KA HUANG hi mahni huang e ti loin, zuk thiat hlei thei lo ia le! Kum a lo tam ve ta deuh bawk nen, mit khing del nih nen, thatchhiat ve reng nen, NEN a tam ta riau.

Tun Thawhtanni, ni 14-10-2019 khan kan ek-senpui Upa Chawngdinga’n Mission Veng kohhran hall-ah an inneih kum 50-na champhaphak a lawm a, min sawm hlauh mai a. Kum 50 lai ka pemsan tawh mah ni se, tlangval harh lai zawng zawnga ka chenna a nih avangin ka ngai em em reng mai sia, mahni bial hluite (min bial ve lo mah se) hmuhna remchang ni pah fawmin tiin kan nupain kan va chhim ve a, mi tam tak zingah milem ka va kal ve niin ka inhre ber. Reverend tih angreng, kohhran upa tih angreng kha an khat thup mai nia.

Milem tih ka han sawi takah chuan Pa Bawiha (Bawihchhuaka) chuan a vawk cher chhe zet mai hralh a tum a, a nupui hralh loh hlau lutuk chuan, “Tuna kan chhiar ang pui pui lo deuh,” a ti hman emaw chauh tih chuan Pa Bawiha chuan, “Nui, mi tak takin thu kan sawi laiin MILEMIN thu lo sawi ve suh, thingpui sen vat,” a ti nget mai an tihte ka hre chhuak rum rum mai nia.

Inkhawm bân chuan chaw tuihnai takin a zui lehnghal a, chutah chuan CHIBAI tur hi ka han hmu tam khawp a, kum 10 chuang chuang ka lo hmuh tawh loh te, ngaihzawng hlui (min ngaizawng ve lote) kut a pan hlawi thei ang tih khawpin chibai ka tawng nia.

Chawngdinga pu (a pa puzawn) hi Pu Suakthuama, chhang ur thiam zet mai hi a ni a, Jelebi te hi a hming la hre hek lo i, kual hnih phek kan ti mai a, chung chhang khawlaia a’n zuar chuuh - a hralh thei thin teh asin. A fapa hming chu Phira a nia, kei aia kum 3 emaw vela upa a ni. Tlangnuamah khian Phira bawk, nghawng phar a awm ve bawk a, Phir nghawng phara tia koh duhdah a ni thin. Phir nghawng phar tak tak zawk chuan a haw riau a, a um theih loh tur atangin kan chhaih thin. J.Lianchunga nen dawrkai thlaa an kal laiin Phir nghawng phar loa chuan an hnungah Phir nghawng phara’n a rawn zui tih hriain, “Chunga, tunah hian ring deuhin PHIR NGHAWNG PHAR tiin min ko vak la, ka haw miah lo ang,” a tia. Chunga chuan Phir nghawng phar tak takan a rawn zui tih hre loin, “A nih, i huat leh si na chuan ka vel ang che. PHIIR NGHAWNG....,” a ti hman chauh a, an hnunga Phir nghawng phar tak tak zawka chuan Lianchunga nghawngah rekin a’n nawr tak tak mai a ni awm e. A hlauh thu min hrilh fo thin.