Hetiang lam zawhna hi khai khawm ta mai ila. Chu bakah chuan a kaihhnawih information pawimawh nia ka hriat te ka han thailang tel bawk duh a, chhiartute'n min lo hriatthiam ka beisei. Zawhna hi a thahnem thei ang reng a, tum khatah zawhna pahnih khat bak kan chhang thei thin silova, hetia khaikhawm hian a remchang ni ah ka han ngai a ni. Naupai theih leh theih loh hi a chhan tam tak a awm thei a, thenkhat erawh a chhan hriat theih miah loh, harsatna awm hriat si loh pai thei lo ve tawp mai te pawh an awm nawk. Chutiang ang te chu chi inmil lo ti te pawhin kan sawi fo thin. Hmeichhia hian thi an neih "mense" atang chuan an neih chhung chu naupai thei tura ngaih a ni a, amaherawhchu kum a tam tial tial a, an pai theihna chance a tlem tial tial. Mipa erawh kum upa tak taka fa la nei te an awm fo a, chuvangin an dam chhung hi chuan chi thlah thei "Fertile" anga ngaih an ni thung. World Health Organization (WHO) in a hrilhfiahna ah chuan hmeichhia hi invenna tel hauh lova regular taka kum khat chhung sex an hman hnu pawha nau an la pai loh chuan naupai thei lo "Infertile" anga ngaih a ni. |henkhat ah chuan an awmna ram leh hnam azirin a dang thei bawk a, hrilhfiahna thenkhat ah chuan kum hnih lai te pawh an telh thung. Engpawhnise, naupai theih leh theih loh hi a chhan a zirin enkawl emaw siam that theih a ni a, thenkhat erawhchu pai thei lo hrim hrim an awm thung. A dang leh ah chuan pai si a, a neih hun hmaa chhiat leh thin an awm fo bawk. A chhan hre tur hian test hrang hrang tih a ngai a, mipa pawhin an chi exam "sperm count/test" an tih te pawh a ngai thin. Hmeichhe lam doctor Gynecologist rawn ngei tur a ni a, anni hian an lo pui thei che u a ni. Tunlai hian phai lamah In-Vitro Fertilization (IVF) hmanga nau in pai tir an awm ta zauh zauh a, a ti fuh an awm a, thenkhat chu fuh lo an awm fo bawk. Mihring kan in an loh avangin a hlawhtling vek thei lo a ni. Nau pai hian mi tam zawk chuan mipa nge hmeichhia tih lam hi kan vei thin khawp a, mahse kan thu anih loh zia hi hriat a tha khawp mai. Nu in thla 9 chhung nau a pai lai hian thil pawi thei, fuh lo thei tam tak a awm a, chuvangin a hun taka nau, fu ke kim an neih tluka hlu a awm lo. Mihring thiamna sang ber pawhin a tih theih chin hi a awm a, vawi nga lai nau chhiat te ka lo dawngsawng thin a, nau neih chungchangah hian kan thu loh zia hi ka chiang khawp mai. Chuvangin tha taka nau pai theih a, a hun taka naute pangngai tak, harsatna lian tham awm lova kan neih theih hian Pathian hnena lawmthu sawi tur kan ni zawk. Hmeichhia bik hi kan sawi tak angin an kum a tam angin nau an pai theihna chance a tlem tial tial a. Chu mai bakah chuan kum 30 hnu lam phei hi chuan kumkuruh a lo khawng tawh thin a, neih pangngaia neih theihna chance pawh a tlahniam tial tial bawk. Tun kum 10 chhung hian nupui pasal neih kum a sang chho a, hmeichhe tam tak chu kum 30 hnu lama pasal nei an ni ta fur. Chutiang avang chuan neih pangngaia fa nei aiin zai chhuah pawh kan tam chho ta niin a lang. Nau neih hi a theih hram chuan neih pangngai ni thei se, fa pawh an nei tam thei zawk dawn a. Amaherawhchu nau neih hi a ken tel na tawrh ngai te avang hian inzai mai thlang an awm fo thin. Chuvangin naupai te neih pangngaia an neih theih nana buatsaih a tul thin a, hmun changkang zawkah chuan Counselor te'n nu naupai te nau tha taka neih dan te zirtirin hlau lo tur leh, inbuatsaihna tha tak nena nau an neih theih nan an titi pui thin a. Heng ang te hi kan ramah pawh ching chho ve zel ila, nu naupai te tan a tangkai ngei ka ring.