Matric result a chhuak a, zirlai fel tak tak, thiam thei bawk si, nungchang tha bawk si, result nei tha bawk site hian eng lam nge an hawi ang le? Engineering line te, medical line etc. te hi a tha khawp mai. Chutih rualin thangtharte hian Central Service leh All India Service lam hi hawi thar leh se a tha mang e aw! Tun kum 20 chhung hian UPSC exam-ah mizo hming a lang khât ta khawp mai. IPS direct recruit ngat phei chu kum 1998 kha kan neih hnuhnun ber a ni ta. A rei ta vang vang hle mai.

Tun ang zela Central Service leh All India Service-ah Mizo hming a lan khat tial tial chuan nakin lawkah chuan kan state chhunga hna sang zawng zawng hi hnam dangin an la chelh deuh vek mai ang. State sawrkar inrelbawlnaah hian IAS te hi an pawimawh em em a, hna sang ber ber an chelh a, Minister te thurawn petu ber an ni a, sawrkar kut ke ber an nih bakah policy duangtu pawimawh tak an ni. Kan Commissioner leh Secretary rual te hi mizo ngei ni thei se tih hi duhthusam a ni a. Chumi tur chuan thangthar te hian UPSC lam kan hawi thar leh hi a tul tak zet a ni.

Thangthar lehkha thiam rual ten UPSC lam an hawi leh theih nan MPSC pawh hi hna lak kawngah hian in sum deuh se a tha hial em? Mizoram Public Service Commission (MPSC) hian kum tin deuhthaw MCS/MPS a la tawk tawk a, Mizo thalai vengva tak tak, bright bawk site hian MCS/MPS hi an duh tawk ta deuh mai niin a lang. MCS/MPS te chuan Income tax an pe lo a, IAS-te ai mahin an hlawh a tam bawk si, reilo teah Senor Grade, JAG etc. an kai zung zung a, IAS kai (confer) kher loh pawhin MCS-te hian Secretary post 4 an la nei zui. Promotion prospect tha bawk, hlawh tha bawk, vai ram khaw luma awm ngai bawk si lo, a lungawi thlak thawkhat bawk em a ni. Hei vang tak hian Mizo thalai fel tak tak, han bei deuh se UPSC a tling thei mai turte hian MCS/MPS hi an duh tawk ta deuh mai niin a lang a, ka lo ui thin. Mahse, hetia kan state chhunga lungawi ringawt hi khuareiah kan hnam tan a tha si lo.

MCS te pawhin IAS ang thoin Secretary post-te pawh an chelh thei tho a, a vawrtawp an thleng thei tho kan ti naa Secretary rau rauah conferred IAS leh direct recruit ngat IAS te chu an in thlau lo thei lo. Central han dawr se, direct recruit IAS-te chuan central ministry hrang hrangah hmelhriat an nei thluah a, an ministry dawr tura Joint Secretary te kha IAS a an batch pui te an lo ni nawk a, an tan thil tih a awlsam bik em em a ni. Conferred IAS te an khaw dang sial hawi deuh mai mai lai khan direct recruit IAS te chu Central ministry lamah hian an tlang nel deuh chu a ni. Heng hunah tak te hian IAS tling thei tur MCS a an lungawi deuh mai pawizia a lo lang dawn chauh a ni.

Central ministry-ah leh state hrang hrangah hian Mizo thalaite hi inzar pharh tam ila, a va thlamuan thlak dawn em! Dik chuah chuan Manipur Chief Secretary-a Pu PC Lawmkunga a tan lai leh, Nagaland Chief Secretary-a Pu Lalhuma te, Pu Lalthara te an awm lai kha chuan sawi nuam kan tiin, Meitei leh Naga ho lakah khan kan hmai pawh a uang ve deuh thin. Tunah pawh state pawna Mizo tangkhang tam tak, a sing tel deuh thaw an rawn hawng mek a, Chennai atanga Mizo sangkhat deuh thaw rawn hawngte chu Tamil Nadu sawrkarin an hawn man a tumsak vek mai. Engvang nge? Tamil Nadu-ah hian Mizo tlangval R Lalvena, IAS lo awm tlat alawm maw le. Tamil Nadu-a Mizo tlangval pakhat, IAS val lo awm ve ringawt kha a hnam pui mizo sang tel deuh thawin an tangkai pui ta a ni.

Nikum hmasa lawkah pawh IAS pakhat vangin ‘Hnam hnatlang’ kan neih rup rup kha maw le! ‘Shashank out’ kan tih dual dual kha. A kawhmawh bawl zawnga an khawsak phei chuan IAS pakhat leh pawh keini ang state te deuh tan chuan buaipui tham an ni ta zel mai. Hei hian state inrelbawlnaa IAS-te pawimawhzia a tarlang chiang ngawt mai. Central Service leh All India Service lam kan hawi thar leh a tul ta ngawt mai. HSLC leh HSSLC result nei tha ten Engineering line leh Medical line lam an bawh zel chuan IAS/IPS-ah hian kan kang chat thei tak tak mai ang.

Ram hruaitu, minister leh MLA-te pawhin he lam hawia tan kan lak thar hi a tha khawp mai. Mizoramah hian MLA bial 40 kan nei mek a, bial tin MLA-te hian an term chhung hian an bial chhungah IAS/IPS pakhat tal chher chhuak tum se a va tha dawn em! Lehkha thiam thei, sum harsatna vanga phai lama coaching kal thei lo, civil service lam tui bawk site an awm a nih chuan an MLA fund-te pawhin tanpui awk awk mai rawh se. MLA zawng zawngin an term chhunga IAS pakhat theuh an chherchhuah theih chuan kum 5 chhungin IAS 40 kan nei thei dawn tihna a ni a, a va tha dawn em! An zavaia an chherchhuak thei lo a nih pawhin a zahve tal an hlawhtlin chuan IAS 20 kan neih belh dawn tihna a ni a, a la tha hrim hrim.

Ram leilung fate ngei hian kan state inrelbawlnaa hna pawimawh kan chelh zel theih nan tan ila sauh sauh ang u.