Mizo Pipute tuna Zoram an luh tirh hun lai khan mitthite kha an phum ngai lo emaw ni chu aw tih turin Pipu sulhnu leh hnu hma hrang hrang kan hmuh atangte hian inphumna hnu hma, an sulhnu hluiah te hian hmuh tur a awm lemlo hle, kawtchhuah a lungdawhte erawh hmuh tur a tam hle thung a nih hi maw.

China hmar lamah khian tun hma BC engngemaw zah hunlai  khan Zau Dynasty ropui tak a lo ding tawh a, chu lal ram dintute chu Middle East atanga lo kal niin internet lamah an lo kal dan Map nen chiang takin a inziak a, chu lal ram lo tluchheta a hnam siper pakhat chu Mizote hi kan ni awm mang e. Pu B Lalthangliana chhuina ah kha chuan chung hnamte chu buh chaw a ring tute tiin "Mith-zu" an ti a, Mizo tih lo pianna angin a chhut a nih kha. Kan historian hmasa Pu Liangkhaia kha chuan Mizote hi, 'Sema thlah kan ni awm e', a ti thung  kha a nia. "Mizo" tih ziak a kan hriat chian hmasak chu 1872 a Bengkhuaia’n Alexandrapur-a run a, thingpui huan sap Winchester an thaha a fanu naupang te an man Mary Winchester kha Zoluti tiin a hming an lo phuah tawh kha ania. Tin, Kumpinuin Zoram an awp a ziak leh chhiar te kan lo thiam tak nual hnu kum 1902 khan chanchinbu 'Mizo leh Vai chanchin' tih kha an lo chhuah tawh thin a nih kha. Tom Lewins-a kum 1860 chho a Mizoram a lo luh khan "heng hnamte hian an mahni a hlawma insawi nan Mith-Zu (Mizo) an in ti thin a lo ti tawh bawk a ni.

Missionary ram thim bawhte hian an mission-na hmun hi a mawl thei ang bera sawi hi an chin dan a ni ve reng reng a. Keini pawh kha min chhuah mawl hle chu nih kha. "Mizote chu 'zawng' ang maia bal, inbual ngai lo" tiin min sawi thin a nih kha. Ringtu hmasate lah khan sap ho min sawi ang kha nihna ah kan pawm mai kha a nia. Kan Kohhran Upa leh Kohhran khaipa ni chin kha chuan sap lo chhuah hmaa Mizo nun  kha an bengkhawn ngailo, sap lo lan hmaa kan history-te hi an beng a rawngah an thun ngai hek lo chu a nia. Dawt ni hek suh, kan historian hmasate kha missionary hnuaia ziak leh chhiar thiam mingo Pathian tenau a nei kha an ni a, Missionary lo luh hmaa Mizo chanchin kha an chhui kir tam lo hle. Tun thleng hian Mizo hmanlai nun kha titi pui theih an tam lo hle a la nih hi maw.

Kumpinu aiawha kan ram Bengal atanga awptu Tom Lewins (Thangliana) kum 1860 chhoa kan ram awptu khan Mizoram a lo luh khan min hmu bal ve lem lo a ni ang, kha London tlangval khan Mizo Nula Dari nupuiah a neih chat  kha maw, "heng hnam ho hi hnam dang ang an ni hauh lo mai" tiin Mizote chu a ngainain an bula awm nuam a ti a. Thangluah Lal Pu Rothangpuia phei chu thian tha berah neiin British-in Mizoram an awp dawn pawh khan tawrhna nasa tak pumpelhin Thangliana leh Rothangpuia vang khan kan paltlang ta a ni. Tlabungah awmhmun a khuar ta hial a nih kha (sawi tum loh lam ah kan peng leh duah thin).

