Kan naupan lai (han ti ve khanglang ila) khan curfew an puang thin a. Pawn chhuah khap tlat a ni. CRP hi an tei ruau ruau reng mai a. Ka ngaina lo khawp mai. Tum khat chu, ruah a sur nasa mai a, kan thenawmte kawtah hian tuihawk a luang lut hnem viau nge ni, thenawmpa chu kekawrte leh bawngtuthlawh nen a lo thawk chhuak a. An in hungna pelin, pawnah, kawngpui kamah, tuihawk hruaikawi tumin kawngsirah chuan lei a lai a, a hai fai ta soh soh mai a.

Chutih lai tak chuan CRP an lo kal ta le! Ani kha, pawi sawi lo leh hna tha thawk a intih vang ni maw, insaseng a tum hauh lo mai a, a thawk lui tlat a. CRP hovin an han vin that that khan eng emaw chu a sawi ve a, ka va hre pha lo. Mizo tawngin a sawi ngei ang a, a hre pha vaiho pawhin an hrethiam chuang lo a ni ang, an silai kawm chuan an chhu eu ta zawt mai a.

Ani chuan na tuar chungin a thiltih chu Mizo tawngin a sawifiah chiam a, a ring ta deuh bawk a, kan hre pha tawh. Tukverh puanzar keu ru dek dek chungin kan thlir kar mai a. Mizo tawngin tuihawk kawng a sial thute, thil sual a tih loh thute chu aupui ruai ruai mah se, Mizo tawnga sawi fel mai chi pawh a ni lo ni ngei tur a ni, an silai kawm chuan an chhu zui ta zawt zawt zel mai a! Man chu an man lo, hliam tuarin in chhungah chuan a lut thla ta a nih kha.

Thenawmpa thil tih kha thil tul tak a ni. Thil tha a ti a ni. Hritlang leh khawsik pawh pawisa lovin tuihawk kawng a sial tha a, fakawm deuh mai maw le! Dan a bawhchhe mai pawh a! Ruah sur lai chuan CRP pawh an vei peih a ring lo pawh a ni mai thei! An lo kal fuh miau si kha a pawi zo ta a ni! CRP khan Mizo tawng an thiam bawk si lo!

Covid19 vanglai hian kha thil kha ka hre chhuak leh thin. Lockdown bawhchhe lui hram, hmai tuam duh bawk si lo, social distancing ngai pawimawh duh hauh lo, kut tithianghlim peih bawk si lo kan tam. Thil tha ti intiin kan chhuak vel a, Covid19 awm loh beisei ru deuhin kan lo che vel ang a, Mizo tawnga insawi felpui theih miah loh Covid19 silai kawm hian min chhu zawt hlawm mai ang tih ka hlau thin.

Dan hi kan himna tur atan leh kan thatna tura siam a ni vek. Dan zawm mai hi himna a ni. Nu leh pa thuawih hi dam reina tur tih kan zirnate kha a rei tawh mai. Hre lo pawh kan awm lo lehnghal. Mahse, thih dawna mangang leh viau, tihdam beisei em ema beiseina nena daktawr melh leh tawk tawk thin site hian nu leh pa thu pawh kan awih duh meuh si lo. Pathian thu pawh awih tha duh lo tan phei chuan sawrkar leh LTF te thu mai mai phei chu awih harsa tak a ni mahna!

Kan puar leh fânna tur atan, kan tisa châkna tihreh nan leh kan hrawk hnawnna tur ngaihtuah avanga thuawih zo ta lo kan tam mai. Lockdown laia mipuiin harsatna kan tawh loh nan, sawrkar leh LTF-in châkkhai lamna hunte an siam lo thei lo va. Dan zawm tur lam mipuite hian kan tlin mawlh si lo!

Mizo tawng thiam miah lo leh sawi felpui theih miah loh hian min la chhu dawt palh ve mai ang e aw! Kan eu awl awl mai ang!

Vawksa inchuhho hian physical distancing zawm har an ti ta berin ka hria! Vawksa inchuh mai mai vanga he natna hian a man vaih che chuan, vawksa pawh a tui theih tawh lohna hmun, ICU hial i luh phah ang e aw! A khawharthlak dawn teh mai a nia! Natna khawharthlak ber tur a ni e kan tih tawh kha!

I vah chhuah chhan tha viau mah se, i hmai tuam i phelh chhan leh mi dang i nek tawlh tawlh chhan kha chhuanlam tha deuh neiin i thiam thu sawi zuah zuah mah la, Covid19 hian Mizo tawng a thiam lo! Mizo tawnga sawi fel chi a ni tawh lo.

Danin a phalsak thlap mai bakah mipuite himna atana thawktu ngei ngei pawh zuah lo fotu hian min la luhchilh zel dawn an ti lehnghal. Khawvel finna beitham takin a hriat chin tal hi chu zawm hram teh ang u. Hriat loh a la tam lehnghal.

Pa tawngkam thiam eng ang pawh ni ila, sawrkar hotu liante zingah min sawi felpui thei tur pawh tam mah se, tawnghriatloh nen lam pawh bei mah ila, thu ka awih loh miau a, ka vanduai miau si chuan, Covid19 hi ka kai thei tho. Hrawka an hawlh a, “I kai e,” an tih miau tawh chuan, Mizo tawnga insawifel chi a ni tawh dawn lo tlat. Thuawih hi damna tur zawk chu a ni e.