Chakma chungchanga kan buaina hi a rei ta hle mai. Party politics nena sawi zawm loh theih loh a nih avangin inpuhmawhna pawh a tam a, tunhma atangin Mizorama Chakmate vulh liantu leh an thlavang hauhtu a ngaih bik party pawh kan nei deuh tlat a nih hi. Lal duhna avang hian hnam himna te, ram hmasawnna te hi thupui bera neih reng hi a lo har a ni maithei e, state kan nih hnuah phei chuan dan loa kan rama lo lut rute dap chhuah a, thawn kir tumna a la awm lo a, sorkar kan hrawn tawhte hian kan ram min chuhpuitute lakah hian duap an kai zel zawk a nih hi. Kan mi hmasaten politics chhe chi kan rama an seng luh avangin thil pawi tak tak hi kan hnam hian a tawng ta fo mai a. Mizoram neitu ni ve reng reng lo Chakma heti zat kan rama an lo awm ta pawh hi politics tha lo rah a ni a, kan politician-te lah hian a mawhphurtu an ni tih hi an pawm duh der lo lehnghal. A bul thum atanga sawi chuan Mizo Union hruaitu hmasate kha Chakma vote duh vanga electoral roll a thun hmasatu an ni a, Tlabung bial phei chu vawiin thlengin Mizo tlin theih lohna bial a ni zui ta reng a nih hi. Chutihlaiin, Mizo Union hruaitute hi Chakma chungchangah chuan fak phu tak an ni lawi. Kum 1950 chho atang khan Pakistan sorkar, Muslim sakhaw la vawng tak mai khan Chittagong Hill Tracts a cheng tlang mite a nek chep nasa hle a. British hun lai atanga tlang mite venhimna leh humhalhna dan te kha an titawp a. Chittagong Hill Tracts a cheng zingah hian Chakma (buddhist sakhaw zuitu) an tam ber a, Mizote pawh tam tak an awm a, helai bial zau tak hi pi leh pu chena Mizote ram a la ni reng nghe nghe. Pakistan sorkar chuan helai tlang ram hi muslim-ho tamna ram nihtir tumin hma a la a, bengali mosolman-hoin an chim nasa zel a. Heng hun lai hian Chakmate hi India ram (Mizoram, Tripura) lamah an lo pem lut zung zung tawh a. 1960 chhoah phei chuan tlang mite hi an chep zual hle a, an chenna ramah mega industrial project an kalpui a, Papermill an din a, electric power siamna tur tuikhuah lian an buaipui bawk a. Tuikhuah lian, Kaptai dam phei hi chuan Chakma leh Hajong-ho chenna ram zau tak a chim avangin chenna in nei lo tam tak an awm phah a. Chhungkaw 20,000 chuangte eizawnna a buai zo a, mi nuai khat chuangin an tuar a ni. Hetih lai hian Chakma (Hajong) raltlan tam tak Mizoram leh Tripura leh Assam-ah an lo lut a. Khatihlaia Mizo District Council, Mizo Union kaihhruai (sorkar) khan Mizoram a an awm an remti lo a. Tunlai ang hi ni ta se, kan politician-te hian an chentir mai awm asin. Assam sorkar khan district council hruaitute duh dan hi a hrethiam a, 1964 atang khan NEFA (Arunachal Pradesh ni ta) ah Chakma leh Hajong refugee 5,000 vel chu a chentir ta a. Tun thlenga Arunachal-ho buaina a lo ni zui ta a nih hi. Tunah hian Arunachal Pradesh-ah hian Chakma leh Hajong raltlan leh an thlahte hi nuai khat dawn an awm tawhin an sawi. Arunachal Pradesh-a Chakmate leh Mizorama Chakmate dinhmun hi a inang lo tih pawh hi kan hriat a tha awm e. Anni hi chu refugee anni a, Mizoram a lo lut tam ber hi chu dan lo a lo lut ru (illegal immigrants) an ni thung. Kum 1971 khan India puihna zarah East Pakistan chu Pakistan atangin a indang a, Bangladesh sorkar, mipui thlan sorkar a lo piang ta a. India prime minister Indira Gandhi leh Bangladesh prime minister Sheik Mujibur Rahman te khan 19 March 1972 khan thawhdunna thuthlung an ziak a, 'Indira-Mujib Pact/Treaty' tih a ni a. Chutah chuan "March 25,1971 hma lama India rama refugee lo lutte chu Bangladesh-a thawnkir loh tur" tih a ni a. Hei hi mi thenkhatin Mizoram a lo lut ve ngawt Chakmate tan tanchhanah an hmang thin a. Kum 1994/95 