India ram MP inthlan result puan a ni ta a, media hrang hrangten an lo chhut lawk aia nasa daihin BJP leh an thawhpui party-te an chak a, chutiang thoin beisei aia nasa daihin rorel lai congress party leh an thawhpuite an che chhe bawk. Vai ram lamah politics boruak inlumlet nasa tak mai kan hmuh laiin Mizoramah chuan politics inlehburhna thleng loin rorel lai party candidate Pu C.L.Ruala bawk MP atan thlan tlin a ni a, Hrangturzo bial bye-election-ah pawh nikum inthlan a tling party tho an chak leh bawk. Khu lama Pu Narendra Modi leh a thuihhruaiten hnehna ropui tak an chan lai hian hmarchhak bialah pawh hma an rawn sawn hle tih loh rual a ni lo. A bikin MP ngah ber Assam-ah phei chuan BJP candidate pasarih an tling a, inthlan hmasa aiin pathumin an pung nghe nghe a ni. MP pahnih nei Meghalaya-ah pawh NDA thawhpui tur party (NNP) candidate P.A. Sangma a tling leh a, Nagaland-ah pawh MP seat awm chhun chu NDA thawhpui tur chiang sa NPF candidate, chief minister ni bawk Neiphiu Rio chuan hneh takin a chang bawk. Chutiang bawkin Arunachal Pradesh-ah pawh assembly inthlanah rorel lai congress chak mahse MP seat pahniha pakhat zawk chu BJP in an la thung. Hetianga India ram mipuite ak rual a kan hmarchhak unaute an ak ve sup sup lai hian Mizoram leh Manipur-ah chuan INC candidate chauh an tling thung a, Tripura-ah pawh MP seat awm chhun pahnih chu rorel lai party CPM thoin an chang leh bawk. Phaizawl a lotus a par vul chuk lai hian hmarchhak tlangram thenkhatah pawh par tan ve mek mah se, Mizoramah chuan a kuhmum pawh a la chhuah thei tak tak lo. Sakhuana nena inzawm party lian lam hawia kan la thle dual rih lo hi a vanneihthlak rih viau ti zawng pawhin ngaihtuah theih ang. Chutihlaiin, tunhma lama BJP nena insuihzawm hlauhawmzia politics a inchirhthehna ang kha a reh hret hret a, mipui rilruah pawh chutianga inbeihna chu a tla na tawh vak loin a lang bawk. Engpawh nise, BJP an lian a nih chuan Kristiante leh Hindu sakhaw be ve lote tan a tawrhhlelhawm dawn ni a ngaihna lian tak mai hi kan rilruah thui tak a la awm tlat a, India ram politics ngaihven tan chuan BJP suk thlek zawng leh an kalphungah hei hi hai rual a ni lo reng bawk a. India ram kalphung han thlir hian Mizoram leh hmarchhak biala chengte tana tha ber ni a lang chu tualto party (regional party) lian tak hi national party nena inbei tawk takin awm reng se, chu chu phai vaiho laka hnam hrang kan nihna vawn nun rengna atan leh kan sakhua leh hnamzia humhimna atan pawh a pawimawh hle a ni. Hnam lian zawkte awpna hnuaia awm, an neih ringa khawsa ve tawk tawkte tan phei chuan inchimral hlauhna kan neih reng pawh hi a tul hle a ni, kan him emaw kan intih mek lai hian ven him ngai tak hnam kan ni reng tih hi hre thar leh thin ila a tha. Chutiang zawnga ngaihtuahna seng thin politician kan neih loh hunah chuan inchhirin ban a chen ngei ang. Zirtawpni a puan tak MP inthlan result kha tling zo ta lo tualto party hrang hrang inhlawmkhawm (UDF) ten an ui tluk zetin congress party pawh an lawm lo ngeiin a rinawm. ‘Inthlanah hi chuan mipui kut thlakna hi a mak thei viau a nia’ an lo tih thin angin nikum kum tawp lama MLA inthlan result leh MP inthlan result-a hian ngawi renga mipui sukthlek inthlak dawrh kan hmu. Party tan bur nei lem lo, vote hmanga mahni ngaihdan puang chhuak thin ang chi hi kan lo tam khawp mai tih a lang. Hetianga party tan bik nei lem lo, inthlan dawn a politics boruak thlir chunga vote thlak thin ‘swing voters’ an tih, keinin ‘neutral’ kan tih mai te hian democracy rama inthlannaah hian thu an lo nei ber mai. Hmanni lawk MLA inthlan a hneh taka tling a, bial 34 zet la thei congress party khan thla 4 lek a vei hnu MP inthlannaah bial 20 chiahah an chak leh lawi si hian rorel lai party tan pawh mahni inen let fo a tulzia a tilang khawp ang. Chutihlaiin, party hrang hrang 8 intelkhawmin an beih rawn vangah an puh thei tho ang a, a dikna chen pawh a awm. UDF a tel party-te an tan rual that zia kha hai rual a ni lo. Mahse, INC candidate kha Chief Minister leh a thuihruai Minister rual leh MLA 34 ten an campaign pui luih luih a, politician-te tawngkam takin ‘ruling fuat’ ringawt pawh nasa taka chakpuina tham tling tur chu a nih laiin an vote hmuh inthlauhna hian ngaihtuah a tithui a, an party hruaitute kan titi puite ngei pawhin mak an tih thu an sawi. Bial pahnih pathum vela an hnehna sang tak vanga tling chauh an ni ti zawng pawhin a sawi theih awm e. Inthlan hun kha kar 2 vel phei chuan tlai ta se UDF candidate zawk hi a tling lo ang tih a sawi theih lo, chu chu congress hruaitu thenkhat sawi dan pawh a ni. Kan la hria anga 2008 kum tawpa MLA inthlannaah congress party-in seat 32 lain hneh takin an tling a, 2009 kum tir lamah MP inthlannaah pawh an candidate Pu C.L. Ruala’n vote tla zinga 65.58% hmuin amah hnaih bertu chu vote 108955 zetin a hneh a, Mizoram inthlan a inhnehna sang ber a ni nghe nghe a nih kha. Tun tum inthlanah pawh hian MLA inthlan a bial 34 zet a chak zo hlim an nih avangin an tan chuan beiseina a sang viau ang. Chumai bakah UDF lam hian candidate an tichiang lawk thei lo a, chawlhkar hnih awrh campaign hun an nei a nih kha. Chutiang a nih lai chuan Aizawl khawpui chhunga bial zawng zawngah leh Lunglei khawpui bial 3 a UDF candidate a chak zawk a, Khawzawl (Tuichang), Kolasib leh Lawngtlai East ah pawh. A bikin Aizawl khawpui chhunga UDF an chak leh tak thut na chhan hi eng nge niang? Inthlan dawn hnaia politics behbawm boruak hrang hrang a lo chhuak kha congress hian an tuar a ni mai thei, an candidate a upat tawh vang pawh a ni mai thei bawk. Chung zawng zawng bakah MLTP Act hlih tumna khan vote a hnar viauin a rinawm. Kum tir lam atang khan home minister-in vawi khat aia tam MLTP Act hlih a nih tur thu leh “Kohhran kan rawn lo ang” a tih tawngkam khan kohhran mite leh tlawmngai pawlte bakah zu vanga harsatna tawk chhungkaw tam tak rilru a chawktho tih hi phat rual a ni lo. Langsar taka politics tuipui ngai lo kohhran rawngbawltuten an vote hmangin an chhang let ta a ni ngei ang. Chu chu Mizoram chhung hmun hrang hrang inthlan result-ah pawh a lo lang a ni mai lo maw?