Tunlai hian politics leh a kaihhnawih thilah inpuhna mak tak tak leng vel a tam hle a, thenkhat hi chu MP election (leh MLA bye-election) vanga party hrang hrangte inbeihna hmanrua a ni tih a chiang hlawm. MP inthlan campaign boruak lum tak mai kan tawng chho a, candidate-ten an zir vang ni maw, Mizoram inthlan history-a MP election boruak sosan ber tum a ni hial awm e. Inthlan campaign-in a vawr tawp a thlen mek laiin politics thila inpuhna chi hrang hrang a lo chhuak sup sup a nih kha, mimala insawi chhiatna leh inpuh chhiatna mak tak tak kan hre mawlh mawlh a, mipuiin rin tur leh rin loh tur chin pawh kan thliar hrang hlei thei lo a ni ber. Mahse, Mizo Phantom tia hriat larin EVM hmanga vote ti chingpena chief minister a puhna chungchang hi chu nikum lam atanga intan tawh a ni a, inthlan campaign boruakin a hrin chhuah mai a ni lo thung. Politics khelmual a inpuhchhiatna chi hrang hrang kan hriat mawlh mawlh laiin Phantoma video lo chhuakin mipui min nghawr nghing dawt a, a hnu lawkah congress party hruaitute leh chief minister ngei pawhin an chhang let zui nghal zat a. Inthlan campaign-na hmanrua a lo chan tak vang ni maw, police hnen atangin phantoma sangawi zawnpui (nia an sawi pakhat) thusawi (statement) a darh hluai bawk. Chumi hnuah Phantoma video leh a sangawi zawnpui nia sawi pakhat thusawi video a lo chhuah belh leh ta zel a. Chutianga politics ko tlanga mipui nghawr nghing dawt dawt thei thu mak pui pui leng vel chu kan politician-ten inthlan campaign hmanraw tangkai takah an hmang zui hmiah hmiah a, inthlan boruak pawh sosang lo thei a ni lo. Heng inpuhchhiatna nasa tak tak leh thuthang mak pui pui leng vel kara mipuiin ngaihdan mumal kan siam hlei thei lo hi a pawi lai ber chu a ni. Hetiang teh nuai karah hian mi tam tak chuan ram hruaitute laka an rinna an hloh phah ang a, politics chu dawt leh thutak pawlha inbeihna hmun ni a ngaiin, politician-te pawh a chhe thei ang bera mahni khingpuite beih chingah an ngaih phah hial maithei a ni. Lehlam zawnga thlir chuan tunhma atangin Mizoram politics-ah hian mimal inpuh chhiatna a thleng fo tawh thin a, zep thu a cheng lo, thu dik zik tluak hriat tur awm loin chungte chu a tham ral fo thin bawk. A bikin politician lawk takte hminghliau theihna tur thil hi a zuzi duh zual niin a lang. Hman atang tawhin hel pawl thawhpuia inpuhna te, helho hnena sum pe a inpuhna te, hlemhletna thila inhnamhnawiha inpuhna te leh a dangte kan hre ngun tawh khawp mai. Mahse, finfiahna tak tak awm loin a a reh zui leh mai thin a, tunge dik a, tunge thiam lo..tih hre loin kan theihnghilh zui mai thin bawk. Thudik hriat hi khua leh tuite chanvo a ni a, chuvang chuan ania sorkarin Right to Information Act te pawh kan neih. Dan bawhchhiaa inpuhna na tak mai a awm hian thudik hmuhchhuah ngei ngei tur a awm tihna a ni a, chu chu thuneitute mawhphurhna pawimawh tak a ni a, ram hruaitute hmingliau theihna tur a nih phei chuan ngawih san mai mai tur a ni lo leh zual ang. Politics thil a ram hruaitu lu berte beihna satliah ni lo, pawi rapthlak tak khawiha inpuhna a ni zawk. A phena thil awm zawng zawng nena chhui chhuah a, thudik hai lan hi sorkar tih tur a ni, mipui hnena thudik pho lan hi thuneitute mawh a ni a, chu chu sorkar inrelbawlna tha (Good governance) ziarang pawimawh tak pawh a ni bawk. Nikum hmasa mai 2012 kum khan Assembly House-ah eptu MLA leh Education Minister-te SSA sum lapse leh lapse loh chungchangah na takin an inbei a. Speaker-in a chhui chiangtu tur House Inquiry Committee a din a nih kha. An inpuhnaah khan a tu emaw zawk chu an dik lo ngei dawnin a lang a - dik ve ve theih loh leh dik loh ve ve theih loh tur thil lian tham tak ni ngeia mipuiin kan ngaih laiin inquiry report a lo chhuak a, an thutlukna chu '50-50' tih a ni ta daih mai a nih kha. An inpuhna kha a zatve a dik ve ve/dik lo ve ve tur chi ni pawhin a lang mawlh lo. A tawpkhawkah chuan politician-te hian intihchhiat tak tak an lo duh lo pawh a niang e..zawlbuk a e tang theuh theuh. Kum 2006 khan kartin chanchinbu pakhat Zozam-in MLA sawmpali lai chu dawt bill an lak thu a chhuah a, zin miah loin zinna bill cheng nuai tel an lak thu chiang takin a tarlang a nih kha. Chu thu chu SOSA in a bawhzui a, Speaker hnenah lehkha theh lutin mipui sum hmang dik lotu MLA-te chunga hremna lek turin an ngen a. Speaker-in a chhui chiang tur Ethics Committee a din nghal a, chu committee a tel MLA te chuan an MLA-puite chu an chhui ta a. Kum khat chuang zen zawn hnuah Ethics Committee chuan report an theh lut ta a, zin lohna bill la a puh MLA 14 te chu an fihlim ta vek mai a, an bill lak pawh zinna atan an hman vek thu te tarlan a ni ta deuh deuh bawk. Thiam loh chang reng an awm ta lo kha mak tak a ni. Committee hian dawt bill la a puh MLA te insawifiahna bak tan chhan mumal a nei lo a, thiam an chang a nih chuan a puhtu chanchinbu hian tuar awm tak a nih laiin chutiang chu engmah a thleng lem lo bawk. Heng bakah pawh hian mimal inbeihna uchuak tak tak rei lo te a tham ral ta mai mai pawh sawi belh tur kan hre teuh ang. African-ho thufing pakhat chu "Sai an insual hian a tuartu ber chu an insualna hmuna phulte hi an ni" tih a ni, mipui vantlang chung daiha awmte inbeihnaah hian a tawpah chuan anmahni aiin mipuiin an tuar fo thin. Mi ropuite inbeihna thawm hi a lian a, an inbeihna politics tuala party worker-te thlengin a nghawng a, politics tui nu hman a nih tawh phei chuan hnam pum tan tawrhna a thleng thei. Tunlaia EVM hmanga vote tihchingpen chungchang pawh hi thudik chhuichhuah loh leh puanzar loh a a tham ral a nih chuan mi pahnih inbeia te bakah hian politics huang chhunga mite thlengin ngaihnep an hlawh ang tih a hlauhawm a, mipui nawlpui rilru put hmang pawh a chhe zawngin a nghawng ang tih a hlauhawm.