Tun tum chu a hre thuk zawk leh vei nasa zawkte mitmei veng chungin ka rilru kap fo thintu Mizo tawng chungchang hi han ziak ve ila. Kil hrang hrang atanga ram hmasawnna kan tuipui em em lai hian hmasawnna tlo (sustainable development) leh daih rei tur lam hi kan hlamchhiah ang a. Chutiang bawkin, hausakna te, changkanna te, thiamna leh zirna te kan buaipui viau lai hian Kan hnam himna tur lam hi kan ngaihtuah thleng ngai lo ang tihte pawh a hlauhawm khawp mai. Chutiang zawnga ngaihtuah chuan kan hnam himna tur bulpui pawimawh tak mai kan tawng humhalh a, venhim hi a tul zia hi kan hriat chian a tha awm e. July thla tawp lamah khan sorkar thuchhuah pakhatah kum thar atang chuan pawl 6 chin chung lamah zirtirna (medium of instruction) atan sap tawng hman tawh tur a nih thu leh, chu chu education reforms commission rawtna zulzui a tih a nih thu kan lo hmu a. Hetih lai vel tho hian chief minister-in Mizorama Cherry Blossom Avenue hmasa ber tur lungphum New Secretariat-ah a phum thu sorkar thuchhuahah tarlan a ni bawk a. India ram khawpui hrang hrang leh kawtthler hming sapho vuah leh phuahte an thlak sup sup tawh laia keinin Tlaizawng par chukna hmun tur tuipui ral tawnga a hming kan vuah tlat mai hian kan tawng aia tuipuiral tawng kan ngaihsanzia a tilang thei awm e. Sorkarin tleirawl chhuak tan tirte lehkha zirna atana sap tawng a barh lui tur pawh hi a awm viau tho awm e. Ram hnufual (ram thang lai)-a chengte hian zirna huang chhungah hian mahni hnam tawng aiin sap tawng an ngaisang zawk tlangpui a. Keiniah pawh hian skul tha tehna atan zirlaiten sap tawng an thiam leh thiam loh kan hmang ta ber maiin a lang. Chutihlaiin, mithiamte thung chuan naupangte hian an zirlai an hriat thiam theihna tur ber tawnga (an pianpui tawng) an zir hi a tha ber, an ti. An thil zir an hriatthiam loh chuan a hnuah an hlawhtling chuang lo te an ti leh zel. Tun hnai khan Angelina Kioko (Professor of English and Linguistics) thuziak ka chhiar a. Kenya dinhmun leh kan dinhmun hi a inan hmel khawp mai. Nitin zirna skulah keini ang thoin sap tawng an uar hle a, khawpui deuha cheng naupangte chuan skul an luh tan tirhin sap tawng tlema zawng an thiam laiin thingtlang naupangte chuan mahni tawngin an zir thung a. Thingtlang naupangte hian an zirlai an hrethiam zawk a, zirna lamah pawh an vengva zawk bawk. Hei hi kan ramah pawh a dik thui viau awm e. Sap tawng zir chawp a lehkha zir ai chuan mahni tawng ngeia zir chuan hriatthiam a awl daih dawn a ni. Zirna chungchanga ka ngaihtuah fo thin chu tawng nge pawimawh hriatthiamna, tih hi a ni. Zirlai thenkhat thluak tha tak tak, an thil zir pawh hrethiam em em, mahse, sap tawng thiam tawk loh vanga exam-naah an thiamna anga chhang thei lo, mark pawh hmu tha lo an awm a. Chutihlaii, zirlai pawh thiam zik tluak vak lo, sap tawnga ziah thiam avanga mark hmu sang zawk si an awm thei tlat. Tuna kan kalphungah hi chuan zirlai thiamna aiin tawng thiam a pawimawh zawk ti pawhin a sawi theih hial awm e. Duhthusamah chuan zirna peng tin mai hi mahni tawng ngei hian post-graduate thlenga zir theih ni ta se le tun ai hian mithiam leh hmantlak an chhuak tam zawkin a rinawm. Sap tawng hnualsuat duh vanga sawi kan ni lo tih erawh hria ila. Sap tawng hi khawvel pum huap tawng tlanglawn ber a ni a, ngaihpawimawh em em tur a ni. Mahse, mahni pianpui tawng aia ngaihsan zawk leh mahni pianpui tawng ngaihnep phah nana hman erawh a tha ka ti lo. Mithiamte chuan tawng hi