Khatia kan Pipute China an awm lai khan Great Wall of China siam turin Shih Huangti 288 B.C khan Mizote chu man khawmin lung bangpui sa tur chuan sal chhawrin a chhawr a. Mizote kha kut themthiam tak an ni tih hriat a nih khan lung lak khawm sa lung rem hna thawk tur a ruat an ni a. Kan Pipute khan khalai hmuna tham ral mai kha an tum hauh lo. Vengtute hriat loh khan an leng tawk kua an siam ru a, vengtu te hmuh mai loh nan rem takin a chhin lungin an siam anih kha. Ni khat chu khawvel a lo thim ta khup khup mai a, Mizote'n thim a zing anih hi an ti a, chu lung kua chhin an siam chu hawngin an chhuak ru ta a. An chhuah zawh hma chuan 'Ni awk lem' chu a lo chhuak leh tan ta mai si a, vai thih ai chuan an chhuah rukna lung kua chu  an chhin a ngai ta si a. He hun Mizote lung kua atanga an lo chhuah hi A.D 30 kha a ni. Hei hi Mizo hnahthlak hrang hrang ten Lung kua, Lung puk, Chhinlung atanga lo chhuak kan ni' kan tih a lo ni ta a ni. China tawng hian Chhinlung, Chin hui etc. tih khaw hmingte hi a awm nual a. Lung tih hi China tawnga "Rulpui Dragon" tihna a ni a, thil hrang tam takah Lung tih hming hi a awm a ni a, Mizo te Chhinlung tih nen hian inzawmna a nei lo.

Chu lung kua atang a chhuak hman ta te chuan eng mah bungrua chhuah pui an nei lo. Chulai lung bang sei hmun chu a hlat thei ang bera tlansan kha an tih theih awmchhun a ni ta mai si. An lungduh tam tak te khar hnan an nihna chu ngaihtuah let pawh an duh lo, hriat let leh pawh an duh tawh ngai lo, mahse an lunglenna chu thup sen a ni tak tak chuang lo. Ti hian an pasalte lung an tian laia an nau awihna hla chu nau awih nan kan la hmang ta reng a nih hi.

"Ka nau i hi mu hle hle se bei hle hle 
A khi an khian tian dar lo ri e (lung an tian hun hriat nan darkhuang an vaw ri thin)
Ka nau i kha a delh a nge, suan rawh u 
Suan li suan nga in suan zel rawh u"

Tichuan, an lo tlan thla zel a, lui pakhat pum hmanga an rawn tawlh thlaka Burma ram an lo thlen chuan Burma mite chuan China mite lo tawlh thlakna tiin chu lui chu "Chindwin" an lo ti ta a ni. Chin tih hi tunhma a India leh Burma mi ten China mi an tihna a ni a, chu lui atanga Burma an lo thlen chuan an hlauhna te a lo bo zo ta a, khawvel tharah an chuangkai ta nia inhriain nun thar an din chho leh ta a. Chhungkaw hrang hrang leh hlawm hrang hrangah inthen hrangin, tuna Mizo hnam hrang hrangte hi a lo piang chho tan ta a ni. An mahni leh an mahni ah inngeihlohna lo chhuak in an indo ta a, a dawih apiang nek chhuah an ni zel a. Hlawm thenkhat chu in tiam rualin lal pasarih leh khua leh tuite chu kum 1700 chhoah tuna Zoram hi lo thlengin awmhmun an beng bel ta a. Hnam tlem zawk lo kal hmasa te chuan a hlawm lian a lo kal te chu hlauin tuna Zoram pawn state-ah te Bangladesh-ah te an thleng thla ta a ni.

Mizote hi a tira Zoram an luah tirh chuan mitthite hi leiah an phum ngai lo, pukah an inzalh mai thin. Mi tha leh lalte chu an lo thihin thing kuang siamin meiin an inur a, ruh ringawt a nih hnuah an ruhte chu lain an kawl tha thin. Nausen thi erawh chu bel chhung ah dahin an phum bawk thin. Tun hnua Mizoten puk a ruhro an hmuh chhuahnate chu, Lamsial puk, Neihdawn puk, Hualtu puk, Sialhawk Mura puk, Zote puk, Sazep puk etc. ah te ruhro tam tak tak hmuh chhuah an ni. 

Mizote chu tuna Zoram hmun hrang hrangah an lo darh ta zel a. Pukte a lo awm remchang ta silo nen, thlan an lai a thlan khur mawng chu an kher puk leh a, chu thlan kher puk-ah chuan ruang chu lung phek phahin a bangah lung tiang lehin, ruang chu lung phekin an chhin leh a, thlan ruak chu leiin an vur ta mai thin a ni. Lung awm lohna hmunah chuan naupangin thing tuai te pu khawmin lei laih khuar mawng a puk an kher a, ruang an zalh chu thing tuaiin an ping dang leh a, chu chu "Khau khurh" tih a ni thin. Mizote ringtu kan lo nih hnuah khawthlang ho tih danin mitthi chu kuangah zalhin thlan khur ah kuang kan in chhilh ri ta rum rum  mai ta nih hi.