Hmanni lawk khân Mizorama khaw lâr tak, Thingsai-ah Saikhawpui Kût kan han hmang a. Thu sawi tura min ruat ve avângin thu ka han sawi ve a. Thupui min pêk hran loh avângin kan khua, Thingsai khaw mipui tâna sawi tul leh tha ka tihte chu ka sawi chhuak ta piap piap mai a. Chu'ng ka thusawiah chuan tun laia lei mihring tena kan mamawh êm êm,mamawh satliah pawh ni lo,a tul a, tul ngawih ngawih nia ka hriat, Moral Reform, chu ka sawi uar ta hle mai a. Thusawina hun ka neih tlêm avângin hun ka hmang rei lo hle a. Veh thlêm leh peh hêl nei lovin ka thu sawi lamah chuan ka lût nghal chawt a. Mu thlû an awm hman lova, phun sup sup leh inbek bawr pawh an awm meuh lo niin ka hria. 

He Khawtlang hi Mizorama khaw changkang hmasa a lo ni tawh thin a. Lal leh zirtirtu tha an nei a, Zirna an ngaisang a, Zai an thiam a, Hla phuah an thiam bawk. Sawrkara dinhmun pawimawh tak tak chelh mêk eng emaw zât tunah hian an awm mêk a ni. Khaw changkang hmasa leh mihring inring tâwk tak leh hawi sâng tak an ni a. Mahse, hetih mek lai hian he Khawtlang hian 'Moral Reform’ an mamawh tawh hlê a ka hriat avângin ka thusawiah pawh hian ka uar fâl deuh ta a ni.

Moral Reform tih hi Mizo tawng tlukin kan hre bel viau mai. Inhrilh fiah vak pawh a tul lo mai thei. Kum sang tam tak kal ta a, khawvel lo luah lumtute pawh khan Moral Reform hi an lo ngai pawimawh hle tawh a, an tlangaupui nasa hle thin a ni.

Greek mifing Socrates-a te, Plato-a te, Aristotle-a te khan BC 470-322 lai hawl vel khan Moral Philosophy hi an lo buaipui nasa tawh a. Socrates-a phei chu Father of Moral Ethics an lo ti hial a ni. Heng India chhul chhuak Moral Philosopher ropui, MK Gandhi, Swami Vivekananda, Chanakya, Gautama Buddha-te hi tun hun thleng a sawi hlawh an la ni. An Moral Philosophy te kha he Khawvel awm chhûng chuan sawi chhuah a la hlawh reng dawn a ni.

Tunlai khawvelah hian thiamna a sang zel a, chutih rual chuan ethics, philosophy, morality leh reform ngaihtuahna hi a dal tial tial niin a lang a. Hei hian phung thlûkna lairil a tibo mek a ni. Mihring nun cheimawitu rilru inpawhnate, tih tak takna (sincerity) te, thuawihnate, rinawmnate, khûn khânnate leh thinlung thianghlimnate pawh hi a dal sâwt ta hle niin thil chhût mite chuan an hmu a ni. Hman lai huna Greek mifing Moral thinker-te leh Moral Philosopher-te ang ‘mi ril’ kha hmuh tur an awm ta meuh lo.

Mizoram mipui hian Moral Reform hi kan mamawh em? tih inzawt ta ila, kan chhanna tur chu mamawh teh reng mai, tih hi a ni ang. Tute pawhin Moral Reform kan mamawh a, a tul a, a ngai ngawih ngawih a ni ber. Kan Moral chhiat tawh zia thu hi kan nitin titi ber a ni tawh. Mamawh lo kan awm lo. Kan Moral chhe tak avângin inrin tawnna te, thawhhona thate kan tla chham chho mek zel a nih hi! Sawrkar tha dik, rinawm, sual nei lo din tur pawh hian a tul hmasa ber chu rilru siam that, rilru siam thar a ni. Kal phung tha leh dik nei tur pawhin Moral Reform a ngai, mahni insiam that a, mahni atanga tan tur a ni. Kan Moral a tlâk chhiat avângin Sawrkar hnathawk zingah pawh moral a chhe chho mek zel! Politician der, lem chan thiam an tam phah. 

Politics chhia kan khel a, politics dik a awm tawh lo em ni? tih hi chhan harsa a ni lo. Khawtlâng leh Kohhran nun ze phung pawh hi han thilr ila, kan chhe thûk tawh hle, tih chu mi thiamte hmuh dan a ni mêk. Kan Ram Dan leh Thupek chhuahtuten an la thutak lova. Thupek bawhchhetute an en liam mai mai a. Tih loh tur tih chu tih tur tlukin a letling hlauh! Europe khawmualpui timawitute chu heng Denmark, Sweden, Norway, Switzerland, Iceland, Finland etc ramte hi an ni. Moral reform tul lo khawpa ram nuam leh tha an ni. Dan an zah a, an be lo chauh! Keini ve chu.... tah ti chhuak Order a ni ringawt! Kristian ram, Zoram nuam zu ni si a maw le!!