thilnung ang mai hian an inngeih lo em emin an sawi a, tawng hrang hrangte hi a hmangtuten an ngaihsan ber apiang a ding chang a, an ngaihnep apiang a bo tial tial mai an ti. A hmangtuten an zir erawh chuan indip dal em em loin tawng hrang hrang hi an awm thei tho bawk. UNO hnuaia peng pakhat UNESCO hian hnam hrang hrangte tawng hman hi uluk takin a zir chiang thin a. Khawvel huapa tawng ral maithei dinhmuna ding (Endangered languages) an tarlan zingah Mizo tawng hi an telh ve a, (hei hi tun hnai thil a ni lo) Zo hnahthlak tawng dang pawh a lang nual nghe nghe. Mizo tawng hi ral thei dinhmuna ding zingah pawh a ngaihtuahawm loh ber (vulnerable category) zingah a awm nghe nghe a. An sawi fiahnaah chuan ‘Vulnerable language’ te hi chu mahni tawng ngaisan tawk loh vang emaw humhalhna rilru put phak loh vang emaw a ral thei dinhmuna ding an ni. In chhungkhura mahni hnam tawng hmang duh lo te (entirnan, naupang te sap tawnga biak tlat te, mahni hnam tawng aia tawng dang thiamtir duh tlat te), ni tin skulah pianpui tawng hman phal loh te hi mahni tawng dinhmun derthawng taka dahna a ni. Heng avang hian Mizo tawng hi a muangchangin a thi mek a nih chu. Han ngaihtuah vang vang ta ila, zirlai naupangten Mizo tawng an thiam lohzia te, thumal awmze hriat loh an ngahzia te, thalai zingah duh tawka pianpui tawnga thil sawi thei lo an tam tawhzia te hian Mizo tawng dinhmun him lohzia hi a tarlang chiang viau awm e. Thalai leh naupang zawkten tawngkam dik lo kan hman nasat tak zia te, tawngkam bungrua kan neih tlem telh telh dan te, sap tawng kan seng luh tam tak em avanga kan tawngkam/thumal/thil hming tam tak kan hluihlawn tak zia te han ngaihtuah hi chuan kum za a liam leh meuh chuan Mizo tawng hi a ziak bak hmuh tur a awm tawh lo mai ang tih pawh hlauhawm tak a ni. Tawng muthlu kai harh tur leh thi tan mek kai tho tur leh venghim tur chuan nu leh pa te leh thalaite an pawimawh khawp mai. Mahni hnam tawng hi zahpui loh tur a ni a, thiam loh hi zahthlaka ngaih tur a ni zawk. Skul tam takin zirlaite sap tawng chauh hman an phal te hi ngaihtuah chian a ngai khawp mai. Naupang, tawng zir rual, tawng mai bakah an nitin nuna thil thleng zir rual an ni a, thil thar hriat tur an ngah a, an hriatthiam tawh chu an vawng reng thin a. Chutiang rual chuan tawng kalphung (basic language) an zirna hun remchang ber, mi dangte nena an inbiak tam theih hun ber chhun lam skulah Mizo tawnga tawng an phal tlat si lo a. A bulthum atanga an man tawh loh chuan pianpui tawng mah nise thiam ziktluak a har tawh thin. Chuvangin, kan skul tha ber berte hian kar khatah ni thum tal (a nih loh pawhin nitin chawhma lam emaw chawhnu lam emw zawk zawk) hi chu Mizo tawnga tawng ngei ngei tur ti ta zawk se a tha ang maw le. Sorkar pawh hian kan tawng humhalhnaah mawh a phur tih inhre ta se la, middle school chin hi chu zirtirtute pawhin Mizo tawng hman ngei ngei tur ti zawk se la, naupangin an zirlai an hriat chian phah anga, tawng an thiam phah bawk ang. Kan tawng hi thluk nei a nih avangin naupan lai atanga a thluk dan dik tak an hriat hi a tha khawp mai. Kohhran leh tlawmngai pawlte pawh hian Mizo tawng humhalh a tul zia hi hre thar ila, mahni in chhung khurah te pawh hian Mizo tawng ngei hmang uar ila, naupangte hi hmanlai Mizo thawnthute, pi leh pute nunhlui te, pasaltha huaisen chanchin te kha hrilh thin bawk ila. Kan tawng hi kan humhalh a, kan tihhausak thiam chuan tawng ropui takah kan chhuah thei ngei ang.