sawngbawl dan an zir chianna atanga lawmman hi buatsaih an ni a. Aizawl aiawha lawmman dawngtu AMC commissioner chuan, Aizawlin hmarchhak biala khawpui fai ber lawmman a dawn theih chhan chu hmunphiat (sweeper) atanga Governor leh chief minister-te thlenga tanrualna vang a nih thu a sawi a. Aizawl khawpui faina chungchangah hian sorkar lam thawh rah bik chauha sawi hi a dik famkim tawk lo ang. 

MPF General Secretary thin Rev. Dr. R. Lalbiakmawia chuan, Aizawlin hmarchhak khawpui fai ber lawmman a dawn theihna chhan langsar tak chu mipui tanrualna a nih thu a sawi a. A dik khawp mai. Sorkar hmalakna piah lamah taima taka mahni tual phiat fai thin te leh YMA branch hrang hrang mahni veng vawn fai lama thahnemngai taka thawktu zara khawpui fai ni thei kan ni a. Kawr leh kawngthlang remchanga bawlhhlawh paih tawh loin bawlhhlawh paih motor-ah (PPP hmangin) paih thin a ni ta a, kohhran hruaitute pawhin faina/thianghlimna chungchang inkhawmnaah an sawi thin a, sunday school-ah naupangte zirtir an ni a, nitin skul leh zirna in dangah inzirtir thin a ni bawk a. Heng zawng zawng hian mipui tanrualna a entir a, chu tanrualna vang chauh chuan Aizawlin khawpui fai lawmman a dawng thei a ni.