Tin, heti hi a ni a, tunlai chhanah Moral Philosopher leh Politics Thinker hriat tur an awm ta meuh lo. Corruption thinker kan ngir ta khup mai ni te hian ka hmu thin! Khawi hmunah pawh eiruk tur melh ran hi an ther fer fur mai ta lawng! Kan Politics khelh ve dan, khelh chhan ber chu sum a ni! Hmangaihtu der Mizoram hian a ning tawh!

Kan Moral chhe tak avangin thil tha leh thil sual kan thliar hrang thei tawh meuh lo. Dawngdah leh zawmthaw taka hna thawhte hi thil sualah kan ngai meuh tawh lo chu a nih hi! Contract  hna, chhe taka thawhte, bungraw chhia, supply-te bungraw bûk tling lova hralh te, bungraw chhia, hman tlak loh hralh te chu, ngaiah kan nei zo tawh a nih hi!

Thawh loh Bill lâk te, Supply loh Bill siamte hi thil sualah kan ngai tawh hek lo. Dawt Bill a lar êm êm fo te hian Moral Reform kan ngaih tawh zia a hril âwm e. Contractor ni si lo, Contract hna thawk tlat thin kan ni. Source of Income nei mumal awm lo, pawisa ngah, hausa hmuh tur leh hriat tur kan va tam ta em! Thu dik pawng sual a, bul fûk mumal nei lova,phuah chawp bill Mizoramah hian a nasatzia tarlan a ni thin. Source of Income mumal nei lo, sum kawl tin ten-te hi  a kristian zia lo êm êm a ni. Heng thil tha lo uchuak lutuk ang chi te hi Kristian tha chuan kalsan ngam rawh se.

Hmanni lawka Saikhawpui Kut kan tan hma lawk khan Justice Micheal-a nen zing karah khaw pakhatah kan va kal a. He Khaw hlui-ah hian Pu Micheal-a Pa Pu Rohmingthanga chu kum 1935 khan a lo piang a. Pu Rova pianna hmun hi kan va tlawh a ni. He Thingsai leh Bualpui inkar hi mel 4 vêl a ni a. Chu kawng chu cement concret, mâm taka siam a ni a. A lan dan chuan that hmel tak a ni. Mahse, kum tam a ral hmain cement a khawk a, a phut a, a sawm nuai a, a khu êm êm a ni. Kei lah ka insum zo lo pek, ka thin a rim hle a, ka âng bawrh bawrh! Eng tik huna siam nge tih ka zawh chuan, an khawtlang hruaitu pakhat chuan kum 3 hma lama an siam a nih thu min hrilh. Hna tha pangngai chu ni se, a lo berah kum 10 daih tur a ni. Mahse he rilru corrupt leh moral chhia hian kal kawng chhia a hring chhuak ta tlat a ni! A va pawi em! Mi lian leh mite min thliar chuang si lo! Hei hi Kristian kalkawng a ni!

Moral chhiatnaah chuan Sawrkar tha a awm thei lo. ‘Sum tam, hna chhia, a zar zotute corrupt bawk….,’ tih hi kan au hla a la  ni fan! Ai kal tirh te, office thlen tlai te, office chhuahsan fo te, Chhuanlam fahrah tê tê siama leave lâk fo te. Pute laka tlâk tlum inchuh tlat te, hlawh phû lova hlawh lâk dan dik lo uchuak lutukte hi eng vang nge? Kan nun corrupt vang a ni lo em ni? Kan work culture chhe lutuk pawh hi moral tlu chhe hrin a ni lo kan ti thei lo! hna chhia, belh chian dawl lo lutuk te, MLA leh Minister zinga sum ngah leh hausa sawi rik fo te leh moral reform hi inhmeh kan ti em? Thlarau Thianghlima harhna tlo lo lutuk, Kohhran Upa nun ro, Kohran Upa, Pathian ram vei lo nih te hi Pathian duh dan ni thei tak maw! Pastor zingah  sumdawng thiam tak, Thlarau bo aia Social Salvation vei tlat an awm em? Ka sawi zel dawn, Department thil mahni ta ang a lo ta neih tlat te hi Moral chhiain a hrin chhuah kan ti lo thei lo. Zalenna pawh hman dik a har ta a nih hi!   

Chuvangin, keini Mizorama chengte hian he ram tê tak tê, mihring nuai 12 vel awrh awmna Kristian Population nuai 9 sing nga sang ruk, zaa… 87.16  Kristian awmnaah hian Moral Reform kan mamawh ber ta a nih hi! Chhungkaw entawn tlak,Khawtlang nun entawn  tlâk,Kohhran entawn tlâk leh thang duang,Ram inrêl bawlna  fel leh tha,Minister thianghlim sum awt lo, Engkim felna leh thatna bul chu Moral Reform hi a va nu chiang teh lul  em! 

Moral Philosophy nge pawimawh kalphung dik, kalphung thar! Kei ai chuan in chhang thiam zawk!