Whatsapp-ah milem pakhat ka dawng a. Mi pakhat hi tuiah a tla pil mek a, a bul vau kamah chuan mi thenkhat an ding a, chhanchhuah tuma zuan luh lam ngaihsak ta hauh lo chuan chu tui tla mek lai thla chu an la sup sup a! ---------------- “Mizo nih hi a va nuam em!” Chu tawngkam chu khami ni khan vawi tam tak ka hria. Mission Venga kangmei rapthlak takin chhungkaw paruk chenna leh dawr panga meivapa a chantir tuka kang bang senghawi leh tihfel hnatlang neihna kara rawn ri chhuak thin a ni. A ri a va mawi em! A sawina hmun nen a va inhmeh tehlul em! Khami ni khan Pastor leh biak in kal ngai mang lo te, kohhran upa leh rawngbawltu zu in ve zeuh zeuh thei te, vengchhung tlangval fel leh zu ngawl vei te, drug addict leh nula thianghlim te, doctor leh mi hrisel lo ve tak te, engineer leh labour te, zirtirtu leh pawl thum pawh pass lo te, khawtlang tana a kula ataia tang thinte leh mitthi lumennaah pawh la tel ngai hauh lo te, zu no khat pawh la tem lo leh khami ni ngei pawha zu rim nam vut vut te khan inlungrual em emin, inenhranna leh intaina tel hauh loin vanduaina tawkte tanpui hna kha kan han thawk ta suau suau mai kha a ni a. Kohhran hrang hrang te, veng hrang hrang atanga lo kalte kha kohhran leh veng ramri sawi hauh loin lungrual takin kan thlantui a luang za a nih kha. Mi dang tanpui tur khan thukhat vuain, tum thuhmun neiin kan thawk mup mup mai a ni. Chawlhni a lo thleng leh ang a, kan hawi zawng a dang leh vek tawh ang a, kan in mikhual pelh leh ngawk ngawk ang a, kan awmna lah chu a inhlat leh tawh hlawm ngawt ang chu! Mahse, khami ni kha chuan, tanpui ngai tanpui tur khan kohhran thurinin min daidang lo a, kan danglamna kan dah tha a, kan ei in duhzawng avangin kan inenhrang lo a, Mizo kan nihna avangin lungrual takin kan thawkho mawlh mawlh mai a nih kha. Drug addict hmaiah belmang a kai a, thuhriltu hnapkhir pawh a fai chuang lo. Police kawr a bal a, zu ngawl vei pheikhawk leh MCS pheikhawk dum dan a inang reng a, Politician hnar a dum a, nula virgin meuh pawh a thianghlim zo tawh chuang lo! Faina inzirtir uar kan tum mek laiin khami ni kha chuan balh tur a ni tlat. Fai chu a zahthlak ta zawk hlauh a. Eng dang vang a ni lo, Mizo kan ni a, tanpui ngai tanpui turin balh a ngai a ni mai. Mizo kan nih avangin kan han bal tlang ta kha a ni a. Balh man pawh a awm e! Kang bâng hnawk nulh mai chu kar loah fel fai duak duak mai nia! Kawngsira Tanpuina Bawm hun chu tumahin an kal pel mai mai thei lo. Hausa leh retheiten an ipte an zen a, an phawrh a, an thlak zel ringawt mai a ni. “Kan veng a ni lo, kan chhungte an ni lo, ka hmelhhriat an ni lo,” tih lam an ngaihtuah lo a, Mizoin Mizo chhiattawk a pui duh mai a ni. Bawlhhlawh chu motor-ah an hlang zut zut a, a tlan liam a, motor dang a dang a rawn ding leh a, an vawm khat lehnghal a. Mi hausain an motor an rawn thawh a lo nia. Mi hausa uikawm lo hi chu an va han tangkai lehzual em! Khami ni khan an motor khan inhlawhna tur a nei ang. Mahse a rem lo. A Mizo-puiin vanduaina a tawh laiin Mizo pa hausain ama hlawkna a ngaihtuah ngam lo a, ama sum hek zawngin a che chhuak lo thei lo mai zawk a ni. Mizo hian sakhua a sawi lo a, nihna a en lo a, veng a thliar lo a nih hi maw le! Synod-in UPC a tanpui nia! Chhiattawh azara Mizona lo lang thin hi chhiat tawh loh niah pawh cham hlen se a va duhawm em! Kangmei chhuah zan khan mipui an pungkhawm nasa em em a. Mi chi hnih tlankhawm an ni. Chi khat chu mi tanpui tum, kang thelh tum. Veng dang pa, police leh kangthel pawl pawh ni miah lo thlansa phulkaia kangthelh ka hmu teuh. Chi hnihna chu hawkdak hnawksak thlalak tum! Kangthelh pawl chetna an dal em ka hre lo. Thlalak chu a darh chak khawp. Thla la hmasatu, thawn darh hmasatu, thil hre hmasa nih kan tum. News a darh chak phah a, a thatna a tam. Khami zana thlalak vawrh darh avang khan a tuk hnatlang pawh kha kan tam a ni mai thei?? Khami zana hawkdaka rawn thlankhawmte kha a tuk hnatlangah khan an lo kal leh vek a ni mai thei! Thlalak lo dawng chhawnga thawn darh lehho pawh khan an lo kal vek a nih ka ring! Khami ni khan thlalak nan ringawt ni lo, mi dang tanpui nana an kut rawn phar chhuaka rawn hnatlang kha an tam em! Mizo nih hi a va nuam em!