Zawhna: Ka pu, tlangval kum 33 mi, zuk leh hmuam ti ngai lo ka ni a, zu erawh chu ka lo in ve zeuh zeuh tawh thin. Kum hnih kal ta vel khan ka nghâwng ding lam sirah hian bâwk a rawn awm a, vawi hnih ka entir tawh a, damdawite min chawh a; mahse, a reh chuang lo va, a rei deuh hnua reh mai tura an sawi avang leh khawih vel pawha na a awm loh avangin ngaihthat lohna ka nei hran lo va, ka entir zui tawh lem lo. Mahse, tun hnaiah hian a hmaa bâwk awmna chung, ka khabe ruh bul maiah hian bâwk dang a rawn awm belh tlat mai a, engvang nge ni thei ang? Engtia tih chi nge?

Chhanna: Nghawng bâwk kan han tih hian a chhan common ber pawl chu thal vung (lymph node enlargement) a ni thin. |hal vung hi a chhan tam tak a awm thei a, a common zual chu infection eng emaw tak vang te, TB natnate leh cancer eng emaw vang te a ni thin. |hal vung a lo awm hian infection hi rinhlelh hmasak phawt a ni thin a; chuvang chuan antibiotic course kan chawh hmasa phat thin. A reh mai loh chuan hip chhuah a, en chian (Fine Needle Aspiration Cytology – FNAC) kanchawh leh thin. Infection sign a awm leh awm loh hriat nan thisen test-te kan chawh tel a, a thenah chuan TB an neih leh neih loh hriat nan Chest X-Ray te kan chawh tel bawk thin. Nghawng bawra thal vung hi ha leh hahni (teeth and gums) lam fel lo vangin a awm ve fo a, dental check-up te pawh a pawimawh ang. Damdawi an chawh hnuah che a reh lova a rawn awm belh avang hian FNAC hi tih ngei a tha a. Hospital-ah Surgery Dept OPD-ah lo inentir ta la, tih tur an lo hrilh ngei ang che. Hlauhthawn a tul lo va, a chhan hriat chhuah ngei a pawimawh vangin lo inentir ngei ang che.