Computer khawih thang chuan ‘txt’ chu Notepad file sawina a ni tih kan hre mai ang. Mahse, kan sawi tum hi chu 2019 March thlaa indin, South Korean boyband, member panga—Soobin, HueningKai, Beomgyu, Yeonjun te leh Taehyun te band hming ‘Tomorrow X Together’ emaw ‘Tomorrow By Together’ tihna a ni. Anni hian khawvêl beng titlai tûr rimawi an chhawp chhuak mêk a; an sûk rualin kan thalaite an su leh dual maithei a, an sam rawng pawh kan putpui leh fur mai thei a ni.

Anni leh keini: K-pop hian rimawi khawvêl an ngam ti tih ta dêr mai. Taylor Swift leh Drake te kârah BTS leh Blackpink te an inrawlh châwl ta lo a. Tûn hma atanga American leh English mi ta bil tûra kan hauh Grammy Awards lah an lâk khalh ta fo mai. Boyoncé lâr tluk zetin Blackpink member, Rosé lo lâr ve ta ngawt mai te hi, tûnlai rimawi khawvêla thil thleng danglam tak chu a ni chiang a ni. Keini chu Zakir Hussain (2008) leh Ravi Shankar (2013) te leh mi dang pahnih hnua Grammy awards dawnga khawvêl dêng chhuak thei kan la nei leh thei ta tlat lo mai a nih hi!

Seoul lam chhuak thâwm hi tûnlai thangthar Gen Z (Zee) te tana ngaihnawm a nih laiin keini Gen X leh Gen Y/Millennials-ho, Don Williams leh Dolly Parton tuipui tâwp hlei thei loho tan chuan ninawm lamah a kal deuh tawh a. Mahse, kan faten an tuipui miau chuan kan hriat ve zêl a ngai a. |hianpa Clayton-a sawi dân takin, ‘Kore kalchar’ ka rawn chhawp hluai a ni e.

TXT te chu: BTS hlawhtlinpuitu Big Hit Entertainment hnuai din TXT band hian March 4, 2019 khan an EP hmasa ber ‘The Dream Chapter: Star’ an ti chhuak a. He album hian Gaon Album Chart-ah leh Billboard World Albums Chart-ah #1 a hauh nghal. US Billboard 200-ah pawh #140 a thleng pha hial. K-pop male group band debut album-a thleng sâng ber an ni pha tlat. An single ‘Crown’ chu Billboard Emerging Artists Chart-ah a chungnung ber dinhmunah a ding vûn a; K-Pop group zinga World Digital Songs-a thleng sâng chak ber an nih phah hial. Hêng mi pangate hian award semna hrang hrangah new artist of the year lawmman an dawng chho mawlh mawlh mai.

An website-a an târ lan, an band din chhan hi ka duh riau a; an chanchin ka ziah chhan pawh a ni bawk. Tomorrow by Together tih hi mi panga lek intêl khâwma insuih fin tlatin, ram tha lehzual zâwk beiseina nei rân chunga ‘naktûk tha zâwk’ din an tumna a nih thu an ziak a ni.

Ni e, mi tam tak hi chu kan awm awmin kan awm nâw nâw a. Naktûka keimah tha zâwk nih tumna pawh nei lo hian kan thle ve mai mai a. Kan hnâ te leh chu ngaia neihin, hlawh hmuh nân mai kan thawk ve nawk nawk ringawt a. Keimah leh ka ram tana hmasawn tumna emaw, a aia tha zâwk din tumna rilru pû-a hna thawk thin hi kan tlêm khawpin ka hre ve thin. 

An dinhmun leh kan dinhmun: Kan fa, Gen Z-ho ngaihsân hi ngun leh chîk takin i thlîrpui ve zêl ang u. Hetia K-Pop culture-in khawvêl a hrût rual hian Gen Z-ho pawh hi a hrût ve tho tih hi pawm mai a ngai. A nih leh, kan vânglai khan G N’ R emaw Elvis Presley emaw, a… Skeeter Davis emaw pawh kan ngaisâng lo bîk em ni? The Beatles-ho style te kha la chhâwng miah loin em ni sam kan zuah ve ngawt? Kan kekawr tlâng kan tih arh vena chhan te leh hippies hun laia kan note bû-a peace sign kan ziah rân chuai chuaina chhan te kha… keimahni style ve ngau ngau a nih bîk ka ring hauh lo. Santa Barbara atanga Baywatch en loh hlau nu tam zia te leh Prem-a chah chhuah tum thâwm than nat zia te pawh kha ti r’u? Kan fate hi dem bîk ngawt thei kan ni bîk lo, ka ti tlat—kei chuan.

Tin, khitiang ram zîm tê, 2020-a mi vaibelchhe nga leh tih lek (5,12,69,185) awmna S Korea ram leh 2020 kum thoa mi vaibelchhe za sawm thum leh pariat chuang awmna India ram hi han khaikhin ta ila; kan thawh chhuah nen. Anni S. Korean-ho chuan kum khatah mi pakhatin India pawisa Rs 22,82,120.45 an thawk chhuak thei a; keini chuan Rs 1,35,000 vêl kan thawk chhuak! Nikuma World Bank-in a chhût dân chuan za-a 33 laiin an ram pum sum hnâr hi industry-in a châwm a. Khawvêla semiconductors siam chhuaktu lian ber ram an nih laiin keini ram sum deh chhuah tamna ber chu, lo neih a la ni ta reng a; website hrang hrangah ‘Agriculture is the backbone of the country’ tiin kan ram dinhmun an la ziak kulh reng!

Hripui lên hma 2019 khan an rama company lian ber Samsung chuan US dollar 206 billion hlâwkna an hmu a, Hyundai Motor chuan khawvel pumah motor mtd. 7.2 an hralh chhuak. Anni bâkah Kia Motors, LG Electronics tih te an la kawl bawk. Keini inchhuan vena ber Reliance chuan 2019 khan US dollar 6.3 billion dollar hlâwkna an hmu ve eih eih chauh a; Tata motors chuan khawvêl ram pum puiah motor 54,439 an hralh chhuak! Kan va han inthlau rem rem ve le!

Infiamnaah pawh ni se, Mizote mai ni lo kâr tina khawvêl mit fûkna English Premier League-ah Son Heung-min an nei mêk a; Park Ji-Sung kan hre tawh bawk a; Newcastle player pawimawh thin Ki Sung-yeung an lo nei tawh bawk. Keini chuan eng Singh-a emaw eng Kumar-a emaw thawh chhuah kan la nei ve lo!

Ngaihsân tûr dik: An hla te, an style ringawt entawn erawh a fuh ber lo maithei. Hlawhtlinna kawng an zawhna kawnga taimâk an chhuahna te; North Korea aia chungnun tuma tho chhuak tûra an beih dân zawng zawngte ziah sên a ni lo a. An sam rawng ringawt entawn lo hian an taimâk zia te, lâm zir ringawta an hun leh tha sên nasat zia te hi zir nachâng i hre ve tawh ang u aw…

Thle mai mai lo leh duh duh huna call theih emaw WhatsApp message chhâng hman ni mai lo hian, hawh u, TXT band indin chhan ang hian, ‘Keimah leh ka ram tana naktûk tha zâwk’ din thar tumin rilru i siam thar ve teh ang u. Anni chuan khawvêl ngam an tum mêk lai hian, kan ramrî tal hi chu hum ngam tumin rilru thar i pu ve teh ang u khai.