Thukhawchang

MP Election

Lalthlamuana Ralte - Apr 05, 2014

MP Election

MP (Lok Sabha) inthlan a lo hnai leh ta. Tun tumah hian candidate pathum an awm a, hun kal tawh thlirin candidate an tlem ber pawl a ni nghe nghe, 1984 khan chuhtu dang awm loin Pu Lalduhoma a tling a, 1980 inthlanah khan M.P. candidate pahnih chauh an lo awm tawh a. Heng bakah hian 2004 inthlanah leh tun tumah hian candidate pathum chauh an awm a ni. Mizoram M.P. inthlanah hian party candidate ni lo tling pahnih an awm tawh a, 1980 khan independent candidate (Steering Committee aiawh) Dr. Rothuama thlan tlin a ni a, chumi hnuah 1998 khan independent candidate (CCF thlawp) Dr. H. Lallungmuana chu a lo tling tawh bawk. Tun tum M.P. inthlan boruak hi rin ai takin a sosang zawk a tih theih awm e. Thla tlem te liam ta, kum tawp maiah khan MLA inthlan boruak sang tak kan nei zo hlim hlawl a ni a, chuvang chuan boruak dai ruih hnuaiah MP kan thlang turah kan lo ngai hlawmin a rinawm. Mahse, party hrang hrangten candidate an han puan hnu lawk atang khan rin aiin inthlan boruak a tang tha a, mimala inbeihna rawngkai te a khat tawkin kan hre chhoh ta malh malh a, mipui nawlpuiin ngaihven teh chiam lo mah ila party politics erawh a sosang a tih loh theih loh. Naktip nakthai maia inthlang tur kan nih avangin candidate-te leh a behbawm politics thlir thuak thuak ta ila Candidate pathumte hi anmahni tlatna mualah chuan pa ngaihtuahawm lo tak vek an ni hlawm a. An campaign auhla leh an thu ken theuh atang pawhin pa naran chung lam an ni tih hai rual a ni lo, an thawm pawh rin aiin a na phian. An zingah hian UDF thlawp independent candidate awm chhun Pu Robert Romawia Royte hi boruak nei ber a ni a tih theih ang, party tangrual hoin an dawr lai atangin thawm a nei a, chanchinbu hrang hrang phek hmalama mahni insawifiahna (Rejoinder) a chhuah nghal ngawt lai atang khan a thawm nat dan tur chu a hriat lawk theih awm e. Campaign tan tirh atangin MP ni lai, congress party candidate Pu C.L. Ruala kum zatin sawi a hlawh a, a upa tawh mah mah tih tawngkam chu UDF lamin an vawrh darh thiam viau a. Chumi chhan letna atan chuan kum upat hi MP tan a tangkaina te, mi zah an phurh zia te, politics a mi senior tawh te tan thil tih a awlsam thu te lehlamin an sawi ve thung. Dik tak chuan kan MP candidate-te hian an kum zat dik tak an hmang vek em? tih hi zawhna awm thei tak a ni, rin aia lo naupang zawkte an awm si a. Tun tum MP inthlan campaign auhla langsar ber pakhat chu ram hmasawnna (development issue) a ni teh daih hi a mak ang reng viau. Chutihlaiin, mipui hmaa candidate-te thusawi thenkhat hi chu MLA inthlan manifesto ni zawk awm tak te pawh a ni. MP te hi chu Mizoram aiawh a Parliament member an nih avangin state sorkarah thuk takin an inrawlh thei lo a, state sorkar hmalaknaah pawh an pawimawhna engemaw chen awm mahse a fatu ber an ni ngai lem lo. Chutiang chu a nih avangin candidate-te pathumin MPF buatsaih Joint Platform a an hmalakna tura an sawi thenkhat pawh kha chief minister leh minister rualte sawi tur ni zawk awm tak a ni. Kawlphetha tam zawk siam chhuak tur te, Constitution 6th Schedule in a sawi anga district council a dah let leh chungchang te, union budget atanga sum hai lut tura department hrang hrang nawr te, intodelh tura hmalak te, eirukna tihbo te leh a dangte hi chu Mizoram sorkar hmalakna tur huang a nih zawk hmel. Mahse, candidate pathumte hian an kuang lo an nawr tih ngawt chi erawh a ni lo thei lo, mipui hip turin ngaihtuahna an seng viau a, hmalak an tum dan tha tak takte pawh hi thlan tlin lo ni ta se engemaw chen chu an bawhzui thei ngei turah ngai ila. Candidate zinga pahnih Pu C.L. Ruala leh Pu Robert Romawia te hi an zin kual tam deuh bik a, an thlen chin bak hi anmahni thlawptu politician lawk tak takten an chhui zui zel bawk avangin an thawm a na a, a tu zawk zawk emaw hi tling turah ngaih an ni ang. Anni pahnih inbeih dan hi a 