chhoa electoral roll siamthat laia MZP in Chakma foreigner-te an dap lai pawh khan tan chhana hmang an awm a. Mahse, Indira-Mujib Pact-in a sawi hi refugee chungchang chauh a ni a, Mizoramah Chakma refugee an awm lo. Chubakah, he thuthlung hi kum 25 chhung atan a ni a, tunah hian awmzia a awm tawh lo bawk. Engpawhnise, kum 1972 a Mizoram UT a hlankai kan nih rualin Pawi-Lakher Regional Council chu Autonomous District Council pathumah then a ni ta thut mai a. Mara autonomous district council leh Lai autonomous district council lo piang ta hi chu a awm viau a, mahse, Chakma autonomous district council lo piang ve nawlh mai hi tun thlengin thilmak a tling a. Khatih laia bengali pahnih, engkim ruahmantu a ngaih Mizoram Bawrhsap A.C. Ray leh Commissioner S.J. Das te kha a mawhphurtu ber chu an ni chiang a. Kan politician-te an lo mutthlu kha a pawi em em bawk a, thil kalhmang hre tura ngaihten an lo ngaihven lo kha a pawi em em bawk. Party pakhat chuan tunhmaa an thuchhuahah chuan Mizo politician pathum ‘sazu mitdel pathum’ an tih mai te chu mawhphurtuah an puh thung. He CADC lo pian danah hian inhnialna a awm reng a. Ngun taka zir chianga chhuitu mithiam zawkten dan palzutna a awm niin an sawi a, constitution hial pawh a kalh niin an ngai a, khatihlaia Parliament kha an fimkhur lo bawk a, fing taka ruahmantute hian thil hi an kalpui thei niin an sawi a. Chutihlaiin, mithiam thenkhat chuan dan bawhchhiatna awm loin a lo piang niin an sawi thung. Chutihlaiin, tunhnaia YMA Conference chuan, ‘Dan lo anga din, Chakma Autonomous District Council (CADC) hi dan anga thiah a nih theih nan Central YMA-in hma la rawh se’ tiin an rel ta rup mai. Chakma chungchangah hian Mizo mipuite hi kan fim viau rih a. Kan pawngpaw huat ngawt lo a, dan lo a lo lutte chauh hi kan ngaimawh a. India danpuiin khua leh tui dik taka a pawmte leh an thlahte hi chu hnawhchhuah theih an ni lo a, kan pawm emaw pawm lo emaw India mi an ni ve tlat. Chutihlaiin, kum January 26, 1950 hnu lama lo pem lut ru leh an thlahte hi chu ram dangmi an nih avangin dap chhuah a, an rama thawnkir hi sorkar tih tur a ni. Kum 1995/96 vel khan MZP in nasa takin hma a la, Chakma foreigner leh khua leh tui dik tak zawn chhuah beihpui a thlak a. Chumi tuma an hmuhchhuah dan chuan India khua leh tui dik taka ngaih theih chu 2,104 an ni a, ram dangmi leh an thlahte chu 58,789 an ni thung. He an hmuhchhuah hi India sorkar leh Mizoram sorkarah pawh an thlen nghe nghe. Tunlai hian ram dang mite zawn chhuah a, thawn kir leh hi khawvel hmun hrang hrangah pawh an ching viau a. Mahni ram leh hnam humhalh duhna a lian tial tial. India sorkar pawh hian kum 2009 atang khan state hrang hrangte chu an state chhunga ramdang mite dap chhuak a, thawn kir turin a hriattir a. He hriattirna hi kumtin a tharin a thawn leh thin a. Mizoram sorkar hian tunhma atangin Bangladesh atanga ram dang mi lo lutte hi pakhat mah a la thawn kir lo thung. Kan hnam himna leh kan ram venhimna hi sorkar kutah thui tak a awm. Chakma chungchangah hian thil dang zawng aiin mipui kan inthurual em em mai a, hei hi kan sorkar leh political party-te hian hmang tangkai se. Tlawmngai pawlte leh Zirlai pawlte tha hrui hmang telin kan rama ram dang mi, Bangladesh atanga dan lo a lo lutte hi dap chhuah a, thawn kir hi a hun khawp mai. Ram leh hnam tana beitu te hriat reng an hlawh thin a, thangthar zelin an zah thin. Chutihlaiin, hnam himna tura hmala duh lo leh mahni hnam aia hnam dang duhsak zawkte hi kumkhuaa ngaihnep an hlawh thung. YMA hmalakna tur te hi a tichaktuah tang tlang ila, a hlawhtlin theihna turin i tangrual ang u.