YouTube lamah ka en thin a; ka en nawn leh thin. Ka en loh cháng paw’n ka ngaithla tal thin. Thangthar zínga Fakna hla huanga thawh hlâwk ber páwl, a hla phuah avànga thalai tui hãlte chãwm thintu, Upa C Lalzarmawia te chhungkua leh zai thiam rualten zalèn tak maia an duh ang ang style-a Pathian fak leh chawimawina hun an hmanna, Family Worship thawh lina hi hmuh a va nuam teh lul êm … Family Worship hmasa lam a hlutawm lo ka tihna ni loin.

C Zara & Family… : Zoram dung leh vãng chiahtu, ‘Ka Thupui Ber Nangmah Fak Hi’ hla phuahtu C Lalzârmawia te chhúngkua leh Fakna hla sa thiamten Pathian fak leh chawimawina hun an hmanna, ‘Family Worship’ hi kum 2020 chho, hri léng kan hlauh zual laia bul an tan a ni a; lockdown avànga harsatna an tawh nasatzia pawh a sawi.

A nupui, ‘Nu Mamuan,’ tia ka koh mai thin leh an fate pathum: C Rohluzuala (Family Worship 4-a drummer), Sarah (Family Worship 4 laiin a damloa a tel ve lo) leh Jeanine (Hlim Hlimi bula hmeichhe naupang ding) te tawiàwm tùrin an chhúngkaw thiante leh zai thiamten Family Worship hun hi an hmang thin.

Nu Mamuani hi tawngtai mi a ni. An ina ka va tlawh tuma thingthia min tawngtai ngattu kha a ni a; kei chuan ka ngai sáng a ni. Family Worship tum li ngawt an buatsaih theihna chhan hi an chhúngkaw inlungrualna leh an tawngtai rah chhuah liau liau niin ka hria.

Family Worship: Family Worship buatsaih a nih hma hian C Lalzarmawia hian a album tlangzarh pahin Pathian fak leh chawimawina (praise and worship) hun a lo buatsaih tawh thin a—kan thlìr fo tawh ka ring. Kum 2020 hnu lama a hla tharte chu album hrana ti chhuak tawh lo leh sum leh pai lama hlâwkna ûm loin, chawi belh inhuamin Family Worship tiin program a kai her ta a; a hlawhtling hle tho a. Eng dang vàng a ni lo—Pathianin a ti nung a, a hmang a ni mai!

Family Worship 4 bîk hi Zobawka BCM Biak in, Ebenezer-ah hman a ni a. Video lam hi Malsawma Fanai (M_Space) leh hoten an buaipui a. Biak in zai leh rimawi khâwk rum rum ti ri rum rum loa live recording leh sound mixing felfai êm êm maia khawihtu hi Mathana (EFX Recording, Serkawn) a ni thung.

A Nungin A Tak A Ni!: Family Worship 4-ah hian tûnlai Mizo Fakna hla sa thiam, thalai zínga tla na ber ber—Maruati, Hlim Hlimi, Stacy Punte, Isaac Hnamte te, Zorema leh mipui hmaa solo-a la zai tam lo, Bethel Ministry worship team member BS-a ten Zara hla thar an sa hmasa a. An zai thiam piah lamah an tak êm êm vek a; intih-rau-tum-luih ang hmuh tùr an awm lo. Bethel Ministry-a Fredderick-a thachhangdâwltu Remmawian Pathian chibai bûkna (worship) a kai hruaitu bawk. Thlarau lam bâkah tisa lam pawha duai lo thah an ni. Mahse, hêng an thiamna leh an tlinnate hi an hlawhtlinna bul niin ka hre lo! A hlawhtlinna bul ber chu inpêkna, tlàwmna, thiamna leh theihna zawng zawng hlan phalna leh tawngtaina niin ka hmu tlat a…

Ngaihthlâk ringawt paw’n an zai hi a nung vek tih hai rual a ni lo a; a ena en phei chuan a chiang lehzual. Hetiang êm êma nuam tia Pathian fak duhtu thalai talent nei tha Zoramin a la nei tih han hriata han hmuh hian thlá hi a muang veng veng mai a. Thenkhat, zai thiam zai laia a síra thingthia lo tap zawih zawih te, mittui nèna chung lama tawngtaina lo hlàn chho mawlh mawlh te, zai paha duhkhawp lo tak maia lo zuang tawr tawrte khân, he program hian ‘ti nungtu’ a nei a ni tih a ti chiang hle a. Kan top gospel artist-te chhuat chára an han thingthi hnâwp maite khân rilru hi a hneh lo thei lo a; zài màwi loh leh hla sak sual pawh an hlau lo a nih kha! Han en han en hian an zínga tel ve a, han làm ve tawr tawr a, ráwl tàwpa Pathian fak ve hi a châkawm ngawih ngawih a. Awm hmun atanga Pathian chibai bûkna (worship) an hmang lai lo zawm ve paw’n kan tahpui pùr thei mai si a! 

A hla thar an sak hma-in a phuahtu C Zara’n a phuah chhuah dàn a sawi leh zêl a; hei hian a hla ngaihthlâk a ti nuam zual a. Zai mai ni loin rimawi tumtute an thiam a. Ka duhthusàmah phei chuan kan local cable TV liante hian leisak se la, nu leh pa leh kum upa lam, YouTube en ngai lote hian TV kaltlangin en thei se ka ti hle a ni.

Lang Chiang Chu: Lang chiang ka tih êm êm mai chu he Family Worship atâna lang lo lama an tawngtai nasat tùrzia leh an inbuatsaih nasat tùrzia hi a ni. Hei hi a pawimawh rêng a. Pathian hminga thil kan ti dáwn a nih chuan, a phú ang ngeiin keimahnia a tha ber, a ropui thei ang ber hi kan hlan tùr a ni a; nè nè kuala tlingtlâk mai chi a ni ve tlat lo.

YouTube lamah duh duh huna hmeh chhuah theia a awm hi a lawmawm tak zet a. Beiseinain Family Worship 5 a thlír lehnghal a. Pathianin Pu C Lalzarmawia te chhúngkua malsàwmna-in a vûr zêl ang a; hla thar leh ropui tak tak nèn, Pathian fak leh chawimawina hun an hmang lai kan hmu leh thuai tùrah inngai ang.