'class' a hniam vak lo khawp mai, mimala an chak lohna lai ve ve an in hmuhsak a, chu lai tak chu an inchuk chat chat zel a ni ber. MP ni lai Pu Ruala chu parliament a attendance tha ber pawl ni chunga thawm nei lo berah an chhuah a, tunhma atanga politics tawngkam awm sa 'MP ngawi reng' tih ri pawh kan hre zing hle a ni. Hei hi amah Pu C.L. Ruala pawhin a zep bik lo a, MP vawi khatna nih a ruling MP ni bawk tan thusawina chan a har thu a sawi phah fo a, mahse, a insawifiahna hi fiah zo tak tak maw. Ruling MP, kum lamah pawh senior tak a ni chungin kum 5 kal ta chhung khan a hmalakna sawi tur a vang tih te pawh eptu tangrualte sawi lan fo a ni bawk. Independent candidate RRR pawh hi tunhmaa sorkar hna a thawh laia a lo hmingchhiat tawh dan te, thubuai nei a nih thu te, rilru lama harsatna a lo tawh dan te thlengin phawrh lan a ni bawk. Ani pawh hi a insawi fiah nasa viau a, mipuiin ngahdan engtin nge an siam tih erawh a hriat loh thung. Tun tum tluka MP election a mimal inbeihna a nat tum hi a la awm lo hial mai thei. Party pawn lam atanga lo thlirtu tan chuan an thu inchuh lian ber pakhat development project atana sum hai luh chungchang hi fim taka ngaihtuah chi niin a lang. Kan state budget pawisa bakah sorkar laipui leh hmun dang atanga sum hai luh tur hi a tam hle a, tunlaia college hrang hrang leh zirna in hrang hrangte pawh hian UGC leh hmun dang atangin pawisa an hai lut nual a ni. Mahse, development project/work lian tham tak takah chuan state sorkar kal tlang lo a hmuh a har viauin a rinawm. Chulai tak chu candidate-te pahnih thu inchuh lai pawh a ni. UDF candidate hi consultancy firm neitu a ni a, an hnapui ber pawh project siam a, sum zawn hmuh a ni a. Chuvangin, state sorkar kal tlang chiah lo a hnathawhna tur sum hai luh dan tur chu engemaw chen chu a hria a nih hmel a, a hre awm ber pawh a ni nghe nghe. Chutihlaiin, congress party campaigner chief minister leh a thawhpuite hian state sorkar kal tlang lo chuan hna lian tham a hmuh theih loh an tih bur pawh hi a dikin a rinawm, hna lian deuh sum hrawm na deuh chinah chuan state sorkarin a lo do letna tur (Matching share) te a lo ngai a, a mawhphurtu (guarantor) a tan a ngaih chang a awm bawk ang. Chuvangin, an sawi tum azirin he thuah hi chuan an dik ve ve thei tho awm e. Hemi chungchangah hian AAP candidate Pu Manzuala ngaihdan hi, tun a kan dinhmunah hi chuan, a pawimawh zaw ber awm asin. Sum hai luh chiam chiam hi kan chhiatpui thei a, UT nih tirh a sum lo luang lut reng kha kan chhiat zui phah a nih kha. Dik taka sum hman leh inrenchem hian bul tan phawt ila kan hmasawnna tur bulpui nghet kan siam thei mai lo maw? Sorkar tha, pawisa leh therhlo lak rintlak hruaitu tha neih phawt a tul tihna angah ngai ila..chu chu kan mamawh rih ber mai lo maw? MP inthlan behbawm thenkhatte erawh hi chu a nawi tih ka nei nual. Candidate atana an sawm mek laia rejoinder siam leh han puanzar chiam mai te kha a tih chi ber em, eng party candidate pawh ni thei anga ngaihtheih tura intarlan kha a fuh ber ang em, a tih theih. Chutihlaiin, chief minister-in independent candidate hi a hriat loh thu leh a la hmuh loh thu a sawi te kha chu zia lo tak a ni, ama mimal mizia a pholang mai bakah campaign hmanraw mawihnai lo tak niin a lang. Chumi hnu a Mizoram sorkar leh NECS thawhhona tihtawp a nih tur thu a sawi te pawh kha a lutuk deuh chu a ni. Engpawhnise, a tua pawh tling se Lok Sabha MP pakhat chauh kan neih avangin mi chak leh vengva tak, vaiho zinga intat lut thiam tak tan lo chuan Delhi-ah khuan huhang neih a har khawp ang. Chutiang mi chu MP atan hian kan la thlang chhuak ngai chiah lo pawhin a lang. Hmarchhaka kan unaute zingah hi chuan Parliament bakah India politics nghawr nghing khawpa pa lian an awm tawh a, India politics lipui a a pawn lai a cheng tur ni lo, a thuk laia ngampa taka inchhek kual thei tur mi engtikah emaw chuan kan la nei ve turah ngai ang.
Share now