Tuna Mizoram sorkar hian nikum december thla atang khan term thar an hmang tan a, thla kaw (9) kal ta chhung khan sorkar hmalakna lian tham leh thil thar leh kalphung thar hmuh tur a vang hle, MLPC Bill,2014 an pass kha term thar an hmalakna langsar ber a ni mai awm asin. Chutih laiin, thla thum chuang awrh prime minister la ni chauh Narendra Modi kaihhruaina hnuaiah thil thar leh kalphung thar hmuh tur a awm malh malh reng thung a, India mipuiin an la lawm rih viauin a lang a, ngaisangtu pawh an thahnem tial tial niin a lang bawk. Mahse, prime minister (sorkar) hmalakna hrang hrangte leh a chet vel dan hrim hrim hi enga mah hmaa fak chiam chi niin a lang lo, thenkhat hi chu mipui chawk phur zawnga hmalakna mai ni te pawhin a lang a, nakin lawkah fak a phu leh phu loh chu kan la hmu thuai ang chu. Tunhnai lawk a prime minister Modi-a hmalakna langsar tak pakhat Make in India campaign pawh hi rei lo te a a rah lang nghal mai tur chi a ni. He campaign hian a tum ber chu India hi thilsiam chhuahna hmunpui leh sumdawnna hmunpuia siam a ni a. Tunlai khawvel hi sumdawnna khawvel a ni tawh a, engkim mai hi sumdawnna nen a inkaihhnawih vek a tih ngam hial awm e. Chuvangin, sumdawng lian (Corporations) awm tamna ram apiang sorkar chak leh ropui an ni zel a ni. Prime minister pawh hian thilsiam chhuah (Khawl hmanga thilsiam chhuah) leh sumdawnna hi ram hmasawnna bulpui pawimawh takah a ngai a, India ram dinhmun vawrh sanna tur niin a ngai bawk a. India ram hi thilsiamna hmunpui (manufacturing hub) a siam thuai thuai a tum a ni ber awm e. Make in India campaign pawh hi chutianga thilsiamna lama khawvel hmahruaitu (sap tawnga 'Manufacturing super power') ni tura beihpui thlakna chu a ni. A tum ber chu ram chhung thilsiamna tihhmasawn leh ram pawna thilsiamna lama sumdawng liante India rama inbun tur leh thilsiamna hmunpui nei tura sawm luh hi a ni. Make in India campaign hi September 25,2014 khan prime minister Narendra Modi-an a hawng a, a hawnnaah hian khawvel huap thilsiam chhuah lama sumdawng liante leh India mi thilsiam chhuaha sumdawng lianho an tel thahnem hle a. Ram chhung hmun tina thlir theih turin TV leh electronic media lamah chhuah a ni bawk a. Hemi ni hi MZP hmalakna a zirlai rualten Aizawl a kawng an zawh ni kha a ni a (district khawpui thenkhatah pawh zirlai rual an pung khawm bawk a). He thil thleng hi Mizoramah chuan chanchin langsar ber a ni a, Make in India leh thu dang a leng meuh lo a nih kha. Engtia lo irh chhuak nge? Make in India campaign hi independence day a prime minister thusawi atanga intan kha a ni ber awm e. Khami tum khan 'Come, make in India' (Lokal ula, India ram chhungah ngei thil i siam chhuak ang u) tih hi slogan atan a hmang a, khawvel huap company liante chu India rama an thilsiamna hmunpui rawn bun turin a sawm a. A nihna takah chuan inthlan campaign lai pawh khan thilsiamna lam (Manufacturing sector) tihhmasawn hi an ngaih pawimawh tur thu a lo sawi tawh bawk. Manufacturing sector (Thilsiam chhuahna lam) sorkarin a ngaih pawimawh thar chhan bulpui ber pakhat chu ram hmasawnna atan leh eizawnna hna thar siamna atan a ni. Thilsiamna lama beihpui thlak hian eizawnna thar a siam teuh dawn a ngaih a ni a, he beihpui thlak hi beisei anga a hlawhtlin theih chuan kum tin hna thar maktaduai 10 zet awm belh zel tura chhut a ni nghe nghe. Chubakah, khawvel huap sumdawng liante hian India elpui ber China leh ram dangah thilsiamna hmunpui an nei mek a, an bun belh zel bawk a, chutiangte hip lut tur chuan sorkar laipui hian theihtawp chhuaha tan lak a tum ve ta a ni. Make in India programme bul tanna atan hian hna peng (Sector) hrang hrang 25 ah beihpui thlak phawt a ni dawn a - department hrang hrang 25 changtu minister-ten theihtawp chhuahin hma an la nghal dawn tihna a ni. Chungte chu - automobiles, chemicals, IT, pharmaceuticals, textiles, ports, aviation, leather, tourism and hospitality, wellness, railways, auto components, design manufacturing, renewable energy, mining, bio-technology, electronics leh a dangte an ni. Hengah hian a tir berah hna thar siam zawnga hmalak tum a ni a, henga hnathawk tlak tur mihring chher chhuah tum a ni bawk. He campaign hlawhtlin theihna atan hian ramdang sumdawngte India rama an rawn luh a sumdawnna hmunpui an din theihna tur 'Foreign Direct Investment' pawh sorkar hian a thlah zalen hle tawh a. Chhawrtlak mihring chher chhuahna atana hmala tur liau liau Department of Skill Development and Entrepreneurship pawh din a ni tawh bawk. Kan tana zawhna awm thei ta chu, he thil hian Mizoram min nghawng pha ve ang em? tih hi a ni. India hmarchhak pum pui hi kawng tam takah a la hnufum hle a. Thilsiamna lian tham (Large scale manufacturing industries) a la awm meuh lo a, a awm chhun te pawh thilsiamna tenau te te deuh vek a la ni. A bikin Mizoramah phei chuan industry tenau (Small scale industry) pawh tih tham a la awm lo zawk. Industry hmasawnna atana pawimawh inkalpawhna tha te, power & electricity te, skilled labour te, leh a dangte hi kan la tlachham rih viau bawk. Chuvangin, he Make in India programme pawh hian chuti maia hnaivaiah chuan min rawn hrut rih lo maithei. Chutihlaiin, ram pum huapa hmasawnna rualkhai hi sorkar laipui policy a ni ve reng thin a, chuvangin rei lo teah he hmalakna hian min rawn chim thei tho bawk. Chutih hun atan chuan ngaihtuahna sen lawk a hun khawp ang. Hnam dang sumdawng pawlte lo lut hum hum ta se kan hnam hi a him reng thei ang em? Hnam tlemte, hnam lian zawkte karcheh a awm kan nih avang hian khawvel sumdawnna hmanga inelna tualah hian kan dam khawchhuak zo lo mai ang tih pawh hlauhawm tak a ni. Lehlamah chuan ngaihtuah fim tak pu chunga ram hruaitute an lo inbuatsaih a, mipui pawhin tan kan lak phawt chuan sorkar laipui hmalakna hian kan ram a rawn chim hunah pawh kan thatpuiin kan hlawkpui viau zawk thei tho a ni. Entirnan, sorkarin beihpui thlakna tura a thlan zinga mi Tourism te hi kan hman tangkai theih tur tak niin a lang. Chutiang bawkin IT pawh hi kan hman tangkai theih tur tak a ni thei bawk ang. Engpawhnise, kan ram hruaitute (Sorkar) tan inpuahchah tan a tul viau awm e.