Zawhna: Ka fate hi an thang theilo riau mai a, ostocalcium ka pe thin a, pek reng hi a pawi em? An lo than ve theih nan engtinnge ka enkawl ang? Kum 5 leh kum 2 an ni e. Chhanna: Naupang than dan chungchang hi sawi dan chi hrang hrang a awm thei a, a sang zawnga an than ngawt hi a pawimawh lova, physical and motor development, sensory and cognitive development an tih te hi an ngai pawimawh tel vek a, chumi awmzia ber chu taksa chak lama an than dan te, thian kawm kawngah te, zun leh ek thiar kawnga an hmasawn dan te ani duah ani. Tin, an kum bithliah in eng chen nge an tih theih tur ang zawng te pawhin tehna an siam thin bawk. Chutiang chu anih vangin a san zawnga an thang tha nia an lan laiin thil dangah an hnufum thei tihna ani. San zawng bikah hi chuan tehna an hman a in ang chiah lova, tlanglawn taka an hman pakhat chu kum khat chhungin inches hnih leh a chanve (2 1/2 inches) talin an thang tur ani tih hi a ni. Naupang than kawngah hian thil hrang hrang a inrawlh a. Pawimawh zualah chuan ei leh in te, nu in nau a pai laia a mamawh ang chaw a ei that loh leh damdawi engemaw a ei vang te, genetic factor an tih, nu leh pa sang lo chu an fate pawh an sang hran lo tia an sawi thin te, hormones lam fel lo vang te, damlohna thenkhat vang te (kal tha lo, lung tha lo, chuap lam insawiselna etc) a ni. Ei leh in hi chumi kawngah chuan a pawimawh hle. Calcium hi an mamawh zual chu ani ngei a, amaherawhchu balanced diet tia kan sawi thin, an mamawh tawk chaw tha an ei hi a pawimawh em em a ni. Chutiang kan sawi chuan eitir teuh teuh lam ni lovin ei hunbi mumal tak siam te, an kum rawn tam ang zela an ei zat tih tam hret hret te, hmawmsawm leh fast food ei uar lova in lama chaw mumal taka ei thattir zawk te hi a pawimawh em em a ni. Calcium a hranpaa pek ai chuan bawnghnute hian an mamawh chu a phurhruk thei viau bawk. Tin, zan lama an mut that hi a pawimawh hle. Mipa leh hmeichhia hi an than dan a in ang lo bawk a, a te lamah hi chuan hmeichhia aiin mipa hi an thang chak deuh a, tleirawl hun chho ah erawh chuan hmeichhia an thang chak leh zawk fo. An than dan a tha em tih tehna tha ang reng tak mai a awm a, internet hmang thei tan chuan he website "http://www.babycenter.com/baby-child-growth-percentile-calculator" ah hian a en theih a ni. Tin, naupang lam doctor te'n growth chart an nei ngei anga, chumi hmang te pawh chuan an than dan chin a en theih bawk.