Nun hi a hahthlak a, phur hi a rih viau chuan, thih daih mai hi a chakawm ve thei asin.

Pathianin a koh luih tlat, tiang thiltithei nena a thlem, a kut a phar a, tuipuisen pawh inthen phawk thei khawpa thiltihtheihnaa a thuam Mosia meuh pawh khan tum khat chu thih daih a duh ve pek a.

Mi nuai 6 zet (naupang tel lo pawhin) kilkawi kha a hahthlak viau ngei ang. Mosia mawhphurhna sanzia hi! Chutah a kilkawite hi an la phunchiar em em zui! Israel mipui rilru hrisel lohzia leh an lawm rei loh thinzia hi mak tak a ni! An vui reng a, an phun reng a. Pathian thilmak tih an hmu chamchi chung hian, an bei a dawng hma em em a. Sate hi an châk thuai thuai a, an tisa châkna a sang bawk si!!

An hetih vang hian a niang chu, Tabera hmunah Pathian thin alh a thawk ta a. Lalpa mei chuan Israel ho riahhmun pawn lam chu a tikang ta dur dur mai a. Mipuite chu an chhungkua kuain an puan in kawngka theuhvah an tap ta chel chul mai a. Pathian thin lah chu nasa takin a alh zui a. Mosia’n a zo ta bik lo va,a lungni ta lo va. A âng ve ta a.

“Engvangin nge min tihhrehawm bik reng? Engtizia nge i mit ka tlun loh a, heng mipui phurrit zawng zawng hi ka chunga i nghah? Heng ho hi ka hrin em ni? Naute hnute hne lai ang maia ka pawm hleuh hleuh turin maw ramtiam panpui tura min hruai chhuahtir? Sa châkin an tap a, hengho zawng zawng ei tur sa hi ka nei em ni? Heng mipui zawng zawng hi mahni ngawt chuan ka phur zo lo a, ka tan a rit lutuk a ni.

“Hetianga mi tih dawn chuan mi khawngaih la, mi tihlum daih law law mai la, mi tirethei tawh suh khai,” a ti ta a. (Numbers 11)

Mosia hian a phur hi rit a ti a. Tihretheih niin a inhria a, a peih tawh lo a. Thihsan daih a duh a ni. Mipui leh Pathian thinrim inkara din fo mai kha hrehawm tak tur a ni bawk a, peihawm loh tak, ngamawm loh tak tur a ni a, thihsan daih pawh a chakawm ngawt ang chu. Mosia ‘power’ dawn ang dawn ve hi a chakawm ang reng a; mahse, a mawhphurhna ang lak hi huphurhawm tak a ni. A tih theih a len ang chiahin a phur pawh hi a lian ve bawk a ni. A tui lutuk lo chung koh luih a ni a. A koh chhana ten an lawm reng bawk si lo. Ropui viau mah se, ropuinain a kalpui phurrit kha a peih tawh lo a ni.

Ni tina mawhphurhna rit ti em em, phur zo lo nia inhriaa thihsan daih châkte u, Mosia dinhmun nen in inang e. Nu phunchiar nei, pa phunchiar lutuk bula khawsa, fa phunchiar leh tihmawh em em enkawl mek te , bul vela mite lungawi lo leh âng reng mai nei ning lutuka thih daih châkte u, Mosia pawh kha chutiang chu a ni. |awngkam dengkhawng pui puia tih phiar phiar hlawh avanga thih daih duhte u, Mosia tuar hnu a ni.

Thih daih châk hi a lo zahthlak loh tawp a nih hi, Mosia meuh pawhin a châk kha maw! Mahse hei hi hriatreng tur a ni. Mahni lo intihhlum loh tur a ni.

Mosia thih châk hian tihfuh riau a nei. Pathian a au nghal. Hrui hrual a chuh nghal lo. Mosia tawngtai hian Pathian hi a au satliah a ni lo, Pathian lakah a inhrithla a, a âng tawn tawn mai a nih chu! Amaha thih nghal a tum lo a, Pathian rorelna nghakin a tihhlum a ngen ta zawk.

Thinlung tawt lutuk au chhuahpui leh sawi chhuah hi mihringin kan ngeih. Nu tam tak hi an âng bawrh bawrh a, an inang da ve mai fo. Thih duh hial khawpa hahte pawh hian inphawrh chhuah hawk hawkna a neih chuan an thawl thin.  Chu chu counselor pan tangkaina a ni.

Thih châk hial khawpa rilru hahna nei tan chuan hrilh tur zawn vat tur a ni. Ngawihpui tur a ni lo. Mahni chauha tuar atan a rit lutuk thin a, a na lutuk thei a, phurh zawh a har thin. Mi hian min chinfelpui vek thei lo mah se, tu emaw han hrilh a, hriatpuitu leh tawngtaipuitu neihte hi a tha em em a ni. Nu leh pa, u leh nau, thian tha leh mi thiamte hrilh tur a ni. Hrilh tur tumah nei lo tan pawh Mosia technique angin, Pathian hrilh a, Pathian hnena an ve bawrh bawrh mai tur a ni.

Mosia khan Pathian hnenah tihlum mai turin a dil a, a tihlum lo. Thihna kha a chhanna atan hmang lovin kawng dangin Pathianin a chhang ta a, a mawhphurhna rit tak phurhpuitute a pe ta a. Mahse, mipui leh Pathian kha a chungah an lungawi kim zel ta bik reng chuang lo. A phurrit erawh chu a phur zo ta a ni ang, thih a châk zui ta lo a niang, a thihna hmun Nebo tlang atanga Kanaan ram a thlir thu kan hmuhna hi a thih tumna hmun atang khan a hlat tawh hmel em mai!

Thih a dil lai khan tihhlum ni lo mah se Mosia kha a dam hlen chuang lo. Lalpa chhiahhlawh Mosia chu Lalpa thu angin Moab ramah chuan a thi ta a (Deut. 34:5).

Lalpa thu anga thih hun hi nghah ve tlat zel tur a ni.