Kan thianpa pa kha alawm maw le—Confi' mah mah chu le—thil pawh a ngah mah mah a!

A hawiher, a kal dàn, a kekawr hâk, a kekawr jeeper jip duh dàn kher kher, a kawrchei inbel thin leh thuam a inbel dàn zawng zawngte kha chu a ve mai mai chauh a la nia! A in sak, a in dang rel leh, a ram hralh leh ram dang a lei tharte mai bâkah, Aizawl veng thenawm hnaivai maia a huan siam, a vawk vulh, kêl leh bâwng a vulh zozaite kha … mi awhawm a ni, kan ti luai luai thin!

A fapa, kan thianpa paw’n a ti alãwm: fiamthua an sawi thin kha  a tak takin a sawi thei tlat zêl—kan ngaisáng ve fu thin. Hetin a ti alãwm: ‘Hmanni chu, kan in sak thar tê zâwk, chhãwng riatna atangin ka tla thla palh hlauh mai a; mahse, ka vannei! Kan swimming pool lian zâwk, tui kan lo dah khah tawhnaah ka tla thla hlauh mai a!’

Kan lo va’n ngaisáng thin tak—khatia sawi theitu, kan thianpa kha!

Kan thianpa pa chuan a fate chu sawrkarah a thun thei vek! Thun hi a thiam hrim hrim, an tia … a mote chenin sawrkarah a thun zêl e, an ti! Tin, nula tam tak lakah a ‘englo’ pawh a thun a thun, tih pawh tlángin kan hria! Mahse, fa dang erawh a neihtír lo thiam!

Amah anga engineer hi an tam a; sawrkar chhawr ve tho engineer. Mahse, kan thianpa pa chuan thiam hi a ngah bîk êm alãwm—kawng laih engineer nih bâkah sangha khawi engineer nih a thiam tel a; pipe siam engineer nih leh kuhva huan siam engineer nih pawh a thiam kawp tho a; sawrkara stationery supply engineer te a ni tel leh zêl hi chu mak kan ti ve tho thin! Tin, car lei engineer a nih leh zêl dànah hi chuan mak tihna kan nei ve fo a; kawng chhuka nawr ngai two wheeler a chah thlen atang phei kha chuan, ‘A êm êm deuh em aw …’ kan ti ru ve tawh.

Keini fa lung mãwlho hi chuan, ‘A êm êm deuh em aw …’ kan ti tak tak thiam lo. A khabe hian khawizú a pai nge maw ni, a mi lian ber atanga a mi tê ber, keini daikil kára awmte chen pawh hi min be lãwm thiam êm êm zêl mai a. Kan thianpa pa mi hriat nih hi kan inchhuang ve thin. 

A duh hun huna two wheeler workshop a hawn theih rualin Aizawla la awm ngai lo car showroom hawng thei engineer kha a ni miau a—awhawm deuh a ni asin! Han hmuhsit chi rual a ni ngai lo!

Kohhranah lah a tlatlum fú a! Thawhlàwm thawh zah mila kohhran hruaina thawktute hnuaia láwi a ni bawk a; an Biak in pawh saw ama design, a structure pawh ama supply; duroturf leh turf pawh a contact atanga an lâk vek; mihring man thei chi (current-in mihring a man thin!) supply-tu leh a wiring zawng zawng tih tírtu pawh amah tho! Mahse, mihring—thlarau bo erawh a la man lo!

YMA-ah te hlei hlei hian a nia a inlulin thin ni! Ama páwl din emaw tih mai awl tùr khawp hian a kaihhruai hna hi a thawk ‘zei’ a. YMA, páwl lah páwl páwlah a chantír thiam a. Ka sawi awmzia chu, ama páwl leh ama páwl lo YMA Branch khatah a dah thiam ka tihna a nih chu. OB nih loh thiam lo khawpin a ni chhên mai a. Mite lah chuan an ning si lo! An vêng kohhran thalai páwl zawng zawng hi ama din emaw tih theih tùrin a intitàtu thiam a; a fakawm a nia! Pavalai leh nuho-ah lah tlâktlum a hreh hek lo!

A car neih zozai hi aw … a ngah a ni lo, a nei chikim! Office kal car te; huan kal car te; feh motor te; mitthi ràl car te a nei—chhuka nawr ngai scooty erawh a faten an khalh ngai lo! Chutianga tãwng lirthei nei tùrin a tê tlat lo!

A fapa ú ber, kan thianpa hi fiamthu thawhnaa an sawi thin pawh a taka nunpui tlat thin mi a ni miau a. Tum khat chu accident tê-nau a tâwk a. A nawmsam loh kan kan tumin a ti alãwm: ‘Hmànni chu, kan huan atanga ka rawn hãw chho chu, kan Hyundai Venue car thar hlak, a ri' pawh la register loh (ka va awih lo tak! mahse, a ti miau sia!) kha ka rawn test drive chho châk ve hrim hrim a. A drive chu a nuam ê… Ka nu’n bank-a dah tùr pawisa min phurhtír kha … a tam sia, a rit lutuk a! Mahse, pawisa hi chu kan chhúngkua chuan ‘thil’ angah kan en a—a ho e!  Ka rawn tlãn chho zêl, Sihhmui thlen hma khàm sáng tâwkah ka accident a. Metre 100 chuang kawngthlangah ka lum a. Car a kàng vek. Ka phurh pawisa pawh a kàng ral vek! Mahse, engtin mah ka awm lo a; ka nu ka hrilh a, a nuih a za raap!’

An êm êm thin a nia, an chhúngkua hi! Pathian thu erawh an hre fú si! Titi lah an thiam. Mitthi in leh khawhar inah lah an tlawr thei zêl. 

Chutia hlim tak (emaw inti a) khawvêla an lal lèn lai chuan, kan thianpa piancham lawm tumin an inbuatsaih mup mup mai a. Aigupta ram grep uain tha mi an chah tûk chuan, zíng kárah a duh apiang nei thei zêl kan thianpa pa chu an kai tho zo ta tlat lo! A fapa piancham chu a thih ni a ni ta!

Amah an vùi ní-a Pastor thu sawi kha, kan bengah a chám reng! Ani chuan, ‘Khawvêlah hian eng nge kan dam chhan le? Jakoba chuan, kan nunna chu chhûm rei lo tê lo langa ral leh mai thin ang a nihzia min hrilh a nih kha. Dik lo taka hausakna te, kuttling loa ram zau tak neihte hi em ni kan thlan zêl dáwn—he kan kumhlun lohna tùr ramah hian! Kan chàm hlenna tùr emaw kan tih hmunah hian ‘ngah’ kan ngah lutuk a…’ a ti a. Kan pawm ta êm êm a. Ka thianpa pawh chu kawm tlâkah kan ngai ta ngai lo a …