Khuaikhem tawk tleirawl khawngaihthlak nun khawlo zui ta chanchin an sawi ka hre leh tawh! A khuaikhemtu lah chu ‘laina hnai em em’ a ni lehnghal awm e. Kan in chhungah ngei hian kan fate an him lo thei dawn a nih hi. An patea te, putea te, pahrawn te, cousin te leh chhungkaw thian tha kan tih te hi kan fate tana mi hlauhawm an lo ni daih thei asin!

Mutna an indaih loh avangin hmeichhe naupang pakhat chu a hreh chung chung a patea bulah an riahtir a. Chu zan chu a tana zan rapthlak ber a lo ni ta si. Naupang pakhat chu a cousin tlangvalin zana dawr kalpuiah a sawm a, a duh lo a, A nu chuan, “Han kalpui rawh, i u thute i hnial mai mai,” a lo ti a. Chumi zawha thil thleng chu rapthlak tak a ni! Nu chhuak turin a fanu chu kawmthlanga ‘a pu’ bulah a dah dawn a, naupang duh lo chu a tap vak vak a. A nu chuan ben thawr thawr pahin, “I puin a lo awm hman che chuan lawmhle ta che!” a ti hlawk hlawk a. A kalsan ta a. Chu ‘a pu’ chuan a nun a lo tichhe ta vek si a le!

Naupang aw hian ngaihthlatu nei se la aw! Naupang ngaihdan hi zahsak ni se chuan maw! Heng thil pawi rapthlak tak hi a thleng lo tur a nia le! Naupang hian, “Aih, ka duh lo,” an ti ve thiang lo em ni le?

Thian tha leh hmelhriat tute emaw lo lengin kan fate pawm an han tum a, an duh loh hian, nu leh pa thenkhat chuan, “I patea a nih kha, in pawmtir rawh,” tihte an ching thin. Naupang chuk te, inchuktirte hi kan uar viau. An duh loh hian, “I pu a nihkha! Engati nge i chuk duh loh?” ti ta vakte pawh a awm theih. Chhungte nih vangin an duh duhin an ti thiang em ni? Naupang pawm a, kuah a, chhaih chukchuk hi a nuam khawp mai. Mahse, chumi avanga an duh loh thleng thlenga nawr beha fiam phal a ni bik dawn em ni?

Mi dang ngaina tura kan zirtir rualin infiam dan leh inchhaih dana him lo chin kan hrilh hre ngei tur a ni zawk. Tih duh loh an neih hian pawngpaw vin nghal ngawt chi a ni lo. A chhan ngaihthlaksak phawt a, chumi azira tih zui ngai a awm chuan hmalak zui mai tur zawka ni.

‘Aia upate thu awih tur’ tih kan inzirtir duh lai hian a piaha thil awm thei zirtir tel an ngai thung. Kan fate hi miin ngaina se, min duatpui se kan duh rual hian fimkhur a ngai em em a ni. Thuawihna tur chin ramri khamsak ngei tur a ni. Aia upate thuawih tih awmzia hi fiah takin hrilh tur. Thuawihna dik leh dik lo a awm a, aia upate thu a nih avang ngawtin ihe lova zawm mai tur a ni tih ngawt a fuh lo. Aiaupate hi zah tur an ni a, an sawi leh tihpui an tum chu tha lo leh dik lo leh nuam lo an tih chuan an hnial thiang tih hrilh a tha zawk.

Kan naupan lai (han ti ve ngial ila) khan aia upaten meizial tan tura naupang tirh an ching thin. Katih theih loh zawng tak a nih avangin, “Nawalh ka va laksak zawk mai ang che,’ tiin an thuawih dan kawng dang ka zawng mai thin. Naupang hian ngaihdan leh duh dan nei ve thiang lo ang maia kan inzirtir mawl lutuk hian thil pawi a thleng fo. Aia upate zah chung sia hnial dan mawihnai a awm thute hi zirtir tel a vatul em!

Naupangin ‘aih’ an tih hi zaksak ve tur a ni. Naupang hian an duh lo thiang. Kan inchhungah ngei hian thil pawi a thlen loh nan kan fate aw hi ngaihthla ve fo teh ang u.