Hmanah chhan ho deuh avangin mi pahnih an insual titih a. A upa zawk chu a thiam lo hmasa zawk a ni a, a titak riau zawk lehnghal a. A naupang zawk chuan sual tak tak tum vak lo hian a buan deuh mai mai a. Chutia patling pahnih han invai vung vel karah chuan a upa zawk hahmai pahnih chu a bal ta hlauh mai a. An insual zui ta lo a. Mahse buaina a intan dawn chauh zawk a ni.

Ha bal zawk chu a thin a rim em em mai a. Naupang zawkin hliampui tawrhtira a hahmai pahnih ngawt a hnek balsak chu a lung hi a awi thei lo. A hnek balsaktu chu a inchhir em em mai thung a, a tira thiam zawk, insualah pawh chak zawk chuan ngaihdam a dil ngat ngat mai a. Mahse, a ngaidam thei si lo.

A manganthlak em avang chuan a naupang zawk chuan ‘Pathian hming meuh lamin’ ngaihdam a dil ta a. Pathian hming lam a’n nih meuh chuan a upa zawk thinlung pawh chu a nem ta deuh a. “Pathian hming a nih chuan ka ngaidam ang che,” a ti thei ta a. Kan thaw huai mai a.

Mizoten Pathian kan hre tlat thin hlutzia te, a hming kan lama thil a fel deuh duak theih dante chu hmu hmanin ka inhria a. Zu rui thinlung so but but pawh hi Pathian hming chuan a chhem dai fo a, inuiresan rilru na leh kehte pawh hi Pathian hming chuan a thawi damin a kilhkhawm thei fo a, nungchang dik lo tam tak pawhin Pathian hmingin an sim thei fo thin reng si a.

Mahse, chutia Pathian hminga ngaihdam a tum zo chiah chu pindana darthlalang lian lo awm remchangah chuan a va inbih pek a! A hahmai langin an then vel ta a. Hliam thar tih takah a la sen sung mai bawk si, a hahmai insi thap thin awmna hmunah khan a kaw phut tawh mai bawk si! A lung a awi thei leh ta ngang lo a, “Aih, a theih loh, Pathian hming pawhin ka ngaidam leh thei lo che,” a ti leh ta tlat a. Kan buai zui leh ta a.

He mihring thinlung na, thinrim laklawh, Pathian hming lam satliah pawhin a chhem daih theih tawh loh khawpa chhungril na ngawih ngawih leh huatnaa khat, pawlh buaitu neih belh bawk si zet chu manganthlak tak a ni. Ni tam tak, zan tam tak chu inveh leh inveng reng rengin kan awm chho ta pek a.

Insual ri a awm hrih lo a, invaupung ri hriat tur a awm hek lo. Tualthahna tur chemte tah hriam ri leh invenna tur hmanraw tuaihnum ri chu a ri rual chhak chhak thung a. ‘Thlipui thawh dawnah boruak reh ruih a awm chawk’ an tih ang maiin, ngawi ranin, ‘Engtikah tak che ang maw?’ tiin, boruak rit churh mai karah chuan kan inmelh hrek hrek hlawm a. Hahthlak tak a ni. Insual se, inbei se, duh tawkin insawisa se, zo vek tawh mai se a hahdamthlak zawk awm asin!

Mahse, nakin deuhah chuan hliampui tuar ber chu a piangthar ta hlauh mai a. A va han thawventhlak tehlul em! A pianthar hma khan Pathian hming lam chuan a thinlung chu an tawk che ve fuih thin tak na a, a chhungah ‘nung’ a awm miau loh avangin darthlalang a inen apiangin a mihrinna a lo chhuak thin kha a ni a. Mahse, tunah chuan amah neitu chu a chhungrilah a nung tlat tawh a, buaina a awm tawh lo a, ngaihdam theih loh a awm tawh lo. Inremna chibai inbukin remna ruai vawksa repte an eiho leh thei ta! A ha hmai bal lai chu fiamthu thawh nana hmangin an nuiho ham ham leh thei ta zawk a ni. Neitu nung neitu nun chu a danglam tak tak thei a lo nih hi!

Mizo tam zawk hian Pathian hi kan hmelhriat a, a hming chu kan zah fu. A hming lam mai pawh kan thiamin a hminga thil tha tih ve leh kawng dik zawh ve pawh kan duh. Kum a thar a, rilru thar puin thutiam thar pawh kan siam leh hlawm mai thei e. A \hen phei chuan Pathian hming pawh kan lam leh ngei ang.

Mahse, kan chhehvel kan thlir a, darthlalang kan bih a, tukverhah kan dak chhuak a, kan inen a, mi dang kan en a, ‘mihring chu kan chak lo a’ tiin chhuanlam nalh tak kan siam a, Pathian hminga kan tiamthute hi kan bawhchhe leh thin.

Pathian hmingin kan tih nazawng hi a tawp kan thlenpui lo fo a, kawng lakah kan tluksan leh chawk. Keimahniah ‘nung’ a la awm loh vang pawh a ni mahna! Neitu nung neitu nun chu a danglam tak tak thin ngei si a!