Zawhna: Ka pu, hei kan nu nen hian kum 10 lai chu Pathian zarah kan lo innei ve ta a; mahse, nau hi kan pai thei miah lo mai a. Kan nu hi chuan fa chu kan inneih hma hian a nei tawh a; mahse, kum 10 chuang a ni tawh bawk si a. Tin, a la period reng bawk a, beiseinate kan han nei ve thin bawk a; mahse, eng a ni leh chuang bawk si lo. Tin, keimah hi zu in thin ka ni a; mahse, ka pu, RV-a zu zuar te, day/night ti mai ang, khung hote pawh khuan fate an nei leh mai thin bawk sia, engnge awmzia? Mi dang kan zawhte lahin zu in lo late min han ti ngawt a, ka zawhte lah zu in mi tho, fa nei thei zet zette an ni lawi bawk si a. Ka mangang ve tawh khawp mai, khawngaihin min puih dan i hria ang em ka pu?

Chhanna: Fa neih hi kan rawn tar lan fo tawh angin kan thu lo khawp mai a, hrisel loh hmel tak, chawrche hmel deuh deuhte hi fa nei duah an awm a, chutih laiin fa tam tak hring thei tur ngeia lang hriselte hi fa nei thei lo an awm leh fo bawk. Hmeichhe lam fel lohna eng emaw tak vangin a awm thei a, a bik takin kum a lo tam hian fa neih an harsat fo bawk. Chi kawng ping vang te, chhul lam emaw, chibawm lam fel lohna emaw avangin hmeichhia hian fa an pai thei lo fo. Fa an neih hnuah pawh neih chhunzawm thei tawh lo hi an awm ve nual; a chhan hriat loh hi a tam zawk an ni thin. Mipa lam fel lohna avangin fa nei thei lo an awm ve fo mai a, chumi zingah chuan zu leh ruihtheih thil tih nasat vanga chi insiam tlem, chi fel lote an awm bawk thin.

In harsatna pui tur che u hian doctor in inentir tawh em tih i sawi lo va. Kum 10 lai mai in inneih tawh hnua fa in la neih loh avang hian eng emaw fel lo chu a awm ngeiin a rinawm. Chumi hre tur chuan in nu hi check-up a ngai ang a. Investigation hrang hrang tihte pawh a tul ang. Nang pawh i chi that leh that loh (Sperm count/motility test etc) te bakah i thin function te leh thil dang te pawh check chian i tul ngei ang. Chuvangin in tih tur hmasa ber chu hmeichhe doctor ah inentir phawt mai ula. A tul angin an lo check che u anga, an puih theih ngei che u ka beisei. Nangmahni ang tho a fa neih harsat, in-check chian hnua fa nei leh hi an awm fo a nia.