Zawhna: Ka pu, ZALEN chanchinbu a Daktawr zawhna hi kan lo tangkaipui thin khawp mai. Zawhna kan zawh ve duh chu kan fapa hi kum 5 mi a ni a, amah hi a rualpuite ai hian a sawngnawi deuh a, englai mai pawh hian a chaw ei hi a nep khawp mai a. Nikuma Doctor kan rawn khan a ril a chaklo tiin damdawi a chawh a, amah ah insawiselna awmloh chuan cher mahse a pawilo a ti a, a ek hi a dum deuh reng mai bawk si a, vitamin a ei loh pawn a ek hi a dum deuh reng ang a ni. Min puih theih chuan kan lawm khawp ang. – Mana, Republic

Chhanna: Ek dum hi a chhan hrang hrang a awm thei a. Ei leh in avang te, chawkawng leh ril khawi lai ber atanga thisen leak vang te, thisen lam fel loh vang te, hnar emaw ha hni (gums) thi thin an lem vang te, damdawi thenkhat vang te in a awm thei a. Engpawhnise, pawimawh ber chu enge a chhan hriat tum phawt kha a ni.

Ek rawng hi a chhan hrang hrang vangin a danglam thei a. Ek ah thisen lar deuh a awm hi chuan rilpui emaw mawngkaw hnaih lai vel atanga thisen leak (bleeding) vang ani deuh ber a. Pile harsatna nei te ah a awm duh a. Ek a dum emaw a uk lam anih chuan chawkawng emaw ril te (small intestine) atanga thisen leak (bleeding) vang a ni duh viau. Bleeding vanga ek dum anih leh nih loh hriat nan ek exam (Stool Occult Blood test) tih ngei a tul hmel.

Tin, sawngnawi deuh anga i sawi avang hian a thisen a lo hniam (Hb hniam) te a lo ni palh thei a, bleeding vanga Hb hniam a awm thei a, chuvangin blood Hb check a pawimawh leh bawk ang. Tin, ei leh in digest chak lo bik hi an awm duh bawk a, thin tha lo emaw chak lo te ah hian ek rawng a buai duh viau bawk.

Sawi tak angin ha hni thi hma hi an awm a, naupang lamah a common thei bawk. Chuvangin ha doctor te entir a tul thei ang. Tin, hnar thi hi hnar ah chhuak lovin an lem fo thei a. Hriat loh hian a awm thei bawk a, chuvangin ENT lam doctor te check tir tel a tul hmel bawk.

Engpawhnise, naupang lam specialist Pediatrician te lo inentir leh thei ula, a chhan an hriat chhuah mai a rinawm. Mahni thu erawh chuan damdawi pek mai loh nise. A ei leh in lam te pawh uluk puiin, hmawmsawm lam te uar lovin chaw pangngai ei that tir tum ula, hma in sawn theih ka ring.