CT Ramnunmawii, Thangluaia fanu, Champhai Ruantlang nula, Delhi-a LLB zir mek rawn haw, Covid kai avanga BSUP, Durtlanga April 10, 2021-a an dah khan, dama a awmna hmun a chhuahsan theih tawh laiin raltlan pitar kum 93 mi Covid kai dah luh thar enkawl zui tura a inpek thu chanchin ngaihnawm kha kan hre vek tawh. 

Khatia hmelhriat loh hripui kai thar awmpui a dil khan, thuneituten ZMC lam an han bia a, ‘Hri i kai leh thei asin,’ tia an lo hrilh chuan, ‘Ka hria alawm,’ tiin a chhang mai. 

Covid19 veite phurtu ber, Civil hospital ambulance khalhtu, mi tlawmngai lutuk maiten hri an kai ve ta hlauh mai a. Anni ber an chet theih loh chuan Covid19 kaite phurhna kawngah harsatna a awm dawn tih a chiang. Hospital hotute an mangang a, hri kaite phurtu tur tunge ni ta ang tia an buai laiin motor khalh thiam sawm zet an rawn inpe thawt mai a nih chu! Hlawh an phut lo. “Covid19 kai damlo mangangte tana kan tih ve theih tawk a ni,” an ti hmiah! He thu hi Civil Hospial Medical Superintendent Dr. Lalhmuchhuaka’n min hrilh a ni.

Saron veng chu hripuiin a luhchilh a. Khawtlang leh kohhran tangrualin hripui kaite enkawlna 4C (Community Covid Care Centre) hmun hniha an buatsaih chu ni hnih chhungin a khat nghal vek. 4C-a damlote vil uluk an ngai si a, tu nge vil ang tia an inkhâp buai laiin nurse pahnih an rawn inpe tawp mai a nih chu! An veng mi pawh an ni lo lehnghal! An veng kan va tlawh laiin kan va hmu a ni. Hlawh an phut hauh si lo. “Hri in kai thei a nia,” ti ve ta ila, “Kan hria alawm!” tiin an nui sen sen ngei ang. 

Kanan veng 4C-a a tul ang buaipui turin tlangval pahnih an inpe tawp mai bawk a. Pakhat phei chu private hospital-a ward boy a lo thawk tawh a nih avangin a tangkai nghal hle. Khung hran mek, hri kai ni ngeia ngaih, dinhmun tha vak lo, damdawi in lama hruai tura ambulance an nghah mek laiin oxygen thlaksak a ngai a. Engkim huamin tlangval chuan a luhchilh a, oxygen a thlak vek tih Dr. Lawmpuii’n a sawi. Khawlai leh dawrpui hmuna teihawi aiin hripui kai a awlsam zawk dawn tih an hria. Mahse an ngam tlat. 

Tuithiang pa chu a chhungte pathum awmpui turin ZMC-ah a lut ve a. A pa chu a thi a, ZMC-ah a pa chu salute pein a thlah a. A chhungte dang awmpui turin a ni chu a cham zui. A chhungte enkawl tura inpe hi, ZMC-ah, damlo dang lo lut thar apiang a buaipui a. Nurse duty-te a tul apiangah a pui a, Oxygen bur put kual thlengin a va thawk lawp lawp a. A hmelhriat miah lohte tan a va tangkai takzet tih miin min hrilh a ni. Amah anga chhungte enkawl tura lut, mi dang tan pawha va tangkai sawi tur an tam ngawt ang. 

Nikuma Covid19-in min tihbuai tirh atang khan Mizo nula tlangval huaisen, mite tan inpe tak tak chanchin ngaihnawm kan va hre hnem tawh tak em!

Hlauhawm tam tak paltlang huama phai atanga ruang rawn zui haw ngam an awm a. Covid hri kai theihna lian em em mai kara sample la tura inpe tlat te, motor khalh tur te, Covid vei mek enkawlna hmun luhchilh tura inpe tlat tam tak an an awm. Medical lam thiamna nei hauh lo, a tul tul thawk tura inpete hi an tam mai. An hlau tho ang. Mahse an ngam miau si! “Hri i kai thei a nia aw,” tiin sawithaih chiam hlawm mah ila, “Ka hria alawm,” tiin min chhang vek ang. 

Heng mi inpete hian hri a kai theih tih an hre vek alawm. Hri lo kai ta ni se a khirhzia leh manganthlakzia an hre ve vek ang. An hlau ve tho ang. Mahse an hlauhna aia lian zawk anmahni nawr kaltu an nei a ni. 

Tanpui ngai an hmu a. An hawisan thei lo. Mangang an hmu a, an awm mai mai thei lo. Ram a buai a, an thu mai mai thei lo; an thinlung lama ramin a kohna aw ri chu an chhang a ni mai . An theihna chu ram tan, mi dang tan tangkaipui an tum tlat a ni mai. Mizo an ni a, Kristian an ni miau a ni. Kawng sirah suam hmang tawk an hmu a. An hel ve thei lo a ni mai. An sabengtung atangin an chhuk a. Hmelhriat loh tanpui ngai pui turin an inpe a ni. Mizo Samari mi tha an ni e. 

An hming pawh kan hre vek lo, lar an khel miau lo a, chawimawi an phut hek lo. Samari mi tha hming ngei pawh tun thlengin kan la hriat loh hi. Mahse Lal Isua rengin a dahsang mai. 

Heng mite hian thih an huam bik lo ang, an cho bik hauh lo ang, an la inpeih bik lo tawp ang. Engtik niah emaw chuan kan la thi vek dawn tih erawh an hria ang. An thih hmaa mi dang tana tangkai an tum mai chauh a ni. 

Covid19 hi a ninawm ta. Lockdown pawh a khamawm e. Mahse Mizo Kristian nun ze mawi lan chhuahna remchang a lo ni ta hlauh a. Kristian rilru dik tak a lo lang chhuak hlauh si a nih hi. Țhenawm khawveng tana hnawksak nih duh hauh lo te, sum leh pai chan duai duai dawn pawh ni se ram him nana lungawi taka dawr khara dan zawm tlat te, Lal Isua min zirtir ang taka ni tin ei khawp chauh nei chunga lungawi zir te,  ni tin ei chawp zawnga inhlawhfa chawp thinte pawhin thawk thei hauh lo mahse, phun hauh loin, 'ei tur aiin nunna a thupui zawk lo em ni?' an la ti thei zel. Veng leh ram him nana inpe tlat LTF te hian nin thu an sawi lo. Mahni theih tawk tawka mi dang tan thilpek petute hi ziak tlar dawn ta vek ila, phek a awh thui ngawt ang. 

Samari mi tha an lo lang a nih hlawm hi. Phun loin, sawisel mai loin, hetiang hun harsa kan tawh vek lai hian eng nge ka tih ve theih ang aw, tiin chet an la suau suau ta zawk a nih hi. Covid hripui chimawm thaw tipik zet kara Mizo Kristian nun ze mawi lo lang hian hah a tidam a, thaw a tiveng a, nun a tinuam a ni. A va hlu em! 

Lalhruaitluanga Chawngte in Nula CTI chungchanga a thuziak tawp nana a hman khan khaikhawm teh ang.

Amah Rokunga’n “Kan pi kan pu mi huaite dan tha kha mawi kan ti,” a lo tih ang deuh khan, CT-i (leh mi inpe dangte) chuan pi leh pute dan tha kha mawi a ti a, “Keini’n chu dan chu zawmin, huai taka din kan tum,” ngawi rengin an ti ve a ni ber e. 

Mizo Samari mi thate zahna chibai ka